Sunday, December 22, 2024

Author: Diego M. Hidalgo

Mga mag-uuma sa FFS gibansay

Posted on by Diego M. Hidalgo

Gibansay sa Provincial Agriculture Office (PAgrO) ang 30 ka mag-uuma sa Farmers Field School (FFS) kabahin sa Irrigated Lowland Rice Production

Matod sa kasayoran, pagabansayon ang mga partisipante sulod sa 16 ka semana sa matag
adlawng Myerkules.

Ang kalihokan una nang gisugdan niadtong Oktobre 10, 2023 didto sa Barangay Kalabugao,
Impasug-ong, Bukidnon.

Sa ika-13 nga session niadtong Enero 10, 2024, gihisgutan ang kabahin sa Palay Check System Key Check 7, no significant yield loss tungod sa peste ug sakit, hands-on nga pagbuhat sa concoction o organic nga abono ug insecticides.

Lakip sab nila nga gitun-an ang kabahin sa pagdumala sa pagpalambo sa humay. (Diego M. Hidalgo)

2 MWP sa Bukidnon nakorner

Posted on by Diego M. Hidalgo

Nakorner sa kapolisan ang Top 4 ug Top 6 most wanted persons sa Bukidnon sa managlahi nga law enforcement operations

Matod sa report sa kapolisan, niadtong Enero 5, 2024, nasikop sa kapolisan sa Manolo Fortich Municipal Police Station (MFMPS) si Fernando Cabandog y Casas, 56 anyos.

Si Cabandog ang Top 4 MWP sa Bukidnon ug Top 3 sa Municipal level.

Nakorner siya sa Zone 7, Sitio Awol, Brgy. Lunocan, Manolo Fortich sa tulo ka ihap sa kasong Qualified Rape.

Sa laing bahin, niadtong Enero 7, 2024, nasikop ang 28-anyos nga babayeng pinangita sa balaod nga si Lovely Bation Sabuero sa Sitio Bagong Silang, Brgy. Sta Inez, Malitbog, Bukidnon

Ang nakorner nga Top 6 most wanted person sa probinsya, nag-atubang sa kaso nga adunay kalabotan sa druga. (Diego M. Hidalgo)

Lalaki gitigbas sa pag-umangkon sa Quezon

Posted on by Diego M. Hidalgo

Isa ka 58-anyos nga lalaki ang gitigbas sa iyang kainom nga pag-umangkon sulod sa payag sa Purok 6, Brgy. San Roque, Quezon, Bukidnon gabii sa Enero 7, 2024

Sumala sa report sa Quezon Municipal Police Station (QMPS), ang suspek isa ka 42-anyos nga lalaki kinsa residente ra sab sa dapit.

Ang suspek boluntaryong mitahan sa tanod sa barangay.

Pagkahuman, ang suspek ang gitugyan sab ngadto sa buhatan sa kapolisan lakip ang lampas nga gigamit sa krimen.

Sa inisyal nga imbestigasyon, nasayran nga sa wala pa ang insidente, nag-inom ang biktima ug ang suspek sa barongbarong nga nahimutang sa dapit.

Giingon nga human nila mahurot ang botelya sa rum, nag-init ang ilang panaglalis tungod sa kahubog.

Sa wala madugay gitigbas sa suspek ang biktima makaduha ka higayon nga naigo sa nawong ug duha ka mga kamot.

Human sa krimen, midagan palayo ang suspek ug boluntaryong mitahan sa Barangay Tanod, ug gitugyan sab ang gigamit sa krimen.

Ang suspek anaa na karon sa kustodiya sa Quezon MPS alang sa tukmang disposasyon samtang ang biktima gidala sa Quezon Health Center Infirmary aron matambalan. (Diego M. Hidalgo)

75-anyos nga babaye nadasmagan og sakyanan sa Valencia

Posted on by Diego M. Hidalgo

Isa ka 75-anyos nga pedestrian ang nadasmagan sa Suzuki utility vehicle sa National Road, Purok 8, Brgy. Bagontaas, Valencia City, Bukidnon gabii sa Disyembre 30, 2023. Sumala sa report sa Valencia City Police Station, ang sakyanan nagdagan gikan sa Valencia City paingon sa Malaybalay

Sa pag-abot sa dapit nga nahitaboan, aksidenteng nabanggaan niini ang nahisgutang pedestrian kinsa milabang sa maong karsada gikan sa subangan paingon sa kasadpang direksyon.

Naangol ang biktima ug gidala sa Adventist Medical Center, Valencia City, Bukidnon apan gideklarar sa nag-atiman nga mananambal nga patay na sa wala pa mahiabot.

Nakita ang mga kadaot sa atubangan nga bahin, windshield ug accessories sa sakyanan.

Dugang pa, temporaryo nga gikustodiya sa Valencia CPS ang sakyanan uban sa 41-anyos nga lalaking drayber alang sa tukmang disposisyon. (Diego M. Hidalgo)

Estudyante nasamdan sa firecracker sa Maramag

Posted on by Diego M. Hidalgo

Nasamad ang walang ring finger sa isa ka estudyante human mibuto ang whistle bomb nga gisulod sa lata hapon sa Disyembre 30, 2023

Sumala sa report sa Maramag Municipal Police Station, ang biktima isa ka 21-anyos nga lalaki ug anaa na sa stable nga condition.

Matod sa biktima, siya ug ang iyang mga higala nagduwa og pabuto (whistle bomb) sa Purok 3, Brgy. Camp 1, Maramag, Bukidnon.

Iyang gidagkutan ang isa sa mga whistle bomb ug gibutang kini sa isa ka lata. Ug sa dihang nibuto, nabuak ang lata ug naigo sa iyang walang kamot nga nakaingon sa pagkaangol. (Diego M. Hidalgo)

Mga napatay nga NPA sa Malaybalay gilubong na

Posted on by Diego M. Hidalgo

Gilubong na sa Malaybalay City Cemetery sa Sityo Gabunan, Brgy. Casisang ang pito ka mga myembro sa New People’s Army (NPA) buntag sa Disyembre 29, 2023

Ang pito mao sila si Bebot Sulinay, Louie Bada, Penita Singaman, magtiayong NPA Leader nga sila si Alfredo Banawan ug Beverly Sinunda, ilang anak nga si Angely Banawan ug isa ka Analyn.

Sila lakip sa napulo ka mga NPA nga napatay sa militar sa hilit nga bahin sa Sitio Kiito, Brgy. Can-ayan, Malaybalay City kaniadtong Disyembre 25, 2023.

Mahinumduman nga ang militar migamit sa ilang bag-ong napalit nga mga asset sa ilang operasyon batok sa maong grupo kinsa giingon nga nangandam alang sa anibersaryo sa Communist Party of the Philippines (CPP) sa Disyembre 26, 2023. (Diego M. Hidalgo)

Lalaki gipusil sa Don Carlos

Posted on by Diego M. Hidalgo

Isa ka lalaki ang gipusil patay sa Purok 8, Brgy. Calaocalao, Don Carlos, Bukidnon gabii
sa Disyembre 27

Sumala sa report sa kapolisan sa Don Carlos, ang biktima gipusil patay samtang naglingkod sa
ilang balcony.

Ang biktima nakaangkon sa grabing mga samad pinusilan sa lawas hinungdan sa iyang
hinanaling kamatayon.

Saysay sa higala sa biktima, nga samtang nag-estoryahanay sila, isa ka wala mailhing lalaki nga
nagsuot og jacket nga adunay hood, ang misulod sa pinuy-anan sa biktima ug girakrakan kini.

Ang wala mailhing lalaki nga suspek daling misibat human sa insidente.

Narekober sa crime scene ang 20 ka baseyo sa bala sa Armalite rifle ug isa ka kapsola sa
bala sa kalibre .45 pistola.

Padayon pa ang imbestigayon sa kapolisan aron pag-ila sa suspek ug pagsuta sa motibo sa
krimen. (Diego M. Hidalgo)

Gidudahang shabu nasakmit gikan sa minor de edad sa Kalilangan

Posted on by Diego M. Hidalgo

Nasakmit sa hiniusang puwersa sa kapolisan ang mga pakete sa gidudahang shabu gikan sa posisyon sa isa ka menor de edad sa buy bust operation sa Munisipyo sa Kalilangan

Nasayran kini gikan sa report sa hepe sa Kalilangan Municipal Police Station nga si Police Major
Christian Serdeña.

Matod pa, ang nasakmit nga gidudahang shabu mitimbang sa 58 gramos.

Kini adunay estimated standard drug price nga P394,400.

Nakuha kini sa hiniusang puwersa sa kapolisan sa buy bust operation nga gipahigayon sa Purok
1, Brgy. West Poblacion, Kalilangan, Bukidnon udto sa Disyembre 13, 2023.

Gihikay na sa kapolisan ang kaso batok sa suspek. Kini kalabot sa kalapasan sa Section 5 ug 11,
Article II sa RA 9165 kon Comprehensive Dangerous Drugs Act of 2002. (Diego M. Hidalgo)

Pamilya gipamusil sa Maramag

Posted on by Diego M. Hidalgo

Samdan ang isa ka amahan ug ang iyang anak samtang walay tatsa ang asawa niini human gipamusil samtang sakay sa ilang motorsiklo sa Sayre highway, Km. 6, Base Camp, Maramag,
Bukidnon

Si Police Major Erwin Naelga, OIC sa Maramag Municipal Police Station (MMPS), miingon sa
iyang report nga ang insidente nahitabo pasado 8:30 sa gabii sa Disyembre 13, 2023.

Ang 52-anyos nga amahan nakaangkon sa samad pinusilan sa ubos nga bahin sa likod ug walang
abaga.

Samtang ang 30 anyos nga anak niini ang samdan sa walang bukton ug walang abaga.
Ang duha ka samarong biktima nagpaalim na karon sa Bukidnon Provincial Hospital (BPH),
Maramag, Bukidnon.

Sa imbestigasyon nasayran nga gikan sa ilang pinuy-anan ang mga biktima paingon sa Maramag
sakay sa ilang motorsiklo nga gimaneho sa anak.

Ang inahan naglingkod sa tunga, samtang ang amahan naglingkod sa luyo nga bahin sa
motorsiklo.

Sa pag-abot sa nahisgutang lugar, gipusil sila sa luyo sa makadaghang higayon sa wala mailhing
suspek nga sakay sa motorsiklo nga nagbiyahe sa samang direksyon.

Ang mga biktima nangabangga sa daplin sa dalan. Ang mga suspetsado mihunong ug nangita sa
mga biktima, apan nakatago kini sa kasagbutan nga bahin. Ug sa dihang wala na sila makit-i sa
mga suspek dali silang miikyas palayo sa dapit.

Ang kapolisan sa Maramag padayon pa sa ilang imbestigasyon aron masayran ang motibo ug
maila ang mga suspek sa krimen. (Diego M. Hidalgo)

Lalaki nalumos sa Pangantucan

Posted on by Diego M. Hidalgo

Isa ka 25-anyos nga lalaki ang gikatahong nalumos sa eight feet deep pool sa Ambrocia Waters Resort, Sitio Lumagwas, Adtuyon, Pangantucan, Bukidnon

Sumala sa taho sa kapolisan, isa ka babaye ang mireport sa buhatan sa Pangantucan Municipal Police Station (PMPS) kabahin sa hitabo pasado alas 7:00 ang takna sa gabii niadtong Disyembre 25.

Gisaysay niini nga ang iyang igsoon nga lalaki nalumos sa swimming pool sa maong dapit.

Giingong mga alas 4:30 sa hapon sa samang petsa, ang biktima kinsa ubos sa impluwensya sa ilimnong makahubog, ang mibiya sa grupo nga nag-inusara aron maligo.

Sumala pa, mga alas 5:00 sa hapon ang biktima nakit-an ni alyas nga naglutaw sa walo ka tiil ang gilawmon nga pool.

Ang biktima daling gidala sa Pangantucan Medical Hospital apan gideklarar sa nag-atiman nga doktor nga dead on arrival. (Diego M. Hidalgo)