Naila na ang tawong napalgan nga nasunog ang lawas sa buntag sa Hulyo 22, 2025, sa kasagbutan sa Purok 4B, Brgy. Aglayan, Malaybalay City, Bukidnon

Sumala sa kasayuran sa Bukidnon Police Provincial Office kaniadtong Hulyo 23, 2025, ang biktima nailang isa ka 23-anyos nga estudyanteng lalaki sa Central Mindanao University (CMU), sa kursong Mechanical Engineering, ug residente sa Ubay, Bohol.

Siya giila sa iyang 22-anyos nga higala base sa keychain ug compass nga iyang personal nga gihatag sa biktima.

Positibo sab siyang giila sa iyang 41-anyos nga uyoan, nga residente sa CMU, base sa physical description ug personal niini nga mga gamit.

Ang landlord sa iyang boarding house nipamatuod sab nga ang mga gamit sa biktima tugma sa mga gamit nga napalgan sa dapit diin nakita ang sunog nga lawas sa estudyante.

Nasuta sa imbestigasyon sa kapolisan nga ang biktima nag-suicide pinaagi sa pagduslit sa kaugalingon gamit ang petroleum. (melbmadera)