Giduslitan sa duha ka mga tawo ang back hoe sa Ulticon Builders Inc. (UBI) sa Purok 10, Sityo San Ramon, Brgy. Base Camp, Maramag, Bukidnon.
Si Police Col. Jun Mark J. Lagare, provincial director sa Bukidnon Police Provincial Office (BPPO) nibutyag, nga nahitabo kini pasado alas 8:30 ang takna sa gabii niadtong Pebrero 25.
Sumala sa imbestigasyon sa kapolisan sa Maramag, nahiabot sa dapit ang duha ka mga tawo sakay sa motorsiklo. Ang angkas nilabaw sa botelya nga kargado sa gasolina ngadto sa likod nga bahin sa back hoe ug nagdilaab kini.
Ang mga suspek nisibat padulong sa Don Carlos, ang kasikbit nga munisipyo.
Si Col. Lagare nimando na sa kapolisan sa Maramag sa pagpahigayon sa imbestigasyon, aron pag-ila sa mga suspek ug pagsuta sa motibo sa hitabo. Dili kini ang unang higayon nga gisunog ang mga gamit sa UBI dinhi sa Bukidnon.
