Isa ka STL teller ang gipusil patay sa Purok-2, Central Poblacion, Kalilangan, Bukidnon kaniadtong Mayo 6, 2023 sa alas 4:40 sa hapon
Sumala sa report sa Radyo Ukay Valencia, ang biktima naila nga si Laiza Magallanes Ebcas, hingkod, ug residente sa maong lugar.
Sumala sa report, ang menor de edad nga anak nga babaye sa biktima niingon nga miduol ang suspek ngadto sa biktima ug misangpit sa pulong nga “Taya ko Gwaps” dungan sa pagtion sa kalibre .45 nga pistola niini ngadto sa biktima ug gipusil.
Nahimo pang malikayan sa biktima ang unang pagbuto sa pusil hinungdan nga namwersa ang suspek ug dayung gisulod ang outlet ug gipabuthan og usab ang biktima hinungdan sa kamatayon niini.
Human sa pagpamusil, dali-daling misibat ang suspek uban sa isa pa ka wala mailhi nga lalaki sakay sa isa ka motorsiklo sa wala matino nga direksyon.
Narecober sa crimescene ang duha ka cellphone, cash ug personal nga gamit sa biktima hinungdan nga wala makita sa kapolisan nga tulis ang motibo sa mga wala mailhing suspek.
Sa kasamtangan, nagpadayun pa ang imbestigasyon sa kapolisan sa Kalilangan aron sa pagsulbad sa krimen. (MG Mayumi B. Madera)
