Friday, May 17, 2024

Author: Diego M. Hidalgo

Validation sa housing projects gisugdan

Posted on by Diego M. Hidalgo

Gisugdan na sa Provincial Government of Bukidnon (PGB) ang pag-validate sa housing projects niadtong October 18

Base sa pahibalo sa PGB, ang validation gisugdan sa Natid-asan housing project, Casisang, Malaybalay City.

Gitaho nga magpadayon kini hangtod nga malibot ang tanang housing projects sa lalawigan.

Tumong sa gipahigayon nga validation nga masuta ang actual occupants ug pag-update sa binulan nga bayranan.

Ang validation team gilangkuban sa mga opisina sa PGB, ang PGO-Real Estate and Housing Development Division (REHDD), PGO- Public Affairs Information and Assistance (PAIA), Provincial Legal Office, Provincial Assessor’s Office, PGO-Civil Security Unit ug Provincial Engineer’s Office. (Diego M. Hidalgo)

Kapin 2K ka seedling gi-apod-apod sa PGB

Posted on by Diego M. Hidalgo

Gi-apod-apod sa Provincial Government of Bukidnon (PGB) ang 2K ka almond ug tanguile seedlings niadtong Oktubre 14, 2023

Base sa pahibalo sa PGB, ang pagpang-apod-apod nahigayon pinaagi sa Bukidnon Environment and Natural Resources (BENRO).

Ang seedlings gi-apod-apod ngadto sa Local Government Units sa lalawigan ug mga katolikong simbahan.

Ang aktibidad gipahigayon alayon sa Fr. Neri Satur Day tree planting activities.

Ubos sa Ordinance No. 2004-06R, gideklara ang Oktubre 14 matag tuig isip Fr. Neri Satur Day sa probinsya sa Bukidnon.

Nahipatik niini ang paglusad sa tree planting activities ug religious rites o mga seremonya sa paghandom sa kamatayon ni Fr. Satur. (Diego M. Hidalgo)

Pito ka tribu sa Bukidnon, naghiusa

Posted on by Diego M. Hidalgo

Naghiusa ang pito ka tribu sa probinsya sa Bukidnon alang sa kalihukan nga ilang gitawag og “Lambaga”

Base sa pahibalo sa LGU Bukidnon, ang Lambaga isa ka panagtagbo sa tanang tribu sa tumong nga isaulog ang pagpasalamat sa lugar sa probinsya.

Ang kalihukan gipahigayon atoll sa pagbukas sa Indigenous Peoples’ Month Celebration ning bulan sa Oktobre nga nagdala sa tema: “Sustainable Development through Strengthening Customs and Traditions of IP Communities”.

Gipahigayon kini niadtong Oktubre 2, 2023 sa Tulugan Building sa Kaamulan Park ning dakbayan sa Malaybalay.

Ang Lambaga isa ka pagpalig-on sa gilantaw nga kalinaw diha sa pagtuman sa mga lagda sa batasan uban sa kinaiyahan nga naplastar diha sa Republic Act No. 8371 o Indigenous Peoples’ Rights Act kon IPRA Law of 1997.

Agig pagsaulog sa IP Month, ang kalihukan nakatutok sa bug-os nga pag-ampo ug pagpasalamat sa Magbabaya, nga gitambungan sa mga tribal elders, mga datu ug bae sa tribung Talaandig, Umayamnon, Matigsalug, Higaonon, Tigwahanon, Bukidnon ug Manobo. (Diego M. Hidalgo)

Social pension sa mga senior citizens gi-apud-apud sa Malaybalay

Posted on by Diego M. Hidalgo

Gipang-apud-apud sa Department of Social Welfare and Development (DSWD) ang Social Pension para sa mga kabus nga Senior Citizens nga nag edad ug 65 anyos pataas

Sumala sa pahibalo sa City Government of Malaybalay, mikabat sa 3,252 nga mga kabus, masakiton, ug mga walay supporta gikan sa ilang Pamilya nga mga Senior Citizens ang nakadawat sa pension.

Gidawat nila ang ilang ikaduhang semestral nga Social Pension nga nagkantidad og Php3,000.00.

Ang pag-pang-apod-apod unang gihimo sa Poblacion Cluster niadtong Agosto 15, sunod sa Upper Pulangi Cluster niadtong Agosto 16, ug ang ulahi sa Basakan Cluster niadtong Agosto 17. (Diego M. Hidalgo)

LGU Malaybalay misalmot sa National Invitational Rodeo event

Posted on by Diego M. Hidalgo

Ang lokal nga pangagamhanan sa Malaybalay misalmot sa gipahigayon nga Annual National Invitational Rodeo Event didto sa Impasug-ong, Bukidnon niadtong Septyembre 9-10, 2023

Base sa pahibalo sa LGU Malaybalay, ang maong rodeo gipahigayon sab alayon sa kasaulogan sa Araw Ng Impasug-ong.

Ang misalmot nga Malaybalay Rodeo Team gilangkuban sa mga kawani sa City Veterinary Office, City Disaster Risk Reduction and Management Office (CDRRMO) ug City General Service Office (CGSO).

Ang kalihukan nagsilbing pamaagi sa pag promote sa Agro-Industrial nga sektor ingon man pagdasig sa pagpabalik sa traditional livestock farming.

Napiling Rodeo Queen si Ms. Jean Rose Salatan nga gikan sa City Proesutors Office ingon man naangkon sa team ang kampyonato sa event nga Calf Undecorating. (Diego M. Hidalgo)

Livelihood gi-turnover ngadto sa Weavers’ Association sa Malaybalay

Posted on by Diego M. Hidalgo

Ang Sunflower Weavers’ Association sa Barangay Manalog ning dakbayan sa Malaybalay nakadawat sa mga materyales alang sa Abaca Weaving Project

Base sa pahibalo sa City Government of Malaybalay, ang seremonya nahigayon uban sa pakig-koordinasyon sa LGU Malaybalay pinaagi sa Public Employment Service Office (PESO).

Gitaho nga ang gi-turnover nga mga materyales sa Department of Labor and Employment (DOLE) mikantidad og Php300,000.00.

Ang maong kalihukan gitambongan ni City Administrator ug PESO Manager Atty. Anna Marie R. Bergado, Jomel Capoy – First United Puntian Farmers Association (FIPUFA) President, Jan Niño Pabillaran – City Agriculture Extension Officer, ug mga miyembro sa Sunflower Weavers’ Association.

Ang proyekto gitunol ngadto sa mga miyembro sa asosasyon sa tinguha nga makapadayon sila sa paghabi ug pagtahi aron makabuhat og daghang mga produkto alang sa ilang panginabuhian. (Diego M. Hidalgo)

PVO Bukidnon, muhatag og libreng Animal Health Services

Posted on by Diego M. Hidalgo

Ang Provincial Veterinary Office (PVO) sa Bukidnon muhatag og libreng Animal Health Services karong bulan sa Setyembre

Base sa pahibalo sa PVO Bukidnon, sila maghatag sa libreng Animal Health Services sama sa; Rabies Vaccination, Deworming, vitamin supplementation ug consultation sa mga binuhing hayop.

Ang buhatan mi-partisipar sa ipahigayon nga Outreach Program sa Provincial Government of Bukidnon subay sa pagsaulog sa ika-123 nga Philippine Civil Service Anniversary.

Gawas niadtong petsa 13, ang programa ipahigayon sab karong petsa 20 ug 27 ning bulan.

Ipahigayon kini sa Centennial Stage, sa Capitol Grounds, sa Malaybalay City ug mag-sugod sa alas 9:00 sa buntag. (Diego M. Hidalgo)

Ritwal sa pangampo sa IPMR, gipahigayon

Posted on by Diego M. Hidalgo

Gipahigayon ang isa ka ritwal sa pangampo alang sa bag-ong napili nga Provincial Indigenous Peoples Mandatory Representative (IPMR) niadtong Agosto 30, 2023

Base sa pahibalo sa Provincial Government of Bukidnon, ang ritwal gipahigayon sa opisina sa IPMR sa National ug Provincial Government Offices Building ning dakbayan.

Ang maong ritwal gipahigayon pinaagi ni Atty. Arbie “Bagani” Saway Llesis.

Gipanalangin ang maayong pagdumala sa bag-ong IPMR nga dili mapasagdan ang iyang katungdanan sa kinatibok-ang IP sa lalawigan, ug ilikay ang tibook probinsya sa Bukidnon sa gyera ug sa tanang katalagman.

Ang ritwal sa pangampo gipangunahan ni Bae Adelina “Inatlawan” Tarino sa tribung Bukidnon, uban sa mga City/Municipal IPMRs ning probinsya ug mga personahe sa PGO-Indigenous Affairs Division. (Diego M. Hidalgo)

120 jobseekers, hired on the spot sa Job Fair sa Malaybalay

Posted on by Diego M. Hidalgo

Kinatibuk-ang 120 ka jobseekers ang na ‘Hired on the Spot” sa napahigayon nga Local ug Overseas Job Fair sa Malaybalay niadtong Sept. 04, 2023

Base sa pahibalo sa City Government sa Malaybalay, malampusong napahigayon ang job fair uban sa kooperasyon sa Department of Labor and Employment (DOLE) Bukidnon.

Ang Local ug Overseas Job Fair gipahigayon sa People’s Hall, New City Hall, sa Casisang, ning dakbayan.

Labaw sa 20 ka lokal nga mga kompanya ug lima ka mga overseas nga ahensya, ang naghatag og oportunidad nga adunay kapin 3,000 ka mga bakanteng trabaho.

Gitaho nga adunay 440 ka mga jobseekers ang nagparehistro sa kalihokan. (Diego M. Hidalgo)

Pay-out alang sa SPES, WAP benepisyaryo gi-apod-apod

Posted on by Diego M. Hidalgo

Gipang-apod-apod sa LGU Malaybalay ang pay out sa mga benepisyaryo sa Special Program for Employment of Students (SPES) ug sa Work Appreciation Program (WAP)

Matod sa LGU Malaybalay, gipahigayon ang pay out niadtong Agosto 24, 2023 didto sa Barangay 6 Covered Court sa Malaybalay City.

Napahigayon ang maong pang-apod-apod pinaagi sa Public Employment Service Office (PESO).

Adunay 169 ka estudyante nga benepisyaryo sa SPES, samtang adunay 145 ka benepisyaryo sa WAP.

Ang mga nakabenepisyo sa SPES nakadawat ug 60% sa ilang suweldo alang sa pagtrabaho sulod sa 20 ka adlaw. Sila nakadawat sa P6,827.00 matag isa, ug ang nahabilin nga 40% itugyan kanila sa mga mosunod nga semana.

Ang mga benepisyaryo sa WAP nakadawat sa ilang tibuok sweldo alang sa pagtrabaho sulod sa 10 ka adlaw. Ang matag benepisyaryo nakadawat og P4,267.00. (Diego M. Hidalgo)