Pormal nga gibuksan sa lokal nga pangagamhanan sa Valencia pinaagi sa Information Technology Services Division (ITSD) ang ICT Month celebration niadtong Hunyo 6, 2023

Sa tema nga “Knowledge Empowerment Reinforcing Networked E-Learning,” sentro sa mensahe ni Director Sittie Rahma V. Alawi, Department of Information and Technology (DICT) Region 10, ang pag-uswag sa sistema sa paghatod og impormasyon, ug edukasyon sama sa e-learning, ingon man ang misyon sa DICT nga pahimuslan ug palamboon ang potensyal sa teknolohiya alang sa ikauswag sa ekonomiya.

Gipaabot usab ni Mayor Azucena Huervas pinaagi ni Roque Rios Jr., Executive Assistant IV, ang iyang suporta sa maong kalihokan ug ang iyang pagdasig sa katawhan nga makiglambigit sa gihan-ay nga mga aktibidad sa ITSD sa pagpangulo ni Erlinda Sandig, Information Technology Officer II, aron mahimong mabungahon ang selebrasyon.

Atol sa maong kalihokan, gipangunahan ni Charmaigne Portal, City Gender and Development (GAD) Focal Person, ang paglunsad sa GAD Website Portal nga magsilbi nga tinubdan sa mga impormasyon mahitungod sa mga kalihokan ug aktibidad sa dakbayan kalabot sa GAD.

Nagmalamposon usab ang pakigpinirmahay sa lokal nga pangagamhanan sa Memorandum of Understanding kauban ang Development Academy of the Philippines ug Memorandum of Agreement tali sa Central Mindanao University alang sa kolaborasyon kalabot sa pag-implementa sa Smarter Philippines Through Data Analytics, R&D, Training and Adoption (SPARTA) ingon man ang pagmugna og mga plano ug mga programa mahitungod sa Research, Development, and Extension (RDE) nga ikalambo sa matag barangay sa dakbayan.

Gipangunahan usab ni Keren Happucha Lacadin, ICT Industry Deputy Focal, Development Bureau-DICT 10, ang pagpaila-ila sa mga miyembro sa Valencia City ICT Council nga maoy magapanday sa mga plano alang sa pagpatuman sa mga ICT programs sa dakbayan.

Nahimo nga mamumulong sa maong programa sila Engineer Josephine Santiago-Bond, Institutional Division Chief, NASA Kennedy Space Center Safety and Mission Assurance, Annalou Zambrano, City Councilor, Atty. Marlowee Selecios, City Legal Officer, Atty. Romuel Roque, PGO Bukidnon Executive Assistant, ug April Geyruss P. Duran, Administrative Aide III, nga mipresentar kay Vice Mayor Atty. Ted Pepito. (City Government of Valencia)