Duha ka drayber sa motorsiklo ang namatay human magbanggaay ang ilang gimanehong mga
motorsiklo sa Barangay Puntian, Quezon, Bukidnon, alas-7 sa buntag niadtong Oktubre 22,
2026.

Base sa report sa Quezon Municipal Police Station (MPS), ang aksidente naglambigit sa isa ka
Keeway nga motorsiklo nga padulong sa Davao City gikan sa Cagayan de Oro City ug usa ka
Suzuki Smash 110 nga nagbiyahe sa kasukwahi nga direksiyon.

Sumala sa mga testigong nakakita sa hitabo, ang Suzuki Smash 110 giingong misulod sa linya sa
Keeway, hinungdan sa direktang banggaay sa duha ka motorsiklo. Apan, padayon pang
giimbestigahan sa kapulisan ang eksaktong mga sirkumstansiya ug hinungdan sa aksidente.
Ang drayber sa Keeway, isa ka 51-anyos nga lalaki nga residente sa Davao City, ug ang iyang
43-anyos nga babayeng angkas gidala sa Bukidnon Provincial Hospital sa Maramag alang sa
medikal nga pagtambal.
Apan, gideklarang dead on arrival sa doktor ang drayber. Ang iyang angkas, nga nakapabiling
nakamata human sa banggaay, gitambalan tungod sa iyang mga samad.
Samtang, ang drayber sa Suzuki Smash 110, isa ka 29-anyos nga lalaki nga residente sa
Lumbayao, Valencia City, Bukidnon, gidala sa Quezon Rural Health Unit Infirmary, diin
gideklarar usab siyang dead on arrival.
Matod sa Quezon MPS, ang ilang mga personnel miresponde sa lugar human makadawat og
tawag gikan sa isa ka hingtungdanong residente sa Barangay Puntian nga nagtaho sa aksidente.
Sa pag-abot sa mga pulis, nakabalhin na sa ilang orihinal nga mga puwesto ang duha ka
motorsiklo.
Gidala dayon ang mga motorsiklo sa Quezon MPS alang sa hustong disposisyon samtang
nagpadayon ang imbestigasyon aron matino ang eksaktong hinungdan sa banggaay.
Ang report gipahibalo ni Police Lt. Col Erwin R. Naelga, hepe sa Quezon MPS, ngadto sa
kapulisan sa Bukidnon Provincial Police Office (BPPO). (melbmadera)