Monday, December 16, 2024

Tag: GIDA

2 gipandunggab sa Baungon

Posted on by Diego M. Hidalgo

Duha ka mga lalaki ang gipandunggab sa pre-wedding occasion sa Purok 7, Brgy. Pualas, Baungon, Bukidnon hapon sa Agosto 25, 2024

Sumala sa report ni Police Major Melchor Saraus. Jr., OIC sa Baungon Municipal Police Station, ang mga biktima isa ka 37-anyos ug 25-anyos samtang ang suspek isa ka 33-anyos nga lalaki.

Ang mga biktima nag-inom sa ilimnong makahubog sa dihang nahiabot ang suspek nga ilang giaagni nga moapil kanila.

Nahitabo ang panaglalis tali sa mga biktima ug suspek.

Gikatahong niadto sa kusina ang suspek, nikuha og kutsilyo dayong dunggab sa mga biktima ug nisibat.

Ang mga biktima gidala sa Northern Mindanao Medical Center sa Cagayan de Oro City.

Apan ang 37-anyos namatay pipila ka oras gumikan sa grabing samad dinunggaban sa walang bahin sa tiyan samtang ang kauban niini ang nagpabilin sa maong ospital.

Walay pagsinabtanany tali sa suspek ug mga biktima ang nakitang motibo sa krimen. (Diego M. Hidalgo)

2 babaye nakorner sa buy-bust sa Maramag

Posted on by Diego M. Hidalgo

Nasikop sa kapolisan ang duha ka babayeng newly identified drug suspects sa buy-bust operation sa Purok 6, Brgy. Basecamp, Maramag, Bukidnon sa niaging semana

Ang mga suspek nag-edad 40 ug 50 anyos, sumala sa report ni Police Lt. Col. Bryan M. Panganiban, OIC sa Maramag Municipal Police Station.

Nakuha gikan sa mga babayeng suspek ang duha ka pakite sa gidudahang shabu nga adunay street value nga P34,000.00, lima ka selpon ug P500 cash.

Kasong paglapas sa RA 9165 o Comprehensive Dangerous Drugs Act of 2002 ang giandam na batok sa mga dinakpan.

Gidala sa Provincial Forensic Unit 10 sa Malaybalay City ang mga nakumpiska nga druga alang sa qualitative ug quantitative examinations. (Diego M. Hidalgo)

Lalaki nakuryetihan-patay sa Valencia

Posted on by Omar Rashid Z. Abdullah

Isa ka 50-anyos nga lalaki ang nakuryentihan-patay sa Purok 1, Patag, Brgy. Bagontaas, Valencia City, Bukidnon.

Nahitabo ang trahedya udto sa Agusto 19, 2024, sumala sa report sa report ni Police Lt. Col. Mitchel Clemencio, OIC sa Valencia City Police Station.

Ang biktima gidala sa Adventist Medical Center, Valencia City sa rescue team apan gideklarar sa nag-atiman nga doktor nga patay na sa wala pa nahiabot.

Nasayran sa imbestigasyon nga ang biktima nikatkat ug nagputol sa sanga sa punoan sa cotton fruit kon santol.

Ang sanga nakasangit sa three phase primary line sa FIBECO hinungdan nga nakuryentihan siya ug nahulog sa yuta. (Omar Rashid Z. Abdullah)

Template.

Lunsod Lunsad award midunol og P2-M nga proyekto ngadto sa Malaybalay

Posted on by Diego M. Hidalgo

Ang lokal nga pangagamhanan sa Malaybalay nakadawat og grant nga nagkantidad og Php 2 milyon gikan sa 2024 Lunsod Lunsad nga proyekto sa Department of Trade and Industry

Ang Malaybalay isa sa tulo ka siyudad sa Rehiyon 10 nga nakaangkon sa maong grant alang sa Creative Industry pinaagi sa paghatag og proposal nga proyekto.

Ang proyekto ginganlan ug 7Tribes Museum Shops (digital museum, digital marketing/e-commerce), nga nagtinguha sa pagdasig sa mga lumad ug local nga artists sa pagpromote sa nagkadaiyang kultura, produkto, arts sama sa paintings, ug uban pang kalihokan nga makahatag ug bili sa atong lumadnong piyesa ug kahibalo, alang usab sa paghatag ug dugang kakitaan sa mga miyebro sa komunidad.

Magmalipayong gidawat ni Mr. Romeo Lapeciros ang sertipiko nga pagkadawat sa award niadtong Agosto 6, 2024 sa Philippine Trade Training Center sa Pasay City, Metro Manila.

Si Lapeciros isip focal person sa proyekto ug nagrepresentar alang ni Mayor Jay Warren Pabillaran.

Dako ang iyang pasalamat nga mahimo ang maong proyekto kauban sa kolaborasyon sa nagkalain-laing opisina sa dakbayan, lakip ang Tourism Office, LEDIPO, ICT-Innovation Council, Council of Culture, Arts, and Heritage, CPDO, Konsehal Kiril Dinlayan, Mr. Erlow Talatala, ug uban pang project technical partners. (Diego M. Hidalgo)

7 sites sa Bukidnon nakaangkon og free Wi-Fi access

Posted on by Melchor Madera

MALAYBALAY CITY, Bukidnon (August 15, 2024) – Nakaangkon og free Wi-Fi access ang pito ka mga barangay sa Bukidnon bag-ohay lang

Ang pito ka mga dapit lakip sa activated nga 600 ka mga lugar sa nasud nga natabonan sa Connectivity, Capability, and Resiliency through Free Wi-Fi for All (CoRe FW4A) project sa Department of Information and Technology (DICT uban sa United Nations Development Programme (UNDP).

Nahigayon ang nationwide launching sa proyekto sa People’s Hall sa Malaybalay City, Bukidnon kaniadtong Agosto 15, 2024.

Diha sa programa si Mr. Paul Tuason, director sa DICT, Ms. Vivien Suerte-Cortez, team leader sa UNDP Philippines Institutions and Partnerships, Malaybalay City Mayor Jay Warren R. Pabillaran, ug uban pa.

Duha sa mga proyekto sa Bukidnon ang lakip sa Geographically Isolated and Disadvantaged Areas (GIDAs) diin ang Free Wi-Fi naplastar sa Barangay Hall sa Cabadiangan, Kadingilan ug sa Santa Felomina Barangay Hall sa Quezon.

Samtang ang lima pa anaa sa Indigenous People’s (IP) communities nga naplastar sa Saint Peter Barangay Hall sa Malaybalay City, Dolorosa Barangay Hall sa Dangcagan, Maraymaray Barangay Hall sa Don Carlos, Kalabugao Barangay Hall sa Impasug-ong ug Sampaguita Barangay Hall sa Kibawe.

Ang CoRe FW4A project direktang gipatuman sa UNDP nga nagsuporta sa pagpatuman sa DICT sa Free Wi-Fi for All (FWFA) Program niini subay sa R.A. 10929 kon Free Internet Access in Public Spaces Act of 2017.

Ang programa gikatakdang matapos sa Disyembre 31, 2025. (melbmadera)

Negosyante, investor sa Bukidnon, gidasig magkuha sa certificate of registration

Posted on by Diego M. Hidalgo

Gidasig ang mga negosyante ug investors sa Bukidnon, nga magkuha sa Certificate of Registration sa ilang mga negosyo sa Provincial Government of Bukidnon (PGB)

Tumong aron makapahimulos sila sa fiscal ug non-fiscal incentives pinaagi sa PGO-Local Economic Development and Investment Promotions Office (LEDIPO) subay sa Bukidnon Investment Code of 2021.

Sumala sa pahibalo sa PGB, lakip sa listahan nga anaa sa Investment Priority Areas sama sa agri-business, forestry-based industries, service-related industries, tourism related establishments, support services, ug waste management and waste disposal projects.

Kini alang niadtong mga proyekto, sama sa new projects, expansion projects, modernization projects, ug diversification projects, diin adunay gitakda nga filing fee nga nagkantidad sa nagkadaiyang klasipikasyon : large enterprises – ₱50,000; medium – ₱20,000; small- ₱5,000, ug micro – ₱1,000.

Alang sa dugang detalye ang mga hingtundan mamahimong magbisita sa opisina sa PGO-LEDIPO nga nahimutang sa National and Provincial Building, Capitol Compound, syudad sa Malaybalay, o mag message sa Ledipo Bukidnon Facebook page. (Diego M. Hidalgo)

Public hearing sa proposed provincial revenue code of 2024 gipahigayon

Posted on by Diego M. Hidalgo

Gipahigayon ang serye sa public hearing sa Proposed Provincial Revenue Code of 2024 sa Bukidnon

Sumala sa kasayoran sa provincial government sa Bukidnon, ang unang serye gipahigayon sa Kaamulan Open Theater, Malaybalay City, Bukidnon kaniadtong Mayo 27, 2024.

Ang maong schedule alang sa ikaduhang distrito sa Bukidnon nga gilangkuban sa syudad sa Malaybalay ug mga munisipyo sa Lantapan, Cabanglasan, San Fernando, ug Impasugong.

Ang sa 3rd District gipahigayon sa Mayo 29, 2024 sa Municipal Amphitheater (likod sa Municipal Hall), Anahawon, Maramag, Bukidnon; Mayo 30, 2024 ang sa 1st District nga gihimo didto sa Barangay Tankulan Covered Court, Tankulan, Manolo Fortich, Bukidnon; ug sa Mayo 31, 2024 ang sa 4th District nga gihimo sa Lumbo Covered Court, Lumbo, Valencia City, Bukidnon.

Gidapit ang tanang stakeholders aron makapaabot sa ilang mga suhestyon o komento kabahin sa ipahamtang nga taxes, fees, and charges sa PGB. (Diego M. Hidalgo)

PGB midawat og P50-M cash assistance gikan kang PBBM

Posted on by Omar Rashid Z. Abdullah

Gidawat sa Provincial Government of Bukidnon (PGB), pinaagi ni Provincial Governor Rogelio Neil P. Roque ang cheque balor ₱50-milyones gikan kang President Ferdinand R. Marcos, Jr.

Sumala sa kasayoran sa PAIA, nahatag kini atol sa Presidential Assistance to Farmers, Fisherfolks, and Families sa Pimentel Convention Center, Cagayan de Oro City niadtong Mayo 16, 2024.

Sa maong okasyon, gipadangat ni Presidente Marcos ang ka-mahinungdanon sa pagtimbayayong –ilabi na ning panahon sa kalamidad, nga dala sa taas nga hulaw.

Dinhi gipasabot sa presidente nga gamay’ng kantidad man ang ilang madawat apan malaumon kini nga subling makasugod ug makabangon ang mga apektadong pamilya dala sa ting-init.

Ang nadawat nga kantidad i-ayuda ngadto sa mga mag-uuma ug mangingisda nga labing naapektuhan sa El Niño, subay sa gitakda nga gabayan sa pag-apod-apod sa maong cash assistance.

Ang PGB ug representante sa DA-Regional Field Units (RFUs) mo-determina sa marginalized families alang sa mga mag-uuma ug DSWD alang sa mga mangingisda ug uban pang marginalized sektor nga grabeng naapektuhan sa hulaw, kinsa modawat sa tag-₱10,000.00.

Gawas sa Bukidnon, ang Misamis Orietal nakadawat sab og ₱50 milyones, ₱24.36-M sa Misamis Occidental, ₱13.92-M sa Lanao del Norte, ₱10.54-M sa Iligan City, ug tag-₱10-M sa Cagayan de Oro City ug Camiguin.

Aduna usab gipahigayon nga ceremonial turnover ngadto sa mga beneficiaries sa nagkadaiyang syudad ug probinsya sa Northern Mindanao, nga gisaksihan sa mga mayor, mga kongresista, ug ingon man sa mga department secretaries and officials. (Omar Rashid Z. Abdullah)

Canada gidayeg sa pagtangtang sa travel ban batok Bukidnon

Posted on by cmn

Gidayeg sa Sangguniang Panlalawigan (SP) ang nasud sa Canada pinaagi sa pagpalabang sa isa ka resolusyon gumikan sa pagtangtang niini sa travel ban ngadto sa iyang katawhan panganhi sa probinsiya sa Bukidnon

Sumala sa kasayoran sa PGB, nalabang ang resolusyon atol sa 88th Regular Session sa SP nga giduso ni SP member Nemesio B. Beltran, Jr.

Niadtong Enero, nalakip ang Bukidnon sa advisory sa Canada diin gidid-an ang ilang lumulopyo sa pagbisita human sa MSU-IIT bombing niadtong Disyembre 3 sa miaging tuig.

Hinuon, niadtong Mayo 3 nga edition sa Philippine Star, namantala nga gitangtang na sa Canada ang mga probinsya sa Misamis Oriental ug Bukidnon sa mga lugar sa Pilipinas nga ginadili ang pagbiyahe sa Canadian citizens.

Lalaki nahulog sa roof top sa tennis court

Posted on by Omar Rashid Z. Abdullah

Isa ka lalaki ang namatay sa gidalhan nga hospital human nahulog sa roof top sa tennis court sa isa ka tunghaan sa Valencia City, Bukidnon

Sumala sa kasayoran, ang biktima nailang si Cristian Ela, 20, residente sa Mt. Nebo, Valencia City.

Ang biktima nagtrabaho sa Mountain View College (MVC) sa Mt. Nebo.

Nadala pa siya sa Adventist Medical Center-Valencia City apan namatay pipila ka oras ang milabay.

Gikataho nga samtang nagtrabaho ang lalaki sa roof top sa tennis court sa tunghaan, na-slide ang atop nga iyang gitangtang hinungdan sa iyang pagkahulog. (Omar Rashid Z. Abdullah)