Padayon ang paningkamot sa City Government of Valencia nga mapalig-on ang kampanya kontra ilegal nga droga pinaagi sa pagpahigayon og mga impormasyon ug edukasyon sa barangay level

Matud sa Facebook post sa Local Government Unit sa Valencia, gibisitahan sa City Anti-Drug Special Unit Team (CADSUT), ubos sa panudlo sa City Mayor’s Office, ang nagkalain-laing barangay aron ipahibalo ang mandato ug mga responsibilidad sa yunit.

Ang CADSUT, nga gimugna pinaagi sa Executive Order No. 7, Series of 2025 ni Mayor Amie Galario, gitumong sa paghatag og kasayuran, pakig-alayon sa mga barangay ug kapulisan alang sa koordinado nga operasyon, ug pagsuporta sa mga programa sa lokal nga pangagamhanan.

Tumong niini nga mapaayo ang kolaborasyon ug mapalig-on ang mga preventive strategies aron malikayan ang paglapad sa kalihokan sa ilegal nga droga.

Positibo ang tubag sa mga opisyales sa kabarangayan, nga misaad sa ilang suporta sa mga lakang sa lokal nga pangagamhanan.

Pinaagi sa CADSUT, nagalaum ang City Government nga mapadayon ang komprehensibong kampanya batok droga, maprotektahan ang katawhan—ilabi na ang kabatan-onan—gikan sa kadaot nga dala niini, ug matukod ang usa ka luwas, limpyo, ug mas produktibong Valencia City. (pr)