Pagpreserbar sa kultura ang punto nga gipadangat ni Kitaotao Municipal Mayor Edwin Abucayan, pinaagi sa panaghiusa sa katawhan, atol sa 2023 Indigenous Peoples Month Celebration and 26th IPRA Commemoration niadtong Oktubre 31, 2023 sa Covered Court sa Barangay Sinuda, Kitaotao, Bukidnon

Sumala ni Mayor Abucayan nga ang kultura sa tribu angayang ikinabuhi ug ipreserbar gumikan kay pinaagi niini, dali ang pagsulbad sa mga problema nga moabot, ngalan nga kini ang kalag, prinsipyo ug baruganan sa katawhan sa lungsod, pinaagi sa panaghiusa.

Bisita sa kasaulogan sa tribu si Chairperson Jennifer Pia ‘Limpayen’ Sibug-Las sa National Commission on Indigenous Peoples (NCIP), diin gipahinumduman niini ang 4 bundles of rights diha sa IPRA Law ug 11 building blocks sa ICCs/IPs. Sa iyang pakigpolong, gipalawman niini ang kabahin sa customary law, nga angayang respituhon ug pakisayran sa lumadnong katawhan ang balaod sa tribu. Nga ang komunidad kinahanglang magkahiusa diha sa pagrespito sa katigulangan.

Sa report ni Datu Cosme Lambayon, municipal IPMR gisiguro niini nga sa mga planong kalambuan sulod sa ancestral domain, moagi gayud sa Free, Prior, and Informed Consent (FPIC). Gipasabot usab niini nga ang ancestral domain – pribado apan gipanag-iyahan sa komunidad nga iya sa Federation of Matigsalug Manobo Tribal Council Inc., buot ipasabot iya sa tanang henerasyon, busa dili mamahimong mabaligya.

Anaa usab sa maong kalihukan sa tribu sila Atty. Pinky Grace Pareja, NCIP Commissioner from Northern and Western Ethnographic Region for Mindanao, ug ang mga kadagkoan gikan sa regional and provincial offices sa maong ahensya, kauban ang mga opisyales sa lungsod sa Kitaotao, Bukidnon. (LGU Bukidnon)