Thursday, April 03, 2025

Author: Omar Rashid Z. Abdullah

25 migradwar sa CBDRP sa Valencia

Posted on by Omar Rashid Z. Abdullah

Migradwar ang 25 ka mga plea bargain drug responders sa Valencia City human nila makompleto ang unom ka bulan nga Community-Based Drug Rehabilitation Program (CBDRP) sa lokal nga pangagamhanan

Ang City government miingon nga nahigayon ang programa pinaagi sa City Anti-Drug Abuse Council (CADAC) Nobyembre 21, 2023.

Sa gipahigayon nga Commencement Exercises, emosyonal nga gipadangat sa maong ikatulong batch nga mga CBDRP completers ang ilang dakong pasalamat sa mga tigpasiugda ug gapaluyo sa nasangpit nga programa nga gipangunahan ni Acting CADAC Coordinator Giovanni Asis.

Lakip sab nila nga gipasalamatan ang ilang tagsa-tagsa ka mga pamilya nga kanunay gaabag kanila nga makalingkawas sa pagkaulipon sa ilegal nga droga.

Mitambong usab si Assistant City Administrator Rembert Bautista sa seremonya. Iyang gipaabot ang suporta ug pagdasig ni Mayor Azucena Huervas ngadto sa mga migradwar.

Gihagit sab niya ang mga hingtungdan nga mga ahensya sa gobyerno nga padayon makighiusa sa mga inisyatiba ug programa sa lokal nga pangagamhanan alang sa aktibo nga kampanya batok ilegal nga droga.

Namulong usab sa maong aktibidad sila Pastora Joyce Ebisa, Eklessia Bukidnon Spiritual Support Group; Dr. Crysthia Lorcyl Sistoso, RN, MD; Fiscal Melanie Gasendo, City Prosecutor; ug PMAJ Patrick Castro, deputy chief of police. (Omar Rashid Z. Abdullah)

Amahan gidunggab sa Damulog

Posted on by Omar Rashid Z. Abdullah

Isa ka amahan ang gidunggab sa iyang kaugalingong anak sa Barangay Maican, Damulog, Bukidnon

Base sa report sa pulisya, ang insidente nahitabo niadtong Oktubre 29, 2023 sa ala 1:30 sa buntag.

Ang biktima isa ka 48-anyos nga mag-uuma nga residente sa P-4 Maican, Damulog, Bukidnon.

Samtang ang suspek, kinsa anak sa biktima, giila nga isa ka 24-anyos nga watchman sa RNN Construction ug residente sa maong dapit.

Matod sa taho, ang suspek nakig-inom sa mga higala niini sa dihang gipahunong sa pag-inom ug gipapauli kini sa iyang amahan.

Tungod niini, ang suspek nasuko sa iyang amahan ug gisaksak kini gamit ang isa ka 12-inch nga kutsilyo.

Ang suspek naka-angkon og grabe nga samad ug dali kining gidala sa balay tambalanan apan nakabsan na kini sa iyang kinabuhi. (Omar Rashid Z. Abdullah)

PGB mihatod og relief goods sa Valencia

Posted on by Omar Rashid Z. Abdullah

Ang Provincial Government of Bukidnon (PGB) mihatod og relief goods ngadto sa local government unit sa Valencia City

Base sa pahibalo sa PGB, ang relief goods gilangkuban sa 150 ka sako sa bugas, 500 nga karton sa beef loaf, ug 30 ka karton sa sardinas.

Ang relief good gitunol ngadto kang City Social Welfare and Development (CSWD) Officer Yvonne Sapanta niadtong Oktubre 21.

Gipakisayud ni CSWD Officer Sapanta nga walo ka mga barangay sa dakbayan ang naapektuhan human masinati ang kalit nga flash flood niadtong Oktubre 19 sa gabie.

Ang mga barangay nga apektado mao ang Poblacion, San Carlos, Lurugan, Lumbo, Sugod, Batangan, Bagontaas, ug Pinatilan.

Gibutyag nga mikabat sa 2,286 ka mga pamilya ang apektado ug duha ang natala nga casualty. (Omar Rashid Z. Abdullah)

Livelihood gitunol sa Kadingilan, Bukidnon

Posted on by Omar Rashid Z. Abdullah

Isa ka livelihood turnover ceremony ang nahigayon sa Kadingilan, Bukidnon niadtong Setyembre 29, 2023

Ang turnover gipahigayon sa Department of Labor and Employment (DOLE) X – Bukidnon Provincial Field Office (BukPFO) pinaagi sa DOLE Integrated Livelihood Program (DILP).

Sumala sa pahibalo sa DOLE-X BukPFO, adunay 47 ka ginikanan sa child laborers ang nakadawat sa working capital nga mikabat sa Php15,000.00.

Ang livelihood project nagtumong sa pagdugang ug pagsuporta sa kita sa mga benepisyaryo, sa pagpasiugda sa self-employment, ug sa pagpagaan sa negatibong epekto sa nagpadayong pandemya. (Omar Rashid Z. Abdullah)

28 ka mag-uuma sa mais, mi-gradwar sa FFS sa Manolo

Posted on by Omar Rashid Z. Abdullah

Mi-gradwar ang 28 ka mga mag-uuma sa mais ubos Farmers’ Field School (FFS) niadtong Oktubre 4, 2023 sa Manolo Fortich, Bukidnon

Base sa pahibalo sa LGU Manolo Fortich, ang maong programa gipasiugdahan sa Lokal nga Pangagamhanan sa lungsod agi sa Municipal Agriculture Office (MAO) kaabag ang Department of Agriculture Region 10.

Ang Graduation Ceremony gipahigayon sulod sa covered court sa Barangay Minsuro, sa Manolo Fortich.

Tinguha sa maong programa nga madungagan ang kahibalo ug kahanas sa mga mag-uuma sa barangay aron mas mapalambo ang ilang panginabuhian agi sa corn farming. (Omar Rashid Z. Abdullah)

Php50K gidawat sa centenarian sa Valencia

Posted on by Omar Rashid Z. Abdullah

Isa ka babae nga centenarian ang gitunolan sa LGU Valencia og Php50,000.00 niadtong Setyembre 25, 2023

Ang centenarian giila nga si Lola Patricia Pedroza Sanjurjo kinsa residente sa Purok-9, Barangay Batangan, Valencia City.

Sumala sa pahibalo sa LGU Valencia, si Lola Patricia bag-o lamang nagselebrar sa iyang ika-100 nga panuigon niadtong bulan sa Agosto.

Nasayran nga isa sa programa sa LGU Valencia ang paghatag sa nasangpit nga benepisyo alang sa mga centenarian.

Ginapaabot pa usab ang dugang nga benepisyo nga Php100,000.00 nga mahatag gikan sa national government pinaagi sa Department of Social Welfare and Development (DSWD).

Ang Republic Act 10868 o Centenarians Act of 2016 naghatag og pasidungog sa tanang Pilipino nga moabot og 100 anyos, nagpuyo man sa Pilipinas o sa gawas sa nasud isip pag-ila sa ilang taas nga kinabuhi. (Omar Rashid Z. Abdullah)

Visitour.ph app, gilusad sa Bukidnon

Posted on by Omar Rashid Z. Abdullah

Ang online application nga Visitour.ph app gilusad niadtong Setyembre 13, 2023 sa Kaamulan Open Theatre, Malaybalay City, Bukidnon

Base sa pahibalo sa Provincial Government of Bukidnon, uban sa pakigtimbayayong sa PGB,

gipasabot sa mga personahi sa Visitour.ph ang paggamit sa online application niini.

Gipasabot ang app ngadto sa mga tourism officers sa lungsod ug syudad sa probinsya, mga personahi sa Department of Trade and Industry (DTI) Department of Information and Communications Technology (DICT), ug mga tunghaan ug uban pang hingtungdang partisipante.

Ang visitour.ph application ang pinaka-una nga one-stop shop tourism application sa nasud.

Matod pa, isa kini ka all-in one mobile app diin makita sa mga turista ang tanan nga ilang kinahanglan kung magbyahe, gikan sa pagpa-book sa mga tours ug accommodation, pagpangita sa mga promo o local updates, digital payments o remittance, location maps ug uban pa.

Pinaagi sa paglusad sa maong app, gilantaw nga mas mapalambo pa niini ang turismo sa lalawigan. (Omar Rashid Z. Abdullah)

31 corn farmers, mi-gradwar sa FFS sa Bukidnon

Posted on by Omar Rashid Z. Abdullah

Mikabat sa 31 ka mag-uuma sa mais ang mi-gradwar ubos sa Farmers Field School (FFS) niadtong Setyembre 12, 2023 sa Barangay Kisanday, lungsod sa Maramag, Bukidnon

Base sa pahibalo sa LGU Bukidnon, ang maong programa gipasiugdahan sa Provincial Agriculture Office (PAgrO), Municipal Agriculture Office sa lungsod sa Maramag ug Department of Agriculture (DA).

Ang FFS nagtutok sa hybrid yellow corn production, nga gitun-an gikan niadtong Mayo 16 hangtud Setyembre 1, 2023.

Tinguha sa maong programa nga matabangan ang mga mag-uuma nga makakat-on og bag-o ug tukma nga mga teknik ug teknolohiya, aron mapatas-an ang abot sa ilang ani. (Omar Rashid Z. Abdullah)

Konsehal Soria sa Malaybalay, giila sa tribu nga “Datu Makalandag”

Posted on by Omar Rashid Z. Abdullah

Ang Konsehal sa Malaybalay nga si Christopher ‘Tope’ Soria sa Mampaalong Clan sa tribung Bukidnon giila isip “Datu Makalandag”

Base sa taho sa Philippine Information Agency-Bukidnon, pormal nang gidawat sa Konsehal ang katungdanan isip ‘Datu Makalandag’.

Siya gi-bendisyonan sa mga Supreme Datu kon IPMR gikan sa Agusan Del Sur, Agusan Del Norte, Misamis Oriental, Lanao Del Norte, ug Bukidnon.

Kini agi’g pag-suporta sa lumadnong kahilokan aron padayon nga ma-protektahan ang tradisyon ug kultura sa mga IPs.

Ang seremonya gipahigayon sa Casisang, Malaybalay City kaniadtong petsa 8-9 ning bulan sa Setyembre.

Sa maong mga higayon, si Dr. Jade Melendez Mercado Soria giila usab nga si “Bae Nay Makalandag”. (Omar Rashid Z. Abdullah)

Grand Opening sa Malaybalay Market Square, nagmalampuson

Posted on by Omar Rashid Z. Abdullah

Malampuson nga napahigayon sa City Economic Enterprise Development and Management Office (CEEDMO) ang grand opening sa Malaybalay Market Square niadtong Sept. 04, 2023

Base sa report sa Philippine Information Agency-Bukidnon, gipahigayon ang aktibidad sa Multi-purpose Building A sa Malaybalay City Public Market.

Ang ribbon cutting gipangulohan ni Mayor Jay Warren R. Pabillaran ug CEEDMO chief Romeo R. Lapeciros, Jr.

Sa tagline nga “Kalimpyo, Kahapsay, ug Kabibo”, ang CEEDMO Malaybalay nagpadayag sa Market Square nga nag-feauture sa 16 ka local cuisines ug delicacies stalls.

Ang Market Square mag-abli sugod alas 9:00 sa buntag ngadto sa alas 11:00 sa gabie, kada Lunes ngadto Miyerkules. (Omar Rashid Z. Abdullah)