Saturday, January 25, 2025

Tag: BUSCO

Babaye gipusil sa Maramag

Posted on by Diego M. Hidalgo

Dideklarang patay na sa wala pa makaabot sa Bukidnon Provincial Hospital (BPH) Maramag ang 46-anyos nga babaye human gipusil sa Purok 8, Brgy. San Miguel, Maramag, Bukidnon hapon sa Enero 10, 2025

Ang babayeng biktima usa ka minyo, mag-uuma, ug residente sa Purok 4, Brgy. San Carlos, Maramag, Bukidnon.


Sumala sa kasayoran sa kapolisan sa Maramag, ang biktima sakay sa multicab pickup-type nga gimaneho sa usa ka lalaki ug uban sa laing babaye.


Ang sakyanan nagdagan gikan sa BUSCO, Quezon, Bukidnon padulong sa Purok 4, Brgy. San Carlos, Maramag, Bukidnon.


Sa ilang pag-abot sa dapit sa nahitaboan, giingong gipusil ang biktima sa duha ka wala mailhing lalaki nga suspek.


Ang biktima nakaangkon og grabing samad tungod sa pinusil sa likod ug gidala kini sa ospital apan patay na sa wala pa makaabot.


Ang mga suspek giingong niikyas human sa krimen sa wala masayri nga direksyon.


Narekober sa lugar sa nahitaboan ang duha ka fired cartridge cases sa kalibre .45 ug sulod sa sakyanan nakaplagan usab ang duha ka bala nga wa pa matinong kalibre.


Ang Maramag MPS nagpadayon sa imbestigasyon aron mailhan ang mga suspek ug masuta ang motibo sa maong insidente. (Diego M. Hidalgo)

2 mill monitors sa Busco gipamusil sa Valencia

Posted on by Omar Rashid Z. Abdullah

Gipamusil sa wala mailang suspek ang mag live-in partner kinsa parehong Mill Monitor sa Busco Sugar Mill hapon sa Mayo 26.

Si Police Lt. Col. Cipriano V. Bazar Jr., hepe sa kapolisan sa Valencia City sa iyang report niingon, nga ang krimen nahitabo sa Purok 3A, Brgy. Poblacion, Valencia City Bukidnon atubangan sa Vergelio’s Junkshop.

Ang mga biktima nailang si Pepe Paring y Gastador, minyo, 41, ug Marlyn Yaba y Yaba, 39, dalaga. Sila parehong Mill Monitor sa Busco ug mga residente sa dapit diin sila gipamusil.

Gidala sa Laviña Hospital sa Valencia City ang mga biktima apan si Paring gideklarang patay na sa wala pa nahiabot gumikan sa grabing mga samad pinusilan sa iyang lawas.

Samtang ang iyang kapuyo nga si Yaba ang nagpaalim pa sa samad pinusilan sa iyang duha ka mga paa.

Nasuta sa imbestigasyon sa kapolisan, nga ang mga biktima sakay sa ilang sakyanan gikan sa Busco. Sa dihang nahiabot na sila, gipusil sila sa wala mailang suspek gamit ang wala masayring kalibre sa armas.

Si Police Col. Jun Marl J. Lagare, provincial director sa Bukidnon Police Provincial Office nimando na sa pamunoan sa kapolisan sa Valencia sa pagpahigayon sa dugang imbestigasyon alang sa kasulbaran sa krimen.