Nakuha sa Public Employment Service Office (PESO) sa Malaybalay City ang Best PESO sa Component City Category sa Bukidnon

Nahitabo kini human nakuha sa dakbayan ang lima ka awards atol sa gipahigayon nga Provincial Year-End Performance Assessment niadtong Nobyembre 29, 2023.
Ang PESO sa Malaybalay City, ubos sa pagdumala ni PESO Manager Atty. Anna Marie Bergado, nakadawat sa maong mga pasidungog isip pagpamatuod sa ilang pag-alagad sa komunidad.
Ang mga pasidungog nga nadawat sa PESO Malaybalay City mao ang:
Best in TUPAD Implementation – kini ang pag-ila sa ilang labing maayo nga pagpahigayon sa Tulong Panghanapbuhay sa Ating Disadvantaged/Displaced Workers (TUPAD) program.
Highest Number of Youth Employed through SPES – nag-ila kini sa ilang labing maayo nga kontribusyon sa pag-employ sa mga kabatan-onan pinaagi sa Special Program for Employment of Students (SPES).
Highest Number of Students Coached through Career Guidance & Employment Coaching Advocacies – timaan kini sa ilang dedikasyon sa paghulma sa kaugmaon sa mga kabatan-unan pinaagi sa paghatag og giya ug coaching ngadto sa mga studyante.
Highest Number of Encoded Registrants in the NSRP-PEIS – nagseguro kini sa ilang maayong pag-rehistro ug pagdumala sa mga nag-aplay sa trabaho pinaagi sa National Skills Registration Program – Public Employment Information System (NSRP-PEIS).
Best Performing PESO – kini isa ka hiniusang pasidungog nga nagapamatuod sa kinatibuk-ang maayo nga performance sa PESO Malaybalay City sa nagkalain-laing bahin sa public employment services.
Ang achievement sa nagkalaing kategoriya mao ang naghatag sa PESO Malaybalay City sa titulo nga Best PESO sa Component City Category sa lalawigan sa Bukidnon.
Kini nga recognition nagapakita sa dedikasyon og commitment sa pagtrabaho sa tibuok pwersa sa PESO Malaybalay City.
Ang PESO sa Malaybalay City sa pagpanguna ni Bergado, nagpasalamat alang sa nadawat nga recognition ug gipasalig ang ilang dedikasyon sa paghatag og maayong serbisyo.
Ang PESO nagpabilin nga andam sa pag-atubang sa mga molabay nga hagit ug ang mga nadawat nga pasidungog magsilbi nga inspirasyon sa pagtabang sa komunidad ug sa paghimo og isa ka mas lig-on ug malamboong pwersa sa pagpangempleyo sa Dakbayan sa Malaybalay.
Ang awarding gipahigayon sa The Garden’s Party Venue sa Malaybalay City.
Gipasiugdahan kini sa Department of Labor and Employment (DOLE) Provincial Field Office sa Bukidnon.
Nagkatapok sab didto ang mga PESO Managers og representante gikan sa 20 ka mga lungsod ug 2 ka siyudad sa lalawigan. (melbmadera)