Thursday, December 07, 2023

Tag: BPMC

7 angol sa road mishap sa Malaybalay

Posted on by cmn

Gidala sa ospital ang pito ka mga biktima sa nahitabong pagkarambola sa tulo ka mga sakyanan sa Sayre Highway, Purok 5, Barangay San Jose, Malaybalay City, Bukidnon

Sumala sa taho, ang insidente nahitabo niadtong Nobyembre 13, 2023.

Ang mga nalambigit nga mga sakyanan gilangkuban sa duha ka Hilux Pick-up Truck ug isa ka pamasaheroang Multicab.

Matod sa taho ni Police Lt. Col. Julius Clark Prisco M. Macariola IV, OIC sa Malaybalay City Police Station nga ang mga biktima nag-edad og 26-51 anyos.

Ni-respondi sa dapit ang Malaybalay Emergency Rescue Unit (MERU) ug ang mga biktima gidala sa Bukidnon Provincial Medical Center (BPMC) sa Malaybalay.

Ang mga drayber uban ang ilang mga sakyanan gidala sa buhatan sa kapolisan alang sa tukmang aksyon. (MG Mayumi B. Madera)

Goiter awareness gilusad sa Bukidnon

Posted on by cmn

Ang Iodine Global Network milusad og Thyro Mobile Medical Mission sa Bukidnon sa Capitol Grounds, Malaybalay City kaniadtong Oktubre 16, 2023

Katimbayayong sa grupo ang Rotary Club of Malaybalay City ug Bukidnon Provincial Medical Centre (BPMC).

Ang mga kalihukan gilangkuban sa goiter screening, thyroid ultrasound, blood testing sa thyroid hormone, urine testing sa iodine level, ug salt testing sa iodine levels. Lakip sa kalihukan ang pagpasabot kabahin sa Iodine Deficiency Disorders (IDD) ngadto sa mga mitambong ug press conference.

Si Rtn Dr Teofilo San Luis, kinsa isa sa mga focal person mibutyag nga ang Bukidnon lakip sa 15 ka mga probinsya sa Pilipinas nga taas og kaso sa iodine deficiency.

Kini iyang gi-base sa ulahi nga datos sa Department of Science and Technology – Food and Nutrition Research Institute.

Ingon niya, kasagaran sa gaka igo sa goiter mao ang mga babae.

Ang gitutokan sa kalihukan mao ang mga babae nga anaa sa reproductive age kon nag edad og 15 ngadto 49 anyos matod sa United Nations.

Gawas sa Bukidnon, ang uban pa nga mga probinsya nga adunay IDD mao ang Mountain Province, Benguet, Pangasinan, ug Palawan sa Luzon; Cebu; Antique; Capiz; Biliran; ug Western Samar sa Visayas; ug Davao Occidental; South Cotabato; Zamboanga del Norte; Zamboanga del Sur; ug Basilan sa Mindanao.

Pipila sa mag personalidad nga mitambong mao si local endocrinologist Dr Cindy Josol Blancaver ug Provincial Health officer II, Dr Gary Guido C. Tabios Jr. (MG Mayumi B. Madera)

Libreng operasyon sa ngungu, bungi ipahigayon sa Bukidnon

Posted on by cmn

Ang Bukidnon Provincial Medical Center (BPMC) mupahigayon og libreng operasyon sa Cleft Lip and Palate sa Nobiyembre 17-19 ning tuig

Base sa pahibalo sa LGU Bukidnon, ang BPMC miawhag sa tanang gusto mu-avail nga muadto sa ilang pasilidad sa Nobyembre 6-16 alang sa screening.

Gitaho nga bukas kini alang sa mga indibidwal nga nag-edad og isa ka tuig pataas kinsa residente sa tibuok Bukidnon.

Ang surgical mission gi-sponsoran sa Agila Shriners Temple 195-Bukidnon Chapter, sa pakigtimbayayong sa Maharlika Charity Foundation ug sa Provincial Government of Bukidnon. (MG Mayumi B. Madera)

Motorsiklo nabalintong; isa patay, isa angol

Posted on by cmn

Isa ang patay ug isa ang na-angol human nabalintong ang motorsiklo nga ilang gisakyan sa Fortich Street, Purok-3, Barangay-7, Malaybalay City

Si Police Julius Clark Prisco M. Macariola IV, OIC sa Malaybalay City Police Station, nitaho nga ang insidente nahitabo niadtong August 27, 2023 sa ala 1:40 sa kadlawon.

Ang mga biktima giila nga si Ernesto Joseph Baterna y Batoon (driver), 25, ulitawo, ug residente sa Purok-4, Barangay Dalwangan, Malaybalay City, ug si Faith Beb Gamot y Acasio (angkas), 24, dalaga ug residente sa Kubayan, Barangay Casisang, Malaybalay City.

Gitaho nga ang nasangpit nga motorsiklo nagsubay sa Fortich Street paingon sa south direction ug pag-abot sa atubangan sa San Roque auto repair shop, nawad-an og kontrol ang drayber sa gimanehong motorsiklo ug niliko sa sementadong dalan.

Tungod niini, ang drayber ug ang iyang back rider nakaangkon og physical injuries.

Ang mga biktima gidala sa Bukidnon Provincial Medical Center (BPMC) alang sa pagtambal. Apan, ang angkas, gideklera nga dead on arrival. (MG Mayumi B. Madera)

Patayng lawas napalgan sa Malaybalay

Posted on by cmn

Isa ka patayng lawas sa isa ka lalaki ang napalgan sa P-6, Santo NiΓ±o, Malaybalay City niadtong Hulyo 30, 2023

Ang biktima naila nga si Higinio Tabio Tuya, 53, ulitawo, mag-uuma, ug residente sa P-6, Santo NiΓ±o, Malaybalay City, Bukidnon.

Matod sa isa ka witness, ang biktima nalambigit sa isa ka aksidente sa motosiklo tungod sa kahubog niini.

Human, nakita sa gawas sa balay sa witness ang biktima nga naghigda.

Ang witness daling mitawag sa 117 emergency hotline ug ang biktima nadala sa Bukidnon Provincial Medical Hospital (BPMC) apan gideklara kini nga Dead on Arrival.

Si Police Lt. Col. Julius Clark Prisco M. Macariola IV, OIC sa Malaybalay City Police Station, nisulti sa iyang report nga adunay follow-up nga imbestigasyon ang gipahigayon aron masuta ang hinungdan sa kamatayon sa biktima. (MG Mayumi B. Madera)

Suspetsado sa pagpandunggab sa Capitol grounds nasikop

Posted on by cmn

Ang suspetsado sa pagpandunggab nga nahitabo niadtong Marso 26, 2023 sa Capitol Ground, Brgy. 6, Malaybalay City, nasikop na sa kapolisan

Si Police Lt. Col. Julius Clark Prisco M. Macariola IV, OIC sa Malaybalay City Police Station, sa iyang report, niila sa suspek nga si Junel Boyan Villacera, 20, ulitawo, ug residente sa P-1B, Magsaysay, Malaybalay City.

Ang unang biktima ni Villacera, isa ka menor de edad nga naka angkon og isa ka samad dinunggaban sa iyang tiyan. Ang biktima dali-daling gidala sa Bukidnon Provincial Medical Center alang sa pagpatambal.

Human na aresto ang suspek, ang iyang ika duhang biktima nga giila nga si Ricky Taghoy Belancueva, 24, ulitawo, ug residente sa Beshiba, Kitaotao, Bukidnon niadto ug nangayog tabang sa mga kapolisan.

Si Belancueva, kinsa naka angkon og isa ka samad dinunggaban sa iyang likod, niila ug nikompirma sa maong suspek. Siya gidala usab sa BPMC aron matambalan.

Ang Malaybalay CPS nag andam na sa kinahanglanong mga dukomento alang sa pagpasaka og kaso batok sa suspek. (MG Mayumi B. Madera)

200 ka mga pasyente nakabenepisyo sa libreng surgical mission sa SUI Generis Foundation, PGB

Posted on by cmn

Kinatibuk-ang 200 ka mga pasyente ang nakabenepisyo sa gilusad nga libreng operasyon sa Sui Generis Mission Foundation ug sa Provincial Government of Bukidnon (PGB), nga gipahigayon diha sa Bukidnon Provincial Medical Center (BPMC), Malaybalay City, Bukidnon,
Marso 9-12, 2023

Sa maong ihap, 59 niini ang nipailalom sa major surgery (laparoscopic cholecystectomy- 13; laparoscopic hernia repair- 16; thyroidectomy – 17; hemorrhoidectomy- 3; excision- 3; GYNE-
TAHBSO – 7), 42 ang sa minor surgery , 69 ang sa dental services ug 30 ang sa Arteriovenous Fistula (AVF) alang sa dialysis patients.
“I want to thank you all for being part of this medical mission and all other involved in making this happen, especially the team. Congratulations sa atoang Provincial Team ug sa mga doctors…”, kini ang
gipaabot nga pagdayeg ni Governor Rogelio Neil P. Roque ngadto sa tanang nagpaluyo niini, diin iya usab gilantaw nga pinaagi sa giya ni Dr. Jose Rhoel De Leon, Bukidnon Provincial Health Sector Overseer, ang sektor sa maayong panglawas sa probinsya mas mapalambo pa,
atol sa gipahigayon nga Fellowship Night niadtong Marso 10, 2023 sa Kaamulan Open Theater, Malaybalay City, Bukidnon.
“This is the most organized mission that I have been through. Akong ipaabot ang akong kalipay, ilabi na sa atoang governor sa probinsya sa Bukidnon. Dakong pasalamat namo sa inyohang pag-abi-abi
kanamo diri…”, kini ang tipik sa mensahe ni Justice Geraldine Faith Econg, kinsa mao ang organizer/benefactor sa Sui Generis Mission Foundation.
Mitambong sa maong panag-uban sila si 2nd District Representative Jonathan Keith T. Flores, BPMC Chief of Hospital Dr. Miguel Antonio C. Prantilla kauban ang mga in-house doctors sa BPMC, ingon man ang mga personahe sa Provincial Health Office (PHO). (PR)

3 gidunggab sa kainom sa Malaybalay

Posted on by Diego M. Hidalgo

Tulo ka tawo ang gidunggab sa ilang kainom sa Purok-6, Barangay Magsaysay, Malaybalay City

Duha ang patay ug isa ang samdan sa insidente nga nahitabo kaniadtong Marso 04, 2023 pasado alas 9:05 sa gabie.

Ang namatay mao sila Julie Cabonada Maraasin, 58, minyo, laborer; ug Danilo Cabonada Maraasin, 52, minyo, laborer.

Samtang samdan si Sofronio Ojano Tina-an, 59, ulitawo, laborer.

Ang suspek giila nga si Paquito Cabonada Maraasin, 55, minyo, laborer.

Gitaho nga ang mga biktima ug ang suspetsado nagkainom sa panimalay ni Sofronio Tina-an, sa dihang nagkalalis kini gumikan sa hisgutanan kabahin sa gold mining.

Giingon nga giibot sa suspek ang iyang kutsilyo nga naa sa iyang hawak ug dayong dayong gidunggab ang mga biktima.

Si Police Lt. Col. Ritchie A. Salva, OIC sa Malaybalay City Police Station, sa iyang taho, niingon nga ang mga biktima gidala sa Bukidnon Provincial Medical Center apan gideklara nga patay na sa wala pa nahiabot sila Julie ug Danilo Maraasin, samtang si Sofronio Tina-an ubos pa sa obserbasyon gumikan sa mga samad dinunggaban nga naangkon niini.

Sa kasamtangan, ang suspek anaa ubos sa kustodiya sa kapolisan sa dakbayan sa Malaybalay. (Diego M. Hidalgo)

Aplikasyon alang sa lisensya sa operasyon sa isa ka blood bank, gisuportahan sa SP

Posted on by cmn

Gisuportahan sa 27th Sangguniang Panlalawigan (SP) ang sulat-hangyo ni Provincial Governor Rogelio Neil P. Roque, pinetsahan Enero 18, 2023, pinaagi sa Resolution No. 2023-1099(27th SP), kabahin sa aplikasyon sa Bukidnon Provincial Medical Center (BPMC), alang sa lisensya sa operasyon sa usa ka blood bank, isip nag-unang Blood Bank Center sa probinsya

Sa kasamtangan, ang BPMC nga nahimutang sa syudad sa Malaybalay, adunay blood bank nga mao ang nagpahigayon sa blood screening, donor selection and collection of blood unit, onsite og off-site o mobile blood donation activity.

Uban sa bag-o ug dugang ekipo, mahimo na nga makadonar ug dugo ug ang dugo mahimong masalang aron masiguro ang taas nga kalidad, insakto ug luwas ang dugo nga madawat sa mga pasyente.

Sa maong lakang, ang laboratory sa BPMC gikinahanglang mag-apply sa lisensya alang sa operasyon sa blood bank with additional function, diin kini gikinahanglan isip usa sa mga kinahanglang dokumento nga gitakda sa Regulatory, Licensing and Enforcement Division (RLED) sa Department of Health alang sa pag-abroba sa maong aplikasyon. (PR)