Nasakmit gikan sa duha ka drug suspek ang gidudahang shabu nga nagkantidad sa P190,400.00 sa buy bust operation sa Purok 21, Brgy. Poblacion, Valencia City, Bukidnon gabii sa Pebrero 24.
Ang mga suspek nailang si Edmund Miasco y Monsales, lakip sa watclist, 32, minyo, furniture assembler ug residente sa Purok 21, Brgy. Poblacion, ug John Michael Boado y Panilagao, 33, minyo, Job-Order sa Valencia City Hall ug residente sa Purok 4, Brgy. Maapag – tanan sa Valencia City.
Si Police Col. Jun Mark J. Lagare, provincial director sa Bukidnon Police Provincial Office (BPPO), niingon nga napalit gikan kay Miasco ang pakite sa didudahang shabu. Nakuha sab gikan sa iyang posisyon ang laing upat ka pakite sa gidudahang shabu, tribal coin purse, weighing scale, stainless steel scissor, P500 buy bust money, belt bag, ug selpon.
Samtang nakuha gikan kay Boado ang selpon ug laing pakite sa gidudahang shabu.
Sa kinatibuk-an, nitimbang sa 28 gramos ang tanan nga nasakmit nga gidudahang shabu ug adunay estimated market value nga P190,400.00.
Ang mga suspek ug nasakmit nga mga ebidensya ang gidala sa Valencia City Police Station alang sa dokumentasyon, ug pagkahuman, gitugyan sab ngadto sa Bukidnon Provincial Crime Laboratory Office sa Malaybalay City.
Gihikay na sab sa kapolisan sa Valencia ang kaso batok sa mga suspek kalabotan sa kalapasan sa Article II, Sections 05 ug 11 sa R.A. 9165 kon Comprehensive Dangerous Drugs Act of 2002.
Ang buy bust operation gipahigayon sa mga miyembro sa Bukidnon Drug Enforcement Unit, Valencia City Police Station, 1st Bukidnon Provincial Mobile Force Company (PMFC), Bukidnon 2nd PMFC ug 1003rd Mobile Company, Regional Mobile Force Battalion (RMFB) 10.
