Isa ka putbolista nga taga Malaybalay ang bag-ohay pa lang nakasungkit sa prestihiyosong titulo isip “Rookie of the Year” ug “Best Striker” atol sa NCAA Season 99 men’s football tournament championship, niadtong Marso 11, 2024
Si Kirk Eman Rozal See, 22, taga Brgy. 9, isa ka manunuwa sa putbol ilalom sa iladong football team nga San Beda Red Booters.
Ang nasangpit nga kuponan malampusong midepensa sa ilang titulo ug nahimong kampeonado sa liga human ilang napildi ang De La Salle- College of St. Benilde Blazers, sa iskor nga 1-0, didto sa Rizal Memorial Football Stadium.
Isip unang tuig sa NCAA football tournament, naangkon ni See ang “Golden Boot” award ug best striker human niya nabuhat ang unom ka “goals,” pinakataas nga puntos sa maong torneyo.
Si See, kasamtangan nga third year college student sa San Beda University nga nagtuon sa kurso nga Sports Management.
Siya isa ka full scholarship recipient nga gi-offer sa iya isip isa sa ka talentado ug disiplinado nga atleta nga gikan sa syudad sa Malaybalay.
Nagtungha siya sa San Beda sugod Grade 10, apan siya nagpabilin nga mapaubsanon ug wala niya hikalimti ang mga tawo nga mitabang kaniya, iyang pamilya ug higala, coaches, sa iyang tulunghaan diha sa Bukidnon National High School ug sa Malaybalay City Central Elementary School. (PR/LGU-Malaybalay)