Friday, February 21, 2025

Tag: Konsehal

Pinakaunang K9 Unit sa LGU Malaybalay, gipresenta

Posted on by Omar Rashid Z. Abdullah

Pormal nga gipresenta sa publiko ang pinakaunang K9 Detection Unit alang sa dugang seguridad sa dakbayan sa Malaybalay

Sumala sa kasayoran, natigayon kini atol sa 2nd Monday Convocation Program niadtong Pebrero 10, 2025.


Si Konsehal Royland M. Orquia, committee chair sa Peace and Order sa Sangguniang Panlungsod, nipasabot sa kamahinungdanon sa paggamit sa trained K9 tungod sa ilang abilidad sa pag-detect sa mga explosives, narcotics, ug uban pang matang sa hulga nga peligroso sa publiko.


Dugang pa niya, isa kini ka deterrent sa kriminalidad ug makatabang sa pagpalig-on sa public safety and security.


Nasayran nga pipila na ka local government units ang nihimog K9 unit sama sa Cebu City ug mga munisipyo, lakip na ang atong silingang siyudad nga Valencia City.


Ang Detection Dog Unit ubos sa pagdumala sa Mayor’s Office, samtang ang City Veterinary Office ang maghatag sa health care support.


Mikabat sa P70,000.00 ang pagpalit sa iro ug dugang P150,000.00 ang gigahin alang sa training ug operasyon niini. (Omar Rashid Z. Abdullah)

Ordinansa sa pag-regulate sa kawayan nga himoong poste sa kural, dekorasyon ug uban pa aron malikayan ang dengue outbreak sa siyudad sa Malaybalay, aprobado na

Posted on by cmn

Giaprubahan na sa Sangguniang Panlungsod ang Ordinance No. 1050 S. 2025, nga nag-regulate sa paggamit sa kawayan isip poste sa kural, dekorasyon, ug uban pa aron malikayan ang dengue outbreak sa siyudad

Ang maong ordinansa unang giduso ni Konsehal Melchor P. Maramara kaniadtong Hulyo 16, 2024, atol sa ika-100 regular session, ug gi-refer kini kang Konsehal Kathleen Cecille C. Pagaling, Chairman sa Committee on Health and Social Servicess.


Human sa masusing pagtuon, kini napaboran sa ika-125 regular session niadtong Pebrero 4, 2025, ug gi-aprubahan ni City Mayor Jay Warren Pabillaran niadtong Pebrero 11, 2025.


Gibutyag sa konseho nga ang kawayan nga ginagamit isip poste sa kural o dekorasyon mahimong tapukan sa tubig-ulan, nga mahimong puy-anan ug itloganan sa mga lamok nga nagdala sa dengue.
Ang dengue usa ka major public health concern, nga posibleng makamatay ug makaylap dali sa komunidad.


Kini nga regulasyon usa sa mga lakang sa siyudad alang sa anti-dengue campaign, nga naglakip sa limpyo-palibot nga inisyatibo ug klarong mga patakaran sa paggamit sa kawayan.


Ang ordinansa naglatid sa mga regulasyon, giya, ug uban pang mga prohibisyon sa paggamit sa kawayan aron malikayan ang pagdaghan sa lamok ug pagpakatap sa sakit.


Pinaagi sa maong ordinansa, mas lig-on ang kampanya sa Malaybalay City batok sa dengue, nga magpahugot sa hygiene, sanitasyon, ug kahimsog sa katawhan. (pr)

Ordinansa alang sa mga gabaligya og uniporme, insignias sa PNP ug AFP giaprobahan

Posted on by Melchor Madera

Niadtong Enero 8, 2025, gipirmahan ni Mayor Jay Warren R. Pabillaran ang Ordinance No. 1048, Series of 2024

Ang ordinansa nagamando sa tanang establisamiyento nga nalambigit sa paghimo, pagbaligya, ug pag-apod-apod sa uniporme, insignia, ug uban pang mga kagamitan sa Philippine National Police (PNP) ug Armed Forces of the Philippines (AFP), nga magkuha og Certificate of Conformity o Certificate of Manufacturer/Distributor gikan sa PNP ug AFP.


Kini unang giduso ni Konsehal Royland M. Orquia niadtong Abril 23, 2024.


Sumala sa kasayoran sa city government, nakalusot kini sa konseho atol sa 120th Regular Session niadtong Disyembre 2, 2024.


Tinguha sa lakang nga malikayan ang ilegal nga paggamit ug pagbaligya sa mga uniporme ug kagamitan nga posibleng magamit sa dautang mga elemento alang sa pagbuhat og krimen. (melbmadera)

Illegal settlement, land squatting gidili sa Malaybalay

Posted on by Melchor Madera

Kaniadtong Hulyo 9, 2024, pinal nga giuyonan ni Mayor Jay Warren R. Pabillaran ang Anti-land squatting ordinance sa Malaybalay City

Nahitabo kini human giaprobahan sa Sangguniang Panlungsod ang Ordinance No. 1038, Series of 2024, nga mao ang ordinansa nga nagdili sa illegal settlement ug land squatting sa Malaybalay.

Sumala sa kasayoran sa city government, nakalusot sa SP ang ordinansa atol sa ika-94 nga regular session niadtong June 4, 2024.

Kini nga lakang naghatag og dakong kalamboan alang sa kalinaw ug kaluwasan sa siyudad.

Si Konsehal Erwin A. Damasco, chairman sa committee on human settlement, zoning, and land use, inubanan ni Konsehal Zoltan Dindo D. Dinlayan, ang nanguna sa pagduso ug pagpa-aprobar sa nasangpit nga ordinansa.

Ang ilang paningkamot ug dedikasyon alang sa maong isyu nakapahimo sa ordinansa nga isa ka realidad, nga gilauman nga maghatag og dugang pagbag-o sa siyudad.

Ang tumong sa maong ordinansa mao ang mapahugtan ang kampanya batok sa mga informal settler ug mga professional squatter.

Kini naglakip sa pagpasiugda og mas striktong mga patakaran aron malikayan ang mga kagubot ug mga dili maayo nga sitwasyon nga dala sa illegal settlement.

Dugang pa, ang ordinansa naglantaw nga malikayan ang pagtukod og mga building sa mga lugar nga delikado, sama sa mga daplin sa sapa, aron malikayan ang mga aksidente ug kalamidad.

Tungod niini nga ordinansa, gilauman nga mapabiling hapsay ug malikay sa peligro ang katawhan dinhi sa dakbayan sa Malaybalay.

Ang mga residente adunay mas ligdong nga pamuyo ug proteksyon batok sa mga illegal nga aktibidad nga maka-apekto sa ilang kaluwasan ug kabtangan. (melbmadera)

Lunsod Lunsad award midunol og P2-M nga proyekto ngadto sa Malaybalay

Posted on by Diego M. Hidalgo

Ang lokal nga pangagamhanan sa Malaybalay nakadawat og grant nga nagkantidad og Php 2 milyon gikan sa 2024 Lunsod Lunsad nga proyekto sa Department of Trade and Industry

Ang Malaybalay isa sa tulo ka siyudad sa Rehiyon 10 nga nakaangkon sa maong grant alang sa Creative Industry pinaagi sa paghatag og proposal nga proyekto.

Ang proyekto ginganlan ug 7Tribes Museum Shops (digital museum, digital marketing/e-commerce), nga nagtinguha sa pagdasig sa mga lumad ug local nga artists sa pagpromote sa nagkadaiyang kultura, produkto, arts sama sa paintings, ug uban pang kalihokan nga makahatag ug bili sa atong lumadnong piyesa ug kahibalo, alang usab sa paghatag ug dugang kakitaan sa mga miyebro sa komunidad.

Magmalipayong gidawat ni Mr. Romeo Lapeciros ang sertipiko nga pagkadawat sa award niadtong Agosto 6, 2024 sa Philippine Trade Training Center sa Pasay City, Metro Manila.

Si Lapeciros isip focal person sa proyekto ug nagrepresentar alang ni Mayor Jay Warren Pabillaran.

Dako ang iyang pasalamat nga mahimo ang maong proyekto kauban sa kolaborasyon sa nagkalain-laing opisina sa dakbayan, lakip ang Tourism Office, LEDIPO, ICT-Innovation Council, Council of Culture, Arts, and Heritage, CPDO, Konsehal Kiril Dinlayan, Mr. Erlow Talatala, ug uban pang project technical partners. (Diego M. Hidalgo)

Fire Insp. Salga gipasidunggan

Posted on by Diego M. Hidalgo

Gitunol ang pasidungog ngadto kang Fire Inspector Mary Ranilie Ladrillo Salga

Nahigayon ang pagtunol niadtong Mayo 21, 2024 didto sa Sangguniang Panlunsod (SP) Session Hall sa Old City Hall building sa Malaybalay City atol sa 92nd regular session sa SP.

Kaniadtong Abril 16 atol sa 87th regular session sa SP, giduso ni Konsehal Zoltan Dindo D. Dinlayan nga hatagan og Recognition si Salga isip Top six nga nag-graduate sa Philippine National Police Academy (PNPA) LAYAG-DIWA Class of 2024.

Si Fire Inspector Salga gikan sa Barangay 10 sa Malaybalay City.

Siya kinamagulangang anak sa kanhing empleyado sa City Government of Malaybalay nga si late Ramon Salga ug Nelly L. Salga.

Produkto siya sa Malaybalay City Central School (MCCS), Bukidnon National High School (BNHS) ug Cagayan de Oro College (COC) sa wala pa siya nisulod sa PNPA. (Diego M. Hidalgo)

Serbisyong optikal alang sa mga kabus nakalusot sa SP

Posted on by Omar Rashid Z. Abdullah

Giaprobahan sa Sangguniang Panlungsod (SP) ang Resolution No. 2024-0593 nga naghatag og pagtugot kang Mayor Jay Warren R. Pabillaran sa pagsulod sa isa Memorandum of Agreement (MOA) tali sa City Government of Malaybalay ug sa D’ Vintage Vision Inc

Sumala sa kasayoran, ang kasabotan mahitungod sa serbisyong optikal nga itabang sa mga nailang kabus sa syudad sa Malaybalay.

Human sa masusing pagtuon, atol sa ika 76th regular session niadtong Enero 23, 2024, giduso ni Konsehal Cromwell Kiril D. Dinlayan resolusyon nga hiniusang giuyonan sa konseho.

Nasayran nga kaniadtong Enero 2, 2024, ang buhatan sa mayor nag-endorso ngadto sa SP uban sa paghangyo nga pagatugotan si Pabillaran sa pagsulod sa isa ka kasabotan nga dako og ikatabang sa katawhan labi na kadtong mga kabus nga nanginahanglan sa nasangpit nga serbisyo.

Gidawat sa City Government of Malaybalay ang ilang tanyag sa nasangpit nga serbisyo ug ang duha ka partido miuyon sa uban pang mga termino ug kondisyon nga natala sa nasangpit nga MOA.

Nasayran nga ang D’ Vintage Vision Inc., isa ka optical shop corporation with SEC Registration No. CS201535609 nga nagahatag serbisyo ug produktong optikal. (Omar Rashid Z. Abdullah)

Ordinansa sa pagparehistro sa mga binuhing hayop sa Malaybalay aprobado na

Posted on by cmn

Giaprobahan na ni City Mayor Jay Warren R. Pabillaran ang ordinansa nga magpangrehistro sa mga binuhing hayop sa kabarangayan sa Malaybalay

Sumala sa kasayoran sa kagamhanang lokal sa dakbayan, gipirmahan ni Mayor Pabillaran ang Ordinansa kaniadtong Disyembre 4, 2023.

Ang ordinansa nakalusot sa Konseho sa syudad human sa masusing pagtuon atol sa ika-70 regular session niadtong Nobyembe 28, 2023.

Unang giduso ni konsehal Alan Ryann O. Legaspi ang ordinansa mahitungod sa pagpa-rehistro
sa mga binuhing hayop sa kabarangayan kaniadtong Hulyo 25, 2023 atol kini sa ika-53 regular
session.

Nasayran nga ang pagpangrehistro sa mga kahayopan mao ang pagsiguro nga matabangan ang
mag-uuma sa pagpalambo ug pagprotektar sa mga binuhing hayop pinaagi sa paghatag kanila sa
tabang teknikal.

Dugang rason sa maong ordinansa nga masiguro nga ang mga binuhing hayop himsog, bakunado
ug luwas kini sa mga sakit nga posibleng makatakod sa ubang hayop ug mga tawo.

Gisiguro usab sa maong ordinansa nga malikayan ang pagkuyanap sa mga sakit pinaagi sa pag
monitor niini.

Tungod niini, mas mapalambo pa ang mga mag-uuma ug maprotektahan ang mga kahayopan ug
katawhan sa mga makatakod nga sakit. (melbmadera)

Konsehal Baguio sa Munisipyo sa Quezon namatay

Posted on by Omar Rashid Z. Abdullah

Gikasubo kaayo sa mga residente sa Munisipyo sa Quezon, Bukidnon ang pagpanaw ni Konsehal Restituto “Rey” Baguio.

Sa kasayoran nga gipagawas sa Facebook Page sa maong Munisipyo, namatay ang Konsehal pasado alas 8:55 ang takna buntag sa Mayo 17 sa edad nga 53.

Nilingkod siya isip Konsehal sa Munisipyo sugod 2016 hangtod sa kasamtangan.

Nagsilbi siya nga chairman sa committee on engineering and public works, committee on agriculture and cooperatives, ug committee on housing, urban development, land zoning, and classification.

Sa wala pa siya nahimong Konsehal sa Quezon, nahimo siyang draftsman sa Quezon Municipal Engineering Office. Nagserbisyo sab siya isip Kagawad sa Brgy. Poblacion gikan 2007 hangtod 2016.