Wednesday, July 10, 2024

711 TUPAD beneficiaries sa 3 munisipyo gihatagan og sweldo

Mikabat sa 711 ka mga benepisaryo sa Tulong Panghanapbuhay sa Ating Disadvantaged (TUPAD) program gikan sa tulo ka munisipyo sa habagatang bahin sa Bukidnon ang nakadawat na sa ilang suweldo

Gikumpirma kini sa Department of Labor and Employment (DOLE-X) Bukidnon Provincial Field Office (BukPFO) pinaagi sa ilang social media post.

Ang Tupad payout gipahigayon kaniadtong May 23, 2024 sa Damulog, Kitaotao ug Don Carlos, Bukidnon.

Ang kalihokan gipangunahan ni Raul L. Valmores, provincial director sa DOLE Bukidnon.

Kauban niya ang Tupad Focal nga si Reyna Tagailo ug TUPAD Coordinators.

Ang DOLE-X BukPFO nagpagawas og ₱1,014,360.00 nga kantidad sa suweldo sa mga benepisyaryo matag munisipyo.

Ang matag benepisyaryo nakadawat og ₱4,280.00 isip suweldo sa ilang 10 ka adlaw nga trabaho.

Nitambong sa kalihokan sila third district provincial board members Minerva C. Casinabe ug Joseph Palmada, Damulog Mayor Melino Buro, Kitaotao Mayor Edwin Abucayan, Kitaotao Vice Mayor Mary Ann Gawilan Angit, Don Carlos Mayor Ma. Victoria O. Pizzaro, ug si Audrey Tan-Zubiri, asawa ni Senator Migz Zubiri.

Ang TUPAD isa ka community-based package of assistance nga naghatag og emerhensya nga trabaho para sa mga bakwit, kulang sa trabaho ug seasonal nga mga trabahante. (Omar Rashid Z. Abdullah)

IP group sa Kitaotao nakadawat og P5.2-M swine production facility

Ang Department of Agriculture – Regional Field Office 10 (DA-RFO 10) mitugyan sa P5.2-million bio-secured ug climate-controlled swine production facility ngadto sa Sinuda Multi-Indigenous Sectoral Farmers and Workers Association (SIMUSOFAWA) niadtong Mayo 23, 2024 sa Kitaotao, Bukidnon

Sumala sa kasyoran gikan sa DA-RFO 10, tumong niini aron ma-moderno ug mapausbaw ang kapasidad sa lokal nga industriya sa baboy.

Si DA-10 Regional Executive Director Jose Apollo Y. Pacamalan ug Farmer-Director Nilda B. Salas, ang nangulo sa pagtunol sa certificate of turnover ngadto kang SIMUSOFAWA chairperson Datu Domino A. Pangcat nga nagpasabot sa pagbalhin sa pagpanag-iya ug operasyon sa pasilidad.

Ang 2,000-square-meter bio-secured swine facility, nagkantidad og P3,827,241.08.

Kini adunay perimeter fence, opisina, climate-controlled animal housing, biogas waste management system, basic farm equipment, ug shower area.

Kabahin usab sa component ang feeds, hog scale, animal stocks, ug mga tambal ug biologics, sa kinatibuk-an nga P1.451-M.

Sumala sa Livestock focal person nga si Jamaica L. Docdoc, ang proyekto kabahin sa Integrated National Swine Production Initiatives for Recovery and Expansion (INSPIRE) Program sa DA. (Omar Rashid Z. Abdullah)

Mga mag-uuma sa sloping area gitudloan sa sustainable land management

Gitudloan sa Provincial Agriculture Office ang mga mag-uuma sa Bukidnon kansang umahan nahimutang sa slope areas o bakilid nga bahin, pinaagi sa Sustainable Land Management (SLM) Training

Sumala sa kasayoran sa PGB, sa maong pagbansay, ang mga mag-uuma gitudloan sa malungtarong pagdumala sa yuta.

Ang training naglangkub sa agriculture and type of food production, integrated pest management, hinungdan og epekto sa soil pollution, soil erosion ug soil conservation and management.

Tinguha niini aron masuportahan ang pagtubo sa ekonomiya, kaayohan sa katilingban, ug pagpadayon sa kalikopan.

Ang kalihukan gitimbayayongan sa PGO- Provincial Disaster Risk Reduction and Management Division (PDRRMD) alang sa mosunod nga mga dapit.

Ang sa Lantapan gipahigayon niadtong Mayo 7-8, Maramag niadtong Mayo 9-10, Quezon- Mayo sa 14-15, Impasugong sa Mayo 16-17, Sumilao niadtong Mayo 21-23, Manolo Fortich- Mayo sa 23-24, San Fernando sa 28-29, Valencia City sa Mayo 30-31, Kalilangan karong Hunyo 4-5 ug Kadingilan sa Hunyo 6-7, 2024. (Omar Rashid Z. Abdullah)

Pagplastar sa Cultural Monuments sa Kaamulan Park, gisugdan na

Gisugdan na sa Provincial Government sa Bukidnon ang pagmontar sa Cultural Monuments sulod sa Kaamulan Park niadtong Miyerkules

Sumala sa kasayoran sa PGB, ang kalihokan gipangunahan sa Provincial Engineer’s Office.

Gipahigayon ang Panandig Ritual sa Intersection Road sa Brgy. 6 sa Malaybalay City, diin itindog ang monuments.

Ang mga monumento gi-disenyo ni Kublai Millan, isa ka artist sa Lawig-Diwa, kinsa nagsiguro nga safety kini sa kalamidad sama sa linog.

Iplastar sa dapit ang tulo ka major designs nga mao ang shield ug spear, eagle, eagle’s nest.

Ipahimutyang sab sa dapit ang uban pang desinyo nga magrepresenta sa pito ka tribu sa Bukidnon. (Omar Rashid Z. Abdullah)

6 barangay sa Valencia nakadawat og SGLGB award

Unom ka barangay sa dakbayan sa Valencia ang napasidunggan sa Seal of Good Local Governance for Barangay (SGLGB) Award alang sa tuig 2023

Sumala sa social media post sa LGU Valencia, ang seremonya gipahigayon sa Gymnasium sa Brgy. Lumbo kaniadtong Mayo 22, 2024.

Ang mga awardee sa SGLGB mao ang Barangay Barobo, Batangan, Catumbalon, Mailag, Laligan, ug San Isidro.

Gitunol ang maong mga pasidungog sa presensiya nila CLGOO Jan Eric Manasan, City Mayor Azucena Huervas, mga membro sa Sangguniang Panlungsod sa pagpanguna ni Vice Mayor Atty. Ted Pepito ug Liga ng mga Barangay President Louie John Naiz.

Sa maong seremonya, giila usab ang ubang barangay mahitungod sa ilang partisipasyon ug pagsuporta sa SGLGB.

Ang SGLGB isa ka progresibong sistema sa pag-ebalwar sa perpormans ug pagdasig nga mapalambo ang pagserbisyo sa mga kabarangayan sa siyudad. (Diego M. Hidalgo)

One Bukidnon overall champion sa NMRAA 2024

Nahimong overall champion sa gipahigayon nga 2024 Palarong Pampook Northern Mindanao Regional Athletic Association (NMRAA) ang One Bukidnon

Sumala sa kasayoran sa kagamhanag probinsyal sa Bukidnon ang NMRAA gidula niadtong Mayo 9-17, 2024 didto sa munisipyo sa Mambajao, Camiguin Island.

Ang One Bukidnon overall champion sa secondary ug elementary level batok sa contingents gikan sa Cagayan De Oro, Misamis Oriental, Iligan, Lanao Del Norte, Misamis Occidental ug Camiguin.

Sa maong kalihukan mihatag og suporta ang Provincial Government of Bukidnon (PGB), ug nagpadangat kini sa dakong pasalamat sa tanang batan-ong atleta nga midula, dala ang pangalan sa probinsya.

Ang One Bukidnon girepresentahan sa DepEd-Province of Bukidnon, DepEd-Malaybalay City ug DepEd-Valencia City. (Diego M. Hidalgo)

2 centenarians sa Malaybalay nakadawat og incentives

Duha ka centenarian ang nakadawat og tag P100,000.00 nga cash incentives gikan sa City Government sa Malaybalay niadtong Mayo 17, 2024

Sumala sa kasayoran sa LGU Malaybalay, ang duha mao sila Mrs. Yaga Sarino Molhay ug Mrs. Porfita Sario Libanda nga parehong residente sa Brgy. Manalog.

Si Molhay natawo niadtong Mayo 20, 1920, samtang si Libanda natawo niadtong Nobyembre 4, 1921.

Giila sila pinasubay sa Republic Act 10868, the Centenarian Act of 2016, nga nag-ila sa mga Pilipino nga moabot og 100 anyos.

Si City Mayor Jay Warren R. Pabillaran, inubanan sa Barangay Manalog Council sa pagpangulo ni Barangay Chairman Roney Lagunday, 9th Sanguniang Panglungsod, Office of the Senior Citizens Affairs (OSCA) ug City Social Welfare and Development Office (CSWDO) personnel, ang nitunol sa tseke mismo sa panimalay sa mga benepisaryo sa Brgy. Manalog.

Subay sa City Ordinance No. 988, series of 2021, ang Syudad sa Malaybalay mihatag sa matag centenarian og isa ka higayon nga insentibo nga P100,000.00, uban ang cake ug bouquet sa mga bulak.

Sila ang ikaduha ug ikatulo nga centenarian nga nakadawat sa maong mga insentibo gikan sa City Government sukad naaprobahan ang lokal nga ordinansa. (melbmadera)

6 LGUs misumite og SB resolutions sa pagdeklarar sa State of Calamity

Nakasumite ngadto sa PGO-PDRRMD ang unom ka mga LGUs sa Bukidnon sa ilang SB Resolutions nga nagdeklara sa ilang area of responsibility ubos sa state of calamity, gumikan sa nasinati nga taas nga panahon sa ting-init o dry spell

Sumala sa social media page sa provincial government sa Bukidnon, ang unom ka mga munisipyo mao ang Kibawe, Kitaotao, Quezon, Cabanglasan, Pangantucan, ug Impasugong.

Nakasumite usab sa ilang report sa kadaot sa hulaw ang Kadingilan, Damulog ug Valencia City apan wala magdeklara sa state of calamity.

Sa punto sa Valencia, ang City Disaster Risk Reduction Managemernt Council (CDRRMC) nagpalabang og resolution nga nagrekominda sa konseho sa maong dakbayan alang sa deklarasyon sa State of Calamity.

Nasayran ang kasayoran sa report ni Mr. Israel Johan M. Damasco, Jr., head sa PGO-PDRRMD atol sa radio program sa PGB – “ang Kalihukan sa Probinsya” kaniadtong Mayo 17, 2024.

Iyang gibatbat ang Revised Guidelines alang sa Declaration of a State of Calamity sa NDRRMC.

Pipila nini mao nga at least 15 percent sa forecasted affected population basi sa science-based projection nga nanginahanglan sa dinalian nga tabang; at least 30 percent sa nag-unang panginabuhian sa sektor sa agrikultura, negosyo ug industriya ang naapektuhan; lapad nga kadaut sa mga fishpond, pananom, manok ug kahayupan, ug uban pang suplay sa agrikultura; ug uban pa. (Diego M. Hidalgo)

Canada gidayeg sa pagtangtang sa travel ban batok Bukidnon

Gidayeg sa Sangguniang Panlalawigan (SP) ang nasud sa Canada pinaagi sa pagpalabang sa isa ka resolusyon gumikan sa pagtangtang niini sa travel ban ngadto sa iyang katawhan panganhi sa probinsiya sa Bukidnon

Sumala sa kasayoran sa PGB, nalabang ang resolusyon atol sa 88th Regular Session sa SP nga giduso ni SP member Nemesio B. Beltran, Jr.

Niadtong Enero, nalakip ang Bukidnon sa advisory sa Canada diin gidid-an ang ilang lumulopyo sa pagbisita human sa MSU-IIT bombing niadtong Disyembre 3 sa miaging tuig.

Hinuon, niadtong Mayo 3 nga edition sa Philippine Star, namantala nga gitangtang na sa Canada ang mga probinsya sa Misamis Oriental ug Bukidnon sa mga lugar sa Pilipinas nga ginadili ang pagbiyahe sa Canadian citizens.

217 nataptan og Dengue sa Manolo Fortich

Sa kinatibuk-an, sugod Enero ning tuig hangtud May 12, 2024, nitala na sa 217 ang mga nataptan sa sakit nga Dengue sa tibuok munisipyo sa Manolo Fortich

Ug sa isa ka semana lang kon sulod sa Mayo 5-12, 2024, mikabat sa 15 ka indibidwal ang nataptan sa maong sakit nga dala sa lamok sa maong munisipyo.

Sumala sa Dengue Watch sa Manolo Fortich, kini base sa datus gikan sa Philippine Integrated Disease Surveillance and Response sa Department of Health (DOH).

Gumikan niini, ang publiko subling giabisuhan nga kanunay nga mag-igmat ug mutabang sa pagpanghinlo sa palibot arun malikay sa sakit.

Alayon niini giaghat ang tanan nga musunod sa 5S Kontra Dengue gikan sa DOH.

Kini mao ang Search and Destroy Breeding Sites, Seek Early Consultation, Secure Self-Protection, Support Indoor and Outdoor Fogging in High Risk Areas Only ug Sustain Hydration. (melbmadera)