Tuesday, March 26, 2024

Lalaki gipusil sa Kitaotao

Isa ka 23-anyos nga lalaki ang gipusil patay sa Purok 10, Sityo Pamulaan, Sinuda, Kitaotao, Bukidnon gabii sa Enero 12, 2024

Ang biktima nakaangkon og upat ka samad pinusilan – duha sa iyang dughan, ug duha sa wala ug tuo nga bahin sa iyang lawas.

Sumala kini sa report ni Police Captain Christopher P. Tuzara II, OIC sa Kitaotao Municipal Police Station (KMPS).

Sa inisyal nga imbestigasyon, nasayran nga sa samang petsa mga alas 7:40 sa gabii, nagbarog daplin sa dalan ang nahisgutang biktima dihang niabot ang duha ka wa mailhing tawo sakay sa kolor itom nga Kawasaki Bajaj nga motorsiklo, nga walay plaka.

Gipusil sa mga mamumuno ang lalaki sa makadaghang higayon gamit ang Cal .45 nga pistola.

Matod sa magulang sa biktima, ang gunman nagsul-ob og itom nga jacket, itom nga bonnet, ug itom nga short.

Human sa pagpamusil, misibat ang mga suspek paingon sa amihanang direksyon.

Ang biktima gihatod dayon sa iyang igsuon sakay sa motorsiklo paingon sa Buda Medical Center. Ikasubo, ang biktima gideklarar nga dead on arrival sa nag-atiman nga mananambal.

Narekober sa mga mirespondeng pulis nga nadestino sa Border Control Point (BCP) sa Lorega, Kitaotao, Bukidnon ang unom (6) ka kabhang sa bala sa Cal. 45 pistola sa lugar nga nahitaboan sa pagpamusil.

Kini nga mga piraso sa ebidensya lagmit adunay mahinungdanon nga papel sa nagpadayon nga imbestigasyon aron mailhan ang mga sad-an ug mahibal-an ang mga kahimtang nga naglibot sa insidente.

Wala pa matino ang motibo sa pagpamusil.

Ang padayon nga imbestigasyon nakatutok sa pagtigom og dugang impormasyon aron mahibaw-an ang mga rason luyo sa pag-atake sa biktima. (Omar Rashid Z. Abdullah)

Lalaki gipusil sa Don Carlos

Isa ka lalaki ang gipusil patay sa Purok 8, Brgy. Calaocalao, Don Carlos, Bukidnon gabii
sa Disyembre 27

Sumala sa report sa kapolisan sa Don Carlos, ang biktima gipusil patay samtang naglingkod sa
ilang balcony.

Ang biktima nakaangkon sa grabing mga samad pinusilan sa lawas hinungdan sa iyang
hinanaling kamatayon.

Saysay sa higala sa biktima, nga samtang nag-estoryahanay sila, isa ka wala mailhing lalaki nga
nagsuot og jacket nga adunay hood, ang misulod sa pinuy-anan sa biktima ug girakrakan kini.

Ang wala mailhing lalaki nga suspek daling misibat human sa insidente.

Narekober sa crime scene ang 20 ka baseyo sa bala sa Armalite rifle ug isa ka kapsola sa
bala sa kalibre .45 pistola.

Padayon pa ang imbestigayon sa kapolisan aron pag-ila sa suspek ug pagsuta sa motibo sa
krimen. (Diego M. Hidalgo)

Lalaki gipusil, patay sa Kitaotao

Isa ka lalaki ang patay human kini maka angkon og samad pinusilan kaniadtong Agosto 9, 2023 sa Purok 5, Sitio Mahayahay, Metebagao, Kitaotao, Bukidnon

Ang biktima giila nga si Remegio Ardisa y Naranghas, 49, adunay kapuyo, ug residente sa maong lugar.

Ang kapuyo sa biktima niingon nga niadtong Agosto 8, 2023 sa alas 5:00 sa hapon, samtang ang biktima nag-atiman sa iyang kabayo, adunay isa ka wala mailhi nga lalaki ang miduol ug mipusil sa biktima.

Ang biktima naka angkon og upat ka pinusilan sa iyang likod nga miresulta sa iyang dayong kamatayon.

Pila ka adlaw sa wala pa mahitabo ang insidente, ang live-in partner sa biktima niingon nga niadtong Agosto 5 sa alas 12:30 sa tungang gabie, adunay tulo ka wala mailhi nga mga tawo ang naglibot-libot sa ilang panimalay.

Si Police Cpt. Christopher P. Tuzara II, OIC sa Kitaotao Municipal Police Station nitaho nga tungod sa kahadlok, ang biktima ug iyang kapuyo mibiya ug miadto sa Metebagao proper.

Niadtong Agosto 6, ang biktima uban ang iyang kapuyo miuli sa ilang panimalay ug nadiskubrehan nga nangaguba ang ilang mga gamit ug wala na ang ilang tinagoan nga kwarta nga gibana-bana nga nagkantidad og Php47,000.00. (MG Mayumi B. Madera)

Lalaki gipusil patay sa Libona

Isa ka lalaki ang patay human kini gipusil sa Sitio Putian, Sil-ipon, Libona, Bukidnon kaniadtong Agosto 06, 2023

Ang biktima giila nga si Robert Pucol y Saguilan, 33, minyo, mag-uuma, ug residente sa Purok 1A, Sil-ipon, Libona, Bukidnon.

Base sa report ni Police Cpt. Manolito E. Budo, OIC sa Libona Municipal Police Station, ang biktima gipusil sa wala mailhi nga lalaki.

Sumala ni Benjie Pucol, ang manghud sa biktima, saw ala pa ang insidente, ang pag-umangkon nila nga si Markinto Cogo nagka-away uban sa laing grupo sa gawas sa covered court kung aha gipahigayon ang disco. Ang manghud ug ang biktima mi-awat sa komosyon.

Ang manghud naka dungog og pagbuto sa pusil ug nakita ang natumba nga biktima nga adunay pinusilan sa likod niini.

Gidala ang biktima sa Provincial Hospital Annex sa San Miguel, Manolo Fortich, Bukidnon apan gideklara kini nga dead on arrival.

Ang kapolisan nagpahigayon og imbestigasyon alang sa posibleng pag-ila sa suspek. (MG Mayumi B. Madera)

Lalaki gipusil sulod sa panimalay sa Malaybalay

Isa ka lalaki ang gipusil sa wala mailang suspek sulod sa iyang panimalay sa NHA Phase 4, Brgy. Casisang, Malaybalay City udto sa Pebrero 9.

Sumala sa taho sa kapolisan, ang lalaking biktima nailang si Richel Agne, 45, minyo, ug residente sa dapit.

Nakaangkon siya sa samad pinusilan sa tuong bahin sa abaga ug gidala siya sa Polymedic General Hospital sa dakbayan.

Matud sa imbestigasyon sa kapolisan, nakadungog ang biktima sa mga tikang gikan sa ikaduhang andana sa ilang balay hinungdan iyang giabrihan ang pultahan apan gipusil siya sa suspek.

Human sa krimen gamit ang wala masayring kalibre sa handgun, ang suspek misibat padulong sa Airport Village Elementary School.

Padayon pa sab ang imbestigasyn sa kapolisan aron pag-ila sa suspek ug pagsuta sa motibo sa krimen.

By: Diego M. Hidalgo