Sunday, February 23, 2025

Author: Diego M. Hidalgo

Gidudahang shabu nasakmit gikan sa minor de edad sa Kalilangan

Posted on by Diego M. Hidalgo

Nasakmit sa hiniusang puwersa sa kapolisan ang mga pakete sa gidudahang shabu gikan sa
posisyon sa isa ka menor de edad sa buy bust operation sa Munisipyo sa Kalilangan

Nasayran kini gikan sa report sa hepe sa Kalilangan Municipal Police Station nga si Police Major
Christian Serdeña.

Matod pa, ang nasakmit nga gidudahang shabu mitimbang sa 58 gramos.

Kini adunay estimated standard drug price nga P394,400.

Nakuha kini sa hiniusang puwersa sa kapolisan sa buy bust operation nga gipahigayon sa Purok
1, Brgy. West Poblacion, Kalilangan, Bukidnon udto sa Disyembre 13, 2023.

Gihikay na sa kapolisan ang kaso batok sa suspek. Kini kalabot sa kalapasan sa Section 5 ug 11, Article II sa RA 9165 kon Comprehensive Dangerous Drugs Act of 2002. (Diego M. Hidalgo)

Lalaki patay sa heat stroke sa Sumilao

Posted on by Diego M. Hidalgo

Isa ka lalaki ang giingon nga nakasinati og heat stroke ug nakitang patay sa Munisipyo sa Sumilao

Napalgan ang patay’ng lawas sa biktima sa canal sa Lapayan Pineapple Plantation, Purok 1, Brgy. San Vicente.

Si Police Major Larry Enciso, acting chief of police sa Sumilao Municipal Police Station miingon sa iyang report nga napalgan ang patay’ng lawas sa biktima pasado alas 6:30pm sa Disyembre 10,2023.

Nasuta nga ang biktima isa ka 60 anyos nga residente ra sab sa maong dapit.

Giingon nga ang biktima nagbaklay pauli sa iyang panimalay gikan sa iyang uma sa dihang na heat stroke ug natumba sa kanal hinungdan sa iyang hinanaling kamatayon.

Mismong ang pag-umangkon sa biktima ang nakadiskubri sa gidangatan sa biktima.

Dugang pa nga walay nakitang timailhan sa foul play. (Diego M. Hidalgo)

Pipila ka business stalls sa Valencia nasunog

Posted on by Diego M. Hidalgo

Isa ka sunog ang miabo sa pipila ka business stalls sa Purok 6, Bagontaas, Valencia City, Bukidnon buntag sa Disyembre 2

Sumala sa report sa kapolisan sa Valencia, ang mga mga stalls iya ni Jose Joven Go.
Base sa inisyal nga imbestigasyon sa duty investigator sa kapolisan ug arson investigator sa dakbayan ug Bureau of Fire Protection (BFP) Valencia, ang sunog nagsugod sa Gemma Letchon Manok stall.
Ang kalayo mikaylap ngadto sa Sari-sari store, 5G Food Express, Glamour Litson, Angel Agrivet Suppiles ug Totchemor Eatery.
Giingon nga nagsugod ang kalayo pasado alas 7:50 sa buntag ug nadeklarar sa BFP ang fire out pasado alas 8:07 am.
Walay namatay o nasamdan sa hitabo apan ang damyos gibanabana nga moabot ngadto sa Php450,000. (Diego M. Hidalgo)

Pagpamusil natala sa Malaybalay

Posted on by Diego M. Hidalgo

Isa ka lalaking 18-anyos ang gipusil patay didto sa Diversion Road, Brgy. Kalasungay, Malaybalay City

Sumala sa report sa kapolisan, ang insidente nahitabo pasado alas 8:35 sa gabii niadtong Nobyembre 28.

Ang biktima nakaangkon sa grabing duha ka samad pinusilan sa taas nga bahin sa walang likod.

Gidala siya sa Bukidnon Provincial Medical Center sa Malaybalay apan gideklarang patay na wala pa mahiabot.

Giingon nga ang biktima nagmaneho sa motorsiklo sakay ang duha ka mga pasahero padulong sa Sityo Damitan, Brgy. Dalwangan sa dakbayan.

Matod sa imbestigasyon sa kapolisan, ni-overtake ang laing motorsiklo sakay ang duha ka mga tawo. Gipahunong sila sa mga suspek nga armado sa hand gun apan wala kini paminawa sa biktima. Sa kalit gipusil ang biktima makaduha ka higayon ug nabalintong ang motorsiklo nga ilang gisakyan.

Padayon pa ang imbestiagsyon sa kapolisan sa Malaybalay aron pagsuta sa motibo sa krimen ug pag-ila sa misibat nga mga suspek. (Diego M. Hidalgo)

Bukidnon mu-host sa Bagong Pilipinas Serbisyo Fair

Posted on by Diego M. Hidalgo

Ang Bukidnon gikatakdang mu-host sa Bagong Pilipinas Serbisyo Fair (BPSF) sa petsa 11-12 ning bulan sa Nobyembre

Kini base sa kasayuran gikan sa PIA website nga napatik niadtong Oktubre 31, 2023.

Ang opisina ni Bukidnon 2nd District Congressman Atty. Jonathan Keith T. Flores nagpahigayon og coordinating meeting niadtong Oktubre 11 isip pagpangandam sa pag-host sa aktibidad.

Gitaho nga tumong sa BPSF nga maserbisyohan sa gobyerno ang katawhan sa 83 ka mga probinsya sa tibuok nasud.

Kini nga mga serbisyo naglakip sa Kadiwa ng Pangulo, Passport on wheels, ug Driver’s license registration o assistance.

Magtanyag usab og mga serbisyo ang nagkalain-laing ahensya sa gobyerno, sama sa Department of Health, Department of Social Welfare and Development, Philhealth, PagIBIG, Social Security System, ug uban pa.

Matod pa, ang mga serbisyo nga ihatag sa gobyerno walay bayad.

Gi-awhag ni Atty. Flores ang katawhan sa probinsya nga pahimuslan ang duha ka adlaw nga programa. (Diego M. Hidalgo)

Bukidnon 3-year action plan gihisgutan

Posted on by Diego M. Hidalgo

Ang Provincial Nutrition Committee (PNC) sa Bukidnon nagkatigum alang sa isa ka 4-day Local Nutrition Action Plan (LNAP) formulation workshop

Gipahibalo sa LGU Bukinon nga ang workshop gisugdan niadtong Oktubre 17 hangtod petsa 20 ning tuig.

Base sa pahibalo, gipahigayon kini sa The Garden’s Party Venue, Malaybalay City, Bukidnon.

Tumong sa maong workshop nga makamugna ug tulo ka tuig nga plano ug programa alang sa maayong panglawas sa katawhan.

Gilantaw sab niini nga mapakunhod ang kaso sa malnutrition, ilabi na ang taas nga stunting rate sa mga kabataan nga nag edad 0-59 months. (Diego M. Hidalgo)

Validation sa housing projects gisugdan

Posted on by Diego M. Hidalgo

Gisugdan na sa Provincial Government of Bukidnon (PGB) ang pag-validate sa housing projects niadtong October 18

Base sa pahibalo sa PGB, ang validation gisugdan sa Natid-asan housing project, Casisang, Malaybalay City.

Gitaho nga magpadayon kini hangtod nga malibot ang tanang housing projects sa lalawigan.

Tumong sa gipahigayon nga validation nga masuta ang actual occupants ug pag-update sa binulan nga bayranan.

Ang validation team gilangkuban sa mga opisina sa PGB, ang PGO-Real Estate and Housing Development Division (REHDD), PGO- Public Affairs Information and Assistance (PAIA), Provincial Legal Office, Provincial Assessor’s Office, PGO-Civil Security Unit ug Provincial Engineer’s Office. (Diego M. Hidalgo)

Kapin 2K ka seedling gi-apod-apod sa PGB

Posted on by Diego M. Hidalgo

Gi-apod-apod sa Provincial Government of Bukidnon (PGB) ang 2K ka almond ug tanguile seedlings niadtong Oktubre 14, 2023

Base sa pahibalo sa PGB, ang pagpang-apod-apod nahigayon pinaagi sa Bukidnon Environment and Natural Resources (BENRO).

Ang seedlings gi-apod-apod ngadto sa Local Government Units sa lalawigan ug mga katolikong simbahan.

Ang aktibidad gipahigayon alayon sa Fr. Neri Satur Day tree planting activities.

Ubos sa Ordinance No. 2004-06R, gideklara ang Oktubre 14 matag tuig isip Fr. Neri Satur Day sa probinsya sa Bukidnon.

Nahipatik niini ang paglusad sa tree planting activities ug religious rites o mga seremonya sa paghandom sa kamatayon ni Fr. Satur. (Diego M. Hidalgo)

Pito ka tribu sa Bukidnon, naghiusa

Posted on by Diego M. Hidalgo

Naghiusa ang pito ka tribu sa probinsya sa Bukidnon alang sa kalihukan nga ilang gitawag og “Lambaga”

Base sa pahibalo sa LGU Bukidnon, ang Lambaga isa ka panagtagbo sa tanang tribu sa tumong nga isaulog ang pagpasalamat sa lugar sa probinsya.

Ang kalihukan gipahigayon atoll sa pagbukas sa Indigenous Peoples’ Month Celebration ning bulan sa Oktobre nga nagdala sa tema: “Sustainable Development through Strengthening Customs and Traditions of IP Communities”.

Gipahigayon kini niadtong Oktubre 2, 2023 sa Tulugan Building sa Kaamulan Park ning dakbayan sa Malaybalay.

Ang Lambaga isa ka pagpalig-on sa gilantaw nga kalinaw diha sa pagtuman sa mga lagda sa batasan uban sa kinaiyahan nga naplastar diha sa Republic Act No. 8371 o Indigenous Peoples’ Rights Act kon IPRA Law of 1997.

Agig pagsaulog sa IP Month, ang kalihukan nakatutok sa bug-os nga pag-ampo ug pagpasalamat sa Magbabaya, nga gitambungan sa mga tribal elders, mga datu ug bae sa tribung Talaandig, Umayamnon, Matigsalug, Higaonon, Tigwahanon, Bukidnon ug Manobo. (Diego M. Hidalgo)

Social pension sa mga senior citizens gi-apud-apud sa Malaybalay

Posted on by Diego M. Hidalgo

Gipang-apud-apud sa Department of Social Welfare and Development (DSWD) ang Social Pension para sa mga kabus nga Senior Citizens nga nag edad ug 65 anyos pataas

Sumala sa pahibalo sa City Government of Malaybalay, mikabat sa 3,252 nga mga kabus, masakiton, ug mga walay supporta gikan sa ilang Pamilya nga mga Senior Citizens ang nakadawat sa pension.

Gidawat nila ang ilang ikaduhang semestral nga Social Pension nga nagkantidad og Php3,000.00.

Ang pag-pang-apod-apod unang gihimo sa Poblacion Cluster niadtong Agosto 15, sunod sa Upper Pulangi Cluster niadtong Agosto 16, ug ang ulahi sa Basakan Cluster niadtong Agosto 17. (Diego M. Hidalgo)