Nakalot sa hiniusang yunit sa militar ang tulo ka tag-as nga kalibre sa armas nga iya sa Communist Terrorist Group sa hilit ug bukirong bahin sa Brgy. San Luis, Malitbog, Bukidnon

Sumala sa press release sa 4th Infantry Division, nakalot kini kaniadtong Disyembre 5, 2025.

Ang mga nakuhang armas gilangkuban sa duha ka CZ 858 rifles, usa M16A1 rifle, 10 ka 7.62mm 30-round magazines, ug usa ka 5.56mm 30-round magazine.

Ang hiniusang pwersa sa militar gilangkuban sa 403rd Infantry (Peacemaker) Brigade ug 402nd Infantry (Stingers) Brigade.

Ang kalampusan sa operasyon nahimong posible human sa tukmang impormasyon nga gihatag sa usa ka kanhi rebelding nitahan ngadto sa 1st Special Forces Battalion.

“Kini nga operasyon nagpasiugda sa dedikasyon, disiplina, ug propessionalismo sa atong mga tropa. Ang matag nabawi nga armas usa ka lakang nga mas duol sa kalinaw ug usa ka testamento sa atong pasalig sa kaluwasan ug seguridad sa atong mga komunidad. Magpadayon kita sa paggukod ug pag-neutralize sa mga hulga samtang nagsuporta niadtong mopili sa dalan sa kalinaw,” miingon si Brigadier General Seigfred Tubalado, commander sa 403rd IB.

Samtang, gidayeg ni 4ID Commander Major General Michele B. Anayron Jr. ang moral, disiplina, ug tactical proficiency sa mga unit nga nalambigit. Gipasiugda niya nga ang matag armas nga nakuha nagrepresentar sa usa ka kinabuhi nga naluwas ug nagdala sa rehiyon nga mas duol sa malungtarong kalinaw.(melbmadera)