Ang mga first-time jobseekers sa Malaybalay City mahimong makakuha og libre nga mga dokumento gikan sa mga ahensya sa gobyerno nga kasagarang gikinahanglan sa aplikasyon sa trabaho, apan limitado kini sa ilang unang higayon sa pagpangita og employment

Sumala sa press release sa City Government of Malaybalay, nahitabo kini human gipirmahan ug giaprobahan ni Mayor Jay Warren R. Pabillaran niadtong Marso 3, 2026, ang Ordinance No. 1075, Series of 2026, nga nag-adopt ug nagpatuman sa Republic Act No. 11261.

Gilauman nga pinaagi niini, mas mapadali ug mapagaan ang proseso sa pagpangita og trabaho sa mga first-time jobseekers sa syudad.

Ang ordinansa giaprobahan sa 26th Regular Session sa konseho niadtong Enero 13, 2026, diin giduso ni Zoltan Dindo D. Dinlayan ang pag-apruba sa balaod.

Tumong sa ordinansa nga mapalambo ang serbisyo sa gobyerno ug matabangan ang mga aplikante sa trabaho, ilabi na ang kabatan-onan ug mga bag-ong graduate, aron dili na sila maglisod sa pagbayad sa mga dokumentong kinahanglanon sa pag-apply.

Gipatin-aw usab sa ordinansa ang mga termino ug kondisyon nga sundon aron makapahimulos ang mga aplikante sa maong benepisyo. (melbmadera)