Ang Public Employment Service Office (PESO) nanguna sa seremonya sa paghatag ug proyektong Rice Trading ug Marketing nga nagkantidad og P 250,000.00 ngadto sa Malaybalay City United Persons With Disabilities Association (MACUPWIDAS) niadtong Agosto 22, 2023 sa AVCR Building, Barangay 1, Malaybalay City
Ang maong turnover gitambungan ni DOLE Provincial Director nga si Raul L. Valmores, City Administrator ug PESO Manager Atty. Anna Marie R. Bergado, ug ang Accredited Co-Partner FIPUFA President nga si Jomel Capoy.
Sa parehong adlaw, gitunol usab ang nagkalain laing panginabuhian nagdto sa 13 ka indibidwal nga gipahigayon didto sa Casisang Covered Court. Kini naglangkob sa Sari-sari Store Project, Rice Retailing Project, Pancake Making, Ukay-ukay Project, Goat Production og Drinks Retailing Project nga mokabat ngadto sa P280,000.00.
Samtang niadtong August 23, 2023 gi-turnover usab ang livelihood projects sa 26 ka indibidwal sa taga barangay Silae og Kulaman. Adunay Corn Production Project, Sari-sari Store, Rice Trading og Chicken Production Project. Kini mokabat usab sa kantidad nga P530,000.00.
Ang Agricultural Extension Officer sa City Agriculture Office mihatag og mga pahinumdom sa saktong pamaagi sa pagpatubo sa mais.
Gipasabot usab ni DOLE Provincial Director Valmores ang importansiya nga magtukod og usa ka Project Manager aron mabantayan ang pagdumala sa maong panginabuhian.
Gipadayag usab niya ang kamahinungdanon sa suporta ug paghiusa sa mga miyembro, tungod kay ang paglalis og pagkabungkag sa grupo mahimo kini nga magdul-ong sa pagkaguba sa organisasyon.
Sa iyang mensahe, si Atty. Bergado miingon nga hatagan og dakong bili ang maong panginabuhian, tungod kay sa pipila ka mga proposal, ang ilang proyekto maoy napili nga maaprobahan sa DOLE. Ang LGU pinaagi sa PESO magpadayon sa paghimo og mga koordinasyon uban sa mga kauban nga ahensya aron ipatuman ang mga programa niini, ug usa niini mao ang paghatag og panginabuhian ngadto sa mga sektor nga nagkinahanglan. (LGU Malaybalay)