Niadtong Oktubre 20, 2025, usa ka simbolikong buhat sa panaghiusa ug kalinaw ang gipahigayon sa Barangay Lumintao, Quezon, Bukidnon, samtang gipangulohan sa lokal nga mga opisyal ug residente ang Ceremonial Burning sa bandila sa CPP-NPA-NDF aron ipakita ang ilang lig-on nga pagtindog batok sa komunista nga teroristang grupo

Sumala sa social media post sa 89th Infantry Battalion, ang kalihokan, nga gipasiugdahan sa mga opisyal sa barangay sa Lumintao, gipalapdan usab sa mga lokal nga lider sa Butong, Magsaysay, Kipaypayon, ug Paitan, kinsa mipirma sa Persona Non Grata Declaration isip pagpakita sa ilang kolektibong pagdumili sa CPP-NPA-NDF ug sa iyang iligal ug limbong nga ideolohiya.

Lakip sab nga gideklarar nga Persona non Grata ang progressive organizations nga Gabriela, Anakpawis, ug Bayan Muna.

Gisuportahan ang aktibidad ni Captain Sidrac C. Alicog, commanding officer sa Charlie Company, 89th Infantry (MAKATAO) Battalion, kauban ni Captain Jade Karl J. Nival, Alpha Company Commander sa 10th Civil-Military Operations Battalion.

Ang mahinungdanong seremonya gipangulohan ni Lumintao Barangay Captain Thelma R. Aguilar, Barangay Captain Nehru P. Tan sa Butong, Barangay Captain Alma A. Yonson sa Magsaysay, Barangay Captain Jovencito M. Dagatan sa Kipaypayon, ug Barangay Captain George A. Ragmac sa Paitan.

Nagkatigom sa kalihokan ang mga opisyal sa barangay, lokal nga residente, ug mga pamilya sa Former Rebels (FRs) sa Lumintao Covered Court.

Ang ilang kolektibong aksyon nagpakita sa nagkataas nga determinasyon sa katawhan sa Quezon sa pagpanalipod sa kalinaw, pagdumili sa armadong pakigbisog, ug pagtinabangay sa mga ahensya sa gobyerno ug sektor sa seguridad aron mapadayon ang kalig-on ug kalamboan sa ilang mga komunidad.

Ang pagsunog sa bandila sa CPP-NPA-NDF nagbarug isip usa ka gamhanan nga simbolo sa kagawasan ug bag-ong paglaum, nga nagtimaan sa usa ka mahinungdanong milestone sa panaw sa Quezon padulong sa pagka-insurgency-free nga munisipyo.

Ang 89th Infantry (MAKATAO) Battalion, ubos sa pagpangulo ni Lt. Col. Antonio G. Bulao I, Battalion Commander, nagpabilin nga lig-on sa pagsuporta sa mga kalihokan sa kalinaw sa lokal nga komunidad.

Gipakita sa maong kalihokan ang panaghiusa tali sa katawhan ug sa ilang mga lider—nagpamatood nga pinaagi sa kooperasyon, pagbantay, ug komong tumong, lig-on nga nagpadulong ang Quezon sa malungtarong kalinaw ug kagawasan gikan sa insurgency. (melbmadera)

Nagkatigom ang mga opisyal sa barangay, lokal nga residente, military, ug mga pamilya sa Former Rebels (FRs) sa isa ka seremonya sa pagsunog sa bandila sa CPP-NPA-NDF sa Covered Court sa Brgy. Lumintao, Quezon, Bukidnon kaniadtong Oktubre 20, 2025. (89IB)