Sunday, December 29, 2024

Tag: OSCA

2 centenarians sa Malaybalay nakadawat og incentives

Posted on by Melchor Madera

Duha ka centenarian ang nakadawat og tag P100,000.00 nga cash incentives gikan sa City Government sa Malaybalay niadtong Mayo 17, 2024

Sumala sa kasayoran sa LGU Malaybalay, ang duha mao sila Mrs. Yaga Sarino Molhay ug Mrs. Porfita Sario Libanda nga parehong residente sa Brgy. Manalog.

Si Molhay natawo niadtong Mayo 20, 1920, samtang si Libanda natawo niadtong Nobyembre 4, 1921.

Giila sila pinasubay sa Republic Act 10868, the Centenarian Act of 2016, nga nag-ila sa mga Pilipino nga moabot og 100 anyos.

Si City Mayor Jay Warren R. Pabillaran, inubanan sa Barangay Manalog Council sa pagpangulo ni Barangay Chairman Roney Lagunday, 9th Sanguniang Panglungsod, Office of the Senior Citizens Affairs (OSCA) ug City Social Welfare and Development Office (CSWDO) personnel, ang nitunol sa tseke mismo sa panimalay sa mga benepisaryo sa Brgy. Manalog.

Subay sa City Ordinance No. 988, series of 2021, ang Syudad sa Malaybalay mihatag sa matag centenarian og isa ka higayon nga insentibo nga P100,000.00, uban ang cake ug bouquet sa mga bulak.

Sila ang ikaduha ug ikatulo nga centenarian nga nakadawat sa maong mga insentibo gikan sa City Government sukad naaprobahan ang lokal nga ordinansa. (melbmadera)

National plastic ID cards nadawat sa senior citizens sa Malaybalay

Posted on by cmn

Mikabat na sa 8,377 ka national plastic ID sa senior citizens ang pasiunang nabuhat ug nahatag alang sa dakbayan sa Malaybalay

Sumala sa kasayoran, ang bag-ong plastic ID cards nahatag na sa mga senior citizen sa 29 ka mga barangay sa dakbayan.

Magpadayon pa ang pagpanghatag sa mga ID card sa umaabot pa nga skedyul alang sa 17 ka nabilin nga mga barangay sa Malaybalay.

Ang Office of the Senior Citizens Affairs (OSCA) inabagan sa City Administrator’s Office, nagtakda sa mga schedule sa kabarangayan alang sa renewal ug pag-isyu sa bag-ong plastic ID cards.

Nakadawat na sa ID cards ang mga senior citizen sa 11 Poblacion barangays.

Ang sa Brgy. 1 (517), Brgy. 2 (118), Brgy. 3 (68), Brgy. 4 (102), Brgy. 5 (51), Brgy. 6 (80), Brgy. 7 (159), Brgy. 8 (96), Brgy. 9 (473), Brgy. 10 (222), ug Brgy. 11 (201).

Sa south ug north barangays; ang San Jose (391), Laguitas (264), Patpat (237), Sumpong (588), Casisang (1,498), Capitan Anghel (54), Can-ayan (316), Kibalabag (71), Manalog (44), Kalasungay (478), ug Bangcud (370).

Lakip sa nahatagan sa serbisyo ang barangay Mapayag (80), Magsaysay (156), Dalwangan (407), Imbayao (78), Aglayan (441), Cabangahan (220), ug Linabo (586).

Si OSCA Head Rene Y. Cipriano, mipasabot nga kining mga ID card balido sa tibuok kinabuhi.

Ang senior citizen ID card holder adunay 20 porsyento diskwento sa mga nag-unang kinahanglanon susama sa pletehan sa transportasyon, mga tambal nga ilang palitunon ug singko porsyento para sa groceries.

Nipaabot usab ang mga senior citizen sa ilang pagpasalamat kay City Mayor Jay Warren R. Pabillaran sa paghatag kanila sa maong oportunidad. (melbmadera)

Elderly Filipino Week gisaulog sa Valencia

Posted on by cmn

Gisaulog sa dakbayan sa Valencia ang Elderly Filipino Week niadtong Oktubre 10, 2023

Sa pahibalo sa LGU Valencia, ang selebrasyon malipayon nga gisaulog sa grupo sa mga Senior Citizens gikan sa 31 ka barangay sa dakbayan.

Gi-selebrar kini sa pagpanguna sa Office of Senior Citizens Affairs (OSCA) ug City Social Welfare and Development Office (CSWDO.

Sumala sa Proclamation No. 470 s. 1994, ang dakbayan nag-obserbar sa Elderly Filipino Week matag tuig.

Ang ulohan sa selebrasyon karong tuiga mao ang “‘Honoring the Invaluable Legacy of Filipino Senior Citizens”.

Ang selebrasyon naghatag og gibug-aton sa kamahinungdanon sa paghatag og bili sa mga dagkong kontribusyon sa mga senior citizen sa kaayohan sa katilingban. (MG Mayumi B. Madera)