Saturday, January 18, 2025

Tag: AKI

Kalabera sa tawo napalgan sa Kadingilan

Posted on by Diego M. Hidalgo

Nadeskubri ang kalabera sa Sitio Tipokol, Brgy. Cabadiangan, Kadingilan, Bukidnon udto sa Enero 15, 2025

Ang Kadingilan Municipal Police Station gipahibalo sa Kadingilan Municipal Disaster Risk Reduction and Management Office (MDRRMO) kabahin sa nadeskubri.


Sumala sa report sa kapolisan, ang pelvic ug mga bukog sa paa na lang ang nakuha, lakip ang short pants nga gituohang gisuot sa biktima.


Ang asawa sa biktima, sa pagtan-aw sa sapot, gilayon nga gikumpirma nga ang shorts iya sa iyang bana.
Ang biktima naila sa ulahi nga 39-anyos ug residente sa Sitio Tipokol, Brgy. Cabadiangan.


Sa pasiunang imbestigasyon, nasayran nga posibleng nahulog gikan sa pangpang ang biktima, kinsa gidudahang lango sa ilimnong makahubog atol sa hitabo.


Wala’y nakit-an nga timailhan sa foul play, ug ang insidente determinadong isa ka aksidente nga nahitabo sa biktima. (Diego M. Hidalgo)

No. 1 Bukidnon PNP-PDEA watch-listed drug suspect nakorner sa buy-bust

Posted on by Omar Rashid Z. Abdullah

Nakorner sa hiniusang puwersa sa kapolisan ug PDEA ang usa ka high-value individual (HVI), kinsa No. 1 sa watchlist sa PNP-PDEA sa Bukidnon ug Top 7 usab sa Regional level

Ang lalaking nasikop, usa ka 35-anyos, may kapuyo, ug residente sa Purok 6, Barangay Casisang, Malaybalay City, Bukidnon.
Nasignit siya sa Purok 5, Brgy. 9, Malaybalay City, Bukidnon hapon sa Enero 11, 2025.
Nakuha gikan sa iyang posisyon ang gidudahang shabu nga nagkantidad og P272,000.00 ug P500.00 nga bill isip buy-bust money.
Kasong paglapas sa RA 9165 ang giandam batok sa suspek.
Gidala sa Provincial Forensic Unit ang mga nakumpiskang droga alang sa qualitative ug quantitative examinations.
Ang suspek nakorner sa hiniusang puwersa sa Malaybalay CPS, Bukidnon PIU, ug Bukidnon PDEA 10. (Omar Rashid Z. Abdullah)

Babaye gipusil sa Maramag

Posted on by Diego M. Hidalgo

Dideklarang patay na sa wala pa makaabot sa Bukidnon Provincial Hospital (BPH) Maramag ang 46-anyos nga babaye human gipusil sa Purok 8, Brgy. San Miguel, Maramag, Bukidnon hapon sa Enero 10, 2025

Ang babayeng biktima usa ka minyo, mag-uuma, ug residente sa Purok 4, Brgy. San Carlos, Maramag, Bukidnon.


Sumala sa kasayoran sa kapolisan sa Maramag, ang biktima sakay sa multicab pickup-type nga gimaneho sa usa ka lalaki ug uban sa laing babaye.


Ang sakyanan nagdagan gikan sa BUSCO, Quezon, Bukidnon padulong sa Purok 4, Brgy. San Carlos, Maramag, Bukidnon.


Sa ilang pag-abot sa dapit sa nahitaboan, giingong gipusil ang biktima sa duha ka wala mailhing lalaki nga suspek.


Ang biktima nakaangkon og grabing samad tungod sa pinusil sa likod ug gidala kini sa ospital apan patay na sa wala pa makaabot.


Ang mga suspek giingong niikyas human sa krimen sa wala masayri nga direksyon.


Narekober sa lugar sa nahitaboan ang duha ka fired cartridge cases sa kalibre .45 ug sulod sa sakyanan nakaplagan usab ang duha ka bala nga wa pa matinong kalibre.


Ang Maramag MPS nagpadayon sa imbestigasyon aron mailhan ang mga suspek ug masuta ang motibo sa maong insidente. (Diego M. Hidalgo)

AMIA-10 village makabenepisyo sa combine harvester

Posted on by Melchor Madera

Tumong sa pagpausbaw sa lokal nga produksiyon, ang Department of Agriculture – Regional Field Office 10 (DA-RFO 10) nag-turn over sa usa ka combine harvester ngadto sa Bliss Lingion Multipurpose Cooperative (BLMPC)

Sumala sa kasayoran, ang makinarya nagkantidad og Php 2.2 milyones.


Ang seremonya natigayon niadtong Enero 13, 2025 sa Municipal Grounds sa Manolo Fortich, Bukidnon.
Ang agri-intervention gipundohan ubos sa Adaptation and Mitigation Initiative in Agriculture (AMIA) nga programa niini.


Kini nagtumong sa pagsuporta sa mga mag-uuma sa pagsagop sa modernong mga ekipo ug teknolohiya aron mapalambo ang mga hagit sa pagbag-o sa klima.


Sa seremonya sa pagtugyan, si BLMPC chair Dante M. Dosayco nakadawat sa certificate of turnover gikan ni AMIA-10 Project Leader Joel J. Gabo sa presensya sa mga opisyales sa munisipyo nga gipangunahan ni Mayor Rogelio N. Quiño.


Gipaambit ni Dosayco nga ang inisyatiba makapakunhod sa ilang panahon sa pag-ani samtang nagdugang usab sa ilang kita.


Gipaniguro usab sa coop chair nga ilang ma-maximize ang nasangpit nga makinarya dili lang alang sa kaayohan sa mga miyembro niini kondili ipaambit usab sa ilang lokalidad.


Ang Bliss Lingion MPC adunay kinatibuk-ang luna nga 210 ka ektarya uban sa mga mag-uuma niini nga nananom og mais ug kamoteng kahoy ug posibleng pagpalapad sa serbisyo ngadto sa mga dili miyembro. (melbmadera)

Drug suspek, 2 nga nag-pot session nakorner sa Manolo Fortich

Posted on by Diego M. Hidalgo

Isa ka drug suspek ang nakorner sa buy-bust operation ug aktong nasapnan ang duha ka mga kauban niini nga nag-pot session sa Purok Upper Pol-oton, Brgy. Tankulan, Manolo Fortich, Bukidnon, buntag sa Enero 6, 2025

Sumala sa report sa kapolisan, ang unang suspek nga nasikop nisulay pa sa pagsibat apan nasugpo ra sa kapolisan.


Pagkahuman niini, nadiskubrehan sa kapolisan sulod sa establishment ang duha ka mga kauban sa suspek nga nag-pot session.


Nasakmit sa kapolisan ang Php 16,932.00 nga kantidad sa gidudahang shabu lakip ang drug paraphernalia gikan sa mga suspek.


Kasong paglapas sa RA 9165, o Comprehensive Dangerous Drugs Act of 2002, ang giandam batok sa mga dinakpan nga suspek.


Gidala sa Regional Forensic Unit ang mga nakumpiskang droga para sa qualitative ug quantitative examinations. (Diego M. Hidalgo)

Lalaki naghikog sa Dangcagan

Posted on by Omar Rashid Z. Abdullah

Nadiskobrehan nga naghikog ang usa ka 23-anyos nga ulitawo sulod sa ilang panimalay sa Purok 1, Brgy. Poblacion, Dangcagan, Bukidnon, buntag sa Enero 2, 2025

Sa imbestigasyon sa Dangcagan Municipal Police Station, nasayran nga nag-inom og ilimnong

makahubog ang biktima uban sa iyang mga higala sayo sa gabii niadtong Enero 1, 2025, sa Purok 3, Poblacion, Dangcagan, Bukidnon ug nipauli mga alas 4:00 sa buntag sa Enero 2, 2025.


Dugang pa, mga alas 7:00 sa buntag sa samang petsa, nanuktok ang iyang inahan sa pultahan sa iyang lawak apan walay tubag.


Giablihan niya ang pultahan ug nadiskubrehan niya ang iyang anak nga naglingkod ug naghigot og electrical wire sa liog ug gitaod kini sa grills sa bintana.


Gidala dayon sa pamilya ang biktima sa Kibawe Provincial Hospital, diin gideklarang dead on arrival sa attending physician.


Ang hinungdan sa kamatayon gitino nga asphyxia, secondary to hanging. (Omar Rashid Z. Abdullah)

PDL nagbitay sa CR sa BJMP

Posted on by Diego M. Hidalgo

Isa ka 31-anyos nga lalaki nga Person with Deprived Liberty (PDL) ang gikatahong naghikog sulod sa comfort room sa iyang selda sa Bureau of Jail Management and Penology (BJMP) sa Malaybalay City, Bukidnon

Pasado alas 5:00 sa hapon niadtong Enero 1, 2025, nadiskobrehan sa trustee ang gidangatan sa biktima.


Sumala sa pasiunang imbestigasyon, usa ka habol ang gihigot sa iyang liog, nga nakahikot usab sa steel grills sulod sa comfort room sa iyang selda.


Giingong nag-antos sa sakit sa pangisip ug nakasinati og hallucinations ang namatay.


Dugang pa nga nisuway na kini sa paghikog kaniadto apan napugngan sa mga personahe sa BJMP. (Diego M. Hidalgo)

Bana, asawa patay sa San Fernando

Posted on by Melchor Madera

Patay ang bana ug asawa sa kagubot nga nahitabo sa Sitio Salumayag, Halapitan, San Fernando, Bukidnon, hapon sa Enero 2, 2025

Gitigbas ug patay sa bana ang iyang 47-anyos nga asawa gamit ang sundang sa wala nga liog ug tuong kamot, nga niresulta sa hinanaling kamatayon niini.


Sumala sa report sa kapolisan, nahitabo kini samtang sila nagkalalis tungod sa selos sulod sa ilang panimalay.


Human sa hitabo, ang 39-anyos nga suspek namusil pa sa duha ka mga lalaking mag-uuma nga taga-Sityo Kasilaan, Barangay Halapitan, San Fernando, nga nangagi sa dalan gawas sa ilang panimalay gamit ang dibomba.


Ang 59-anyos nga biktima naigo sa kutokuto, samtang ang kauban nga 34-anyos naigo sa likod.
Niresponde sa dapit ang 40-anyos nga Datu, kinsa myembro sa Bagani nga taga Salumayag, aron ikalma ang sitwasyon, apan gipusil usab siya sa suspek.


Wala naigo si Datu, ug nibalos sa pagpusil gamit ang improvised shotgun. Ang suspek naigo sa tuong bahin sa lawas, hinungdan sa iyang kamatayon. (melbmadera)

Hatud Serbisyo sa Barangay Alanib sa Lantapan nagmalampuson

Posted on by Melchor Madera

Sama sa naandan, nagmalampuson ang gipahigayon nga unang Hatud Serbisyo ning tuig sa Barangay Alanib sa Munisipyo sa Lantapan

Gidumog sa katawhan ang programa nga nagdala sa mga serbisyo sa covered court sa barangay kaniadtong Enero 3, 2025.


Sumala sa kasayoran, ang kalihokan gipangunahan ni Lantapan Mayor Ernie R. Devivar.


Ang mga National Offices sama sa LTO, PhilHealth, Pag-IBIG, ug SSS nakig-layon sa kalihokan.


Nakighiusa usab ang mga miyembro sa Sangguniang Panlalawigan ug Provincial Agriculture Office, lakip na ang mga serbisyo medikal gikan sa probinsya.


Sa maong kalihokan, napahigayon usab ang public hearing alang sa pag-usab sa karaang Revenue Code nga nalatid pa sugod sa dos mil singko.


Ang bag-ong Revenue Code mao na unya ang mahimong basehan sa pagkolekta sa buhis alang sa mga tigpatigayon sa munisipyo. (melbmadera)

Lalaki nga akusado sa multiple charges nakorner

Posted on by Heber Quinco

Isa ka lalaki kinsa nag-atubang sa multiple charges ang nakorner sa Barangay 2, Malaybalay City, Bukidnon hapon sa Agosto 24, 2024

Siya nailang si Nardito P. Dum-ogan alyas Dodong Dum-ogan, 34, mag-uuma, adunay kapuyo, ug residente sa Sityo Tagbacan, Barangay Canangaan, Cabanglasan, Bukidnon.

Gisikop siya pinasubay sa warrant of arrest sa duha ka kaso sa murder nga nakadokit sa kaso kriminal numero 41403-23 ug 41405-23 ug laing duha ka kaso sa attempted murder nga nakadokit sa kaso kriminal numero 41404-23 ug 41406-23 pinetsahan Agosto 3, 2023.

Si Dum-ogan nakorner sa mga myembro sa 1st Buk PMFC, RIU10 ug 88th Infantry Battalion sa army. (Omar Rashid Z. Abdullah)