Tuesday, March 26, 2024

4 patay sa aksidente sa Quezon

Upat ang patay sa nahitabong panagbanggaay sa National Highway, P-10, Puntian, Quezon, Bukidnon niadtong Mayo 1, 2023 sa alas 9:20 sa gabie

Ang mga biktima giila nga si Jossie Ondoy y Alo (driver), 26, dalaga; ug ang iyang backriders nga sila Florida Macolata, hingkod; Vecinte Alo (DOA), hingkod; ug si Junriel Mendoza, 18, ulitawo, ug tanan mga residente sa P-1, Cebole, Quezon, Bukidnon.

Si Police Maj. Noel F. Cano, OIC sa Quezon Municipal Police Station nisaysay sa iyang report nga isa ka motor ug isa ka Hino Truck Bus ang nalambigit sa insidente.

Gisulti niya nga ang upat ka biktima, tanan sakay sa motorsiklo.

Ang Bus gi-drayban ni Christopher Sellar y Labador, 41, minyo, ug residente sa Balangay-6, Poblacion, Quezon Bukidnon.

Human sa insidente, ang mga biktima dali-daling gidala sa Health Center Infirmary, Quezon, Bukidnon apad gideklara silang tanan nga dead on arrival (DOA).

Ang bus driver uban ang mga sakyanan gidala ubos sa kustodiya sa Quezon MPS alang sa hustong disposasyon. (MG Mayumi B. Madera)

3 nakorner, 1 nakasibat sa drug buy-bust sa Quezon

Tulo ka lalaki ang nasikop samtang isa ang nakasibat sa nahigayon nga drug buy bust operation sa hinusang pwersa sa kapolisan kaniadtong Abril 13, 2023 sa Purok-1C, Balangay 1C, Transville, Quezon, Bukidnon

Ang tulo nga nakorner naila nga si Ryan Arnejo Navale alyas “Opyo”, 23, ulitawo ug residente sa Bongbongon, Balangay 6, Quezon, Bukidnon; Joren Uban y Alcabo alyas “Janjan”, 26, ulitawo ug residente sa Sinuda, Kitaotao, Bukidnon; ug si Jose Glenn Catam-isan y Cases alyas “Glenn”, 41, minyo, ug ga puyo sa Balangay 1D, Población, Quezon, Bukidnon.

Samtang ang nakaikyas naila nga si Jonel Adolfo alyas “Pitoy”, hingkod, ug residente sa maong dapit.

Sumala sa report nga nahipos sa Bukidnon Police Provincial Office, ang naka ikyas nga si Adolfo mao usab ang Top 2 PNP/PDEA Regional Priority List.

Nasakmit gikan sa mga suspek ang 8.8gramo sa gidudahang shabu nga adunay estimated market value nga Php 59,840.00.

Kasong paglapas sa R.A. 9165 kon Comprehensive Dangerous Drugs Act of 2002 ang giandam batok sa mga suspetsado.

Ang hinusang pwersa sa kapolisan gilangkuban sa BUKPPO PDEU ug Quezon MPS. (MG Mayumi B. Madera)

4 patay sa road mishap sa Quezon

Upat ang patay ug isa ang naangol sa nahitabong aksidente sa Barangay Road of Purok 3, Barangay Linabo, Quezon, Bukidnon niadtong Marso 16, 2023 sa ala 1:30 sa hapon

Ang drayber giila nga si Ronald Rene Legado Pantua (DOA), hingkud, minyo, job order sa LGU Quezon ubos sa Engineering Department, and a resident of Barangay Paitan, Quezon, Bukidnon.

Samtang ang iyang mga kauban giila nga sila Ricardo Apao Saison (DOA), 56, minyo, JO sa Surveying Services, ug residente sa Purok 3, Mibantang, Quezon, Bukidnon; Alfredo Cabonillas Villamero (DOA), 42, minyo, JO Heavy Equipment Operator, ug residente sa Barangay 9, Poblacion, Quezon, Bukidnon; Ronald Catane Ratunil (naangol), 43, minyo, JO Heavy Equipment Operator, ug residente sa Purok Pag-asa, Salawagan, Quezon, Bukidnon; ug si Eduardo Tuyor Sereno, Jr (DOA), hingkud, minyo, Barangay Kagawad, ug residente sa Purok 1, Linabo, Quezon, Bukidnon.

Sa taho ni Police Maj. Noel F. Cano, OIC sa Quezon Municipal Police Station, ang boom truck nga ilang gisakyan nagbyahe gikan sa Sitio Bagong Lipunan, Linabo, Quezon, Bukidnon ug padulong sa LGU Quezon, Bukidnon sa dihang ang drayber nawad-an og control sa iyang gimanehoan ug napadulong sa may pangpang.

Tungod niini, si Pantua, Saison, Villamero ug Sereno gihayag nga dead on arrival (DOA) samtang si Ratunil gidala sa Bukidnon Provincial Hospital Maramag alang sa medikasyon. (MG Mayumi B. Madera)

Lalaki nga wanted sa kasong rape nakorner sa Quezon

Isa ka lalaki ang nasikop sa hiniusang pwersa sa kapolisan sa Purok-4, Sitio Calut, Santa Felomina, Quezon, Bukidnon kaniadtong Oktubre 29 sa gabie.

Ang nasikop giila nga si Melchor Tobiano y Pitogo, 42, ulitawo, adunay kapuyo, mag-uuma ug residente sa maong dapit.

Siya gisikop pinasubay sa warrant of arrest sa kasong rape nga nakadukit sa kaso kriminal numero 18-10-6686 nga gi issue ni Huwes Jeanne Marie Abarrientos Sabio of RTC 10, Branch 11, 10th Judicial Region, Manolo Fortich, Bukidnon pinetsahan Oktubre 28, 2018.

Ang arestado nasikop human sa upat ka tuig nga pagtago-tago.

Kini nga kasayuran nakuha gikan sa report ni Police Maj. Noel F. Cano, officer in charge, Quezon Municipal Police Station.

Konsehal Baguio sa Munisipyo sa Quezon namatay

Gikasubo kaayo sa mga residente sa Munisipyo sa Quezon, Bukidnon ang pagpanaw ni Konsehal Restituto “Rey” Baguio.

Sa kasayoran nga gipagawas sa Facebook Page sa maong Munisipyo, namatay ang Konsehal pasado alas 8:55 ang takna buntag sa Mayo 17 sa edad nga 53.

Nilingkod siya isip Konsehal sa Munisipyo sugod 2016 hangtod sa kasamtangan.

Nagsilbi siya nga chairman sa committee on engineering and public works, committee on agriculture and cooperatives, ug committee on housing, urban development, land zoning, and classification.

Sa wala pa siya nahimong Konsehal sa Quezon, nahimo siyang draftsman sa Quezon Municipal Engineering Office. Nagserbisyo sab siya isip Kagawad sa Brgy. Poblacion gikan 2007 hangtod 2016.

Tractor operator gipusil sa Quezon

Isa ka tractor operator ang gipusil patay sulod sa iyang panimalay sa Balangay 8, Poblacion, Quezon, Bukidnon gabii sa Marso 1.

Si Police Col. Jun Mark J. Lagare, provincial director sa Bukidnon Police Provincial Office (BPPO), niila sa biktima nga si Ismael Quijano y Colejio, 79, ug residente sa dapit.

Nakaangkon siya sa grabeng samad pinusilan sa dughan. Gidala siya sa St. Ann Medical Hospital sa Quezon apan gideklara siyang patay na sa wala pa mahiabot.

Sumala sa imbetigasyon nga kapolisan sa Quezon, ang biktima nga nanan-aw sa telebisyon ang naglingkod duol sa pultahan sa iyang panimalay. Kalit nahiabot ang suspek nga lalaki nga nangita sa biktima. Sa dihang nitubag na ang tractor operator, kalit siyang gipusil sa dughan. Nisibat ang wala mailang suspek padulong sa katubhan sa dapit.

Gimanduan na ni Col. Lagare ang kapolisan sa Quezon sa pagpahigayon sa dugang imbestigasyon aron pag-ila sa suspek ug pagsuta sa motibo sa krimen.