Gipangandaman sa Pangagamhanang Probinsyal sa Bukidnon, pinaagi sa Provincial Task Force on Petroleum/Energy Resiliency (PTF-PER), ang posibleng epekto sa umaabot nga El Niño o hulaw, ilabina sa sektor sa agrikultura ug sa kakulang sa suplay sa tubig

Sa ikatulong regular nga miting sa PTF-PER nga gipahigayon sa PAgrO Training Center sa Kapitolyo, gibutyag sa PAGASA Malaybalay City nga ang El Niño-Southern Oscillation (ENSO) anaa pa sa neutral nga kahimtang, apan adunay 55 porsyento nga posibilidad nga motungha ang El Niño sa mosunod nga unom ka bulan ug mahimong mosaka ngadto sa El Niño Alert, nga adunay 75 porsyento nga tsansa sa sulod sa duha ka bulan.

Giawhag usab ang katawhan sa responsableng paggamit sa tubig, human nagpasidaan ang mga water district managers sa nagkagamay nga suplay tungod sa pagkahubas sa mga tinubdan niini.(pr)