Saturday, April 20, 2024

Tag: Patay

Mag live-in gipamusil sa Quezon

Posted on by Diego M. Hidalgo

Patay ang isa ka lalaki samtang samdan ang kapuyo niini human sila gipamusil sa Purok 6, Brgy. Magsaysay, Quezon, Bukidnon gabii sa Marso 29, 2024

Sumala sa report ni Police Lt. Col Noel F. Cano, OIC sa Quezon Municipal Police Station, nadala pa sa Quezon Health Center Infirmary ang mga biktima.

Apan ang lalaki kinsa nakaangkon sa grabing mga samad pinusilan sa lawas ang gideklarang patay na sa wala pa mahiabot.

Samtang ang iyang kapuyo kinsa nakaangkon sa samad pinusilan sa tuong tiil ug tiyan ang gibalhin sa Bukidnon Provincial Hospital sa Maramag, Bukidnon.

Nasayran sa imbestigasyon sa kapolisan sa Quezon nga ang mga biktima nag-atiman sa ilang food stall alang sa selebrasyon sa Araw ng Barangay sa dihang gipusil sa suspek gamit ang wala masayring kalibre sa armas.

Ang suspek nisibat padulong sa Arakan, North Cotabato ug padayon pa kining gipangita.

Nakuha sa dapit sa krimen ang unom ka kapsola sa bala sa armas.

Padayon pa sab ang imbestigayon sa kapolisan aron pag-ila sa suspek ug pagsuta sa motibo sa krimen. (Diego M. Hidalgo)

Tawo giduggab sa igsoon sa Kibawe

Posted on by Diego M. Hidalgo

Isa ka lalaki ang gidunggab patay sa iyang manghod didto sa Purok 9, Romagook, Kibawe, Bukidnon

Ang insidente nahitabo gabii sa Marso 26, 2024, sumala kini sa report ni Police
Major Jayvee G. Babaan, OIC sa Kibawe Municipal Police Station.

Ang 31-anyos nga biktima nakaangkon sa grabing samad dinunggaban sa tuong dughan ug tiyan.

Gidala siya sa Bukidnon Provincial Hospital (BPH) sa Kibawe, Bukidnon apan gideklarar siyang patay sa niatiman nga doktor.

Sumala pa, sayong gabii sa maong petsa, samtang tua sa Barangay Pay-as, Kadingilan, Bukidnon, ang duha samtang nagka-inom sa ilimnong makahubog ang nagkalalis nga niresulta sa pagsinumbagay.

Pagkahuman, ang suspek niadto sa panimalay sa ilang ginikanan sa Romagook aron magkuha sa iyang mga sinina.

Ang duha nagkakita didto pag-usab diin gihapak sa biktima ang walang bukton sa suspek gamit ang palwa sa lubi.

Gumikan niini gihublot sa 26-anyos nga suspek ang iyang dalang kutsilyo ug gidunggab ang iyang magulang makaduha ka higayon.

Ang suspek nasikop sa niresponding kapolisan.

Walay pagsinabtanay sa managsoon ang nakitang motibo sa krimen. (Diego M. Hidalgo)

1 patay, 1 angol human nakuryentihan sa Maramag

Posted on by Omar Rashid Z. Abdullah

Gidala sila sa Saint Joseph Southern Bukidnon Hospital. Patay ang isa ka lalaki samtang angol ang kauban niining trabahante human nakuryentihan sa ilang gitrabahoan sa Purok 8, Brgy. San Miguel, Maramag, Bukidnon

Sumala sa report nahitabo kini niadtong Marso 27, 2024 samtang nagtabaho sa Universal Harvester Dairy Farm Inc. sa dapit.

Gidala sila sa Saint Joseph Southern Bukidnon Hospital.

Apan ang 35-anyos gideklarar nga dead on arrival samtang luwas ang kauban niini.

Sa imbestigasyon, nasayran nga ang mga biktima nagpahigayon og
maintenance repair sa supply sa water pump sa motor pool area sa maong
kompanya.

Samtang ang isa kanila naunlod sa water storage pool, nakuryentihan siya
ug nisinggit og tabang.

Niambak sa pool ang kauban nga trabahante apang nakuryentehan sab
siya.

Nakuha sila sa ilang duha ka mga kauban ug gidala sa hospital human
napalong ang breaker switch. (Omar Rashid Z. Abdullah)

Batang babaye patay, 2 angol sa road mishap sa Don Carlos

Posted on by Omar Rashid Z. Abdullah

Patay ang isa ka batang babaye samtang angol ang duha ka mga drayber human sa road mishap nga nahitabo sa Purok Mauswagon, Barangay Pinamaloy, Don Carlos, Bukidnon hapon sa Marso 2, 2024

Si Police Major Cipriano V. Bazar, Jr., OIC sa Don Carlos Municipal Police Station, miingon sa iyang report nga ang bata nadusmogan sa 10-Wheeler Truck samtang anaa sulod sa ilang panimalay nga anaa sa daplin sa dalan.

 

Ang bata uban sa duha ka mga drayber ang gidala sa Don Carlos Doctor’s Hospital.

 

Apan ang bata gideklarar nga patay nasa wala pa mahiabot.

 

Ang drayber sa truck nakaangkog grabeng kadaot sa lawas ug gi-refer sa Bukidnon Provincial Hospital, Maramag, Bukidnon.

 

Samtang ang drayber sa Bao-bao nagpabilin nga naadmit sa Don Carlos Doctor’s Hospital.

 

Nasuta sa imbestigasyon nga ang 10-Wheeler Truck nagdagan gikan sa habagatang bahin.

 

Sa pag-abot sa dapit sa insidente, nag-overtake kini sa high speed sa tuo nga outer lane, nawad-an og control, nabangga sa solar post ug sa Bao-bao ug nadusmo sa isa ka balay diin tua ang batang babaye.

 

Ang duha ka mga sakyanan nakaangkon og kadaot, nagpabilin sa dapit ug nagpaabot sa isa ka tow truck. (Omar Rashid Z. Abdullah)

Babaye, lalaki gipamusil sa Valencia

Posted on by Heber Quinco

Biktima sa pagpamusil ang babaye ug lalaki sa Aguilar St., Purok 16, Brgy. Poblacion, Valencia City, Bukidnon

Sumala ni Police Lt. Col. Mitchell Clemencio, OIC sa Valencia City Police Station, ang krimen nahitabo pasado alas 3:30 sa buntag niadtong Pebrero 28, 2024.

 

Ang mga biktima isa ka 41-anyos nga lalaki ug 33-anyos nga babaye.

 

Sila gidala sa Adventist Medical Center sa Brgy. Poblacion, Valencia City apan ang lalaki gideklarar nga patay sa wala pa mahiabot.

 

Nasayran nga ang duha nag-inom sa D96 Minimart sa dihang isa ka wala mailhing tawo ang niduol kanila ug gikalalis niini ang babaye nga biktima.

 

Paglabay sa pipila ka minuto, nilakaw ang suspek ug mibalik nga nagdala og mubo nga armas dayon gipusil ang duha ka mga biktima nga naigo sa managlahing bahin sa ilang lawas.

 

Ang suspek daling misibat sa wala masayring direksiyon human sa insidente.

 

Nasayran nga ang lalaki isa ka sekyu nga taga Tanglaw, Davao del Norte samtang ang kaubang babaye taga Talomo, Matina Aplaya, Davao City.

 

Anggulong Love Triangle ang isa sa gilantaw nga hinungdan sa maong krimen.

 

Samtang ang kapolisan nagpadayon pa sa ilang imbestigasyon alang sa pag-ila sa misibat nga suspek. (Diego M. Hidalgo)

Suspek sa Basag Kotse incidents sa Bukidnon nakigpinusilay sa kapulisan

Posted on by Diego M. Hidalgo

Nakigpinusilay sa mga myembro sa Valencia City Police Station ang giingon nga notoryus nga suspek sa Basag Kotse incidents sa Bukidnon

Si Police Lt. Col. Mitchel Clemencio, OIC sa Valencia CPS sa iyang report miingon nga ang

pinusilay nahitabo sa alas 12:46 a.m. sa Marso 1, 2024.

 

Sumala sa report, nabantayan nga gipang-lili sa suspek ang mga sakyanan nga nakaparada sa corner sa Valero ug Antonio Street, Poblacion, Valencia City.

 

Nakigpinusilay ang 28-anyos nga suspek sa nagpatrolyang mga pulis sa dapit.

 

Ang motorsiklo nga gimaneho sa suspek nakadusmo sa lechon manok stall sa daplin sa Sayre

Highway sa Purok uno sa Barangay Lumbo human sa ginukdanay.

 

Gidala ang suspek sa Laviña General Hospital aron matambalan gumikan sa samad pinusilan

nga naangkon sa lawas.

 

Apan gideklarar siya nga patay na sa wala pa mahiabot sa nag-atiman nga doktor.

 

Lakip sa narekober gikan sa suspek ang isa ka kalibre .45 pistola nga adunay steel magazine nga kargado sa upat ka buhing bala.

 

Sa dugang imbestigasyon nasayran nga ang nahisgutang narekober nga armas nakarehistro ug gipanag-iya sa isa ka 46-anyos nga negosyante.

 

Nasuta nga ang maong armas gibutang sulod sa Ford Ranger Raptor nga sakyanan sa negosyante samtang giparking kini sa Jocels Garden, Purok 2, Brgy. Poblacion, Valencia City niadtong Oktubre 7, 2023 sa mga alas 8:50 sa gabii.

 

Giguba ang bintana sa maong sakyanan ug gituyo nga gikuha sa sad-an ang maong armas. (Diego M. Hidalgo)

2 patay, 1 angol sa road mishap sa Pangantucan

Posted on by Omar Rashid Z. Abdullah

Duha ang patay samtang angol ang isa ka menor de edad human nibangga sa Fuso Truck ang motorsiklong ilang gisakyan sa Munisipyo sa Pangantucan, Bukidnon

Si Police Captain Edgar M. Apog, OIC sa Pangantucan Municipal Police Station, niingon sa iyang report nga nahitabo ang panagbangga sa gabii sa Pebrero 24, 2024 didto sa National Highway sa Sitio Bong-bong, Brgy. Adtuyon,

Ang lalaking drayber sa motorsiklo lakip ang iyang hingkod nga angkas ang naligsan sa trak.

Subo lang, ang duha gideklarar nga dead on arrival sa Pangantucan Medical Hospital sa nag-atiman nga doktor.

Samtang ang laing angkas nga menor de edad ang nakahiagum og less serious head injuries.

Nasayran sa inisyal nga imbestigasyon nga ang duha ka mga sakyanan nagbiyahe sa samang direksyon paingon sa Poblacion sa maong Munisipyo diin nagsunod ang motorsiklo sa trak.

Ang motorsiklo nisuway og overtake sa trak sa hait nga kurbada hinungdan nga nabangga kini sa tuong bahin sa trak.

Kini nga panagbangga misangpot sa drayber ug hingkod nga pasahero sa motorsiklo nga naligsan sa likod nga tuong ligid sa trak.

Ang 55-anyos nga drayber sa trak anaa na sa kustodiya sa Pangantucan MPS uban sa mga nalambigit nga sakyanan. (Omar Rashid Z. Abdullah)

2 gipamusil sa Malaybalay

Posted on by Omar Rashid Z. Abdullah

Duha ka managlahing insidente sa pagpamusil ang nahitabo sa dakbayan sa Malaybalay

Sumala sa report sa kapolisan, ang mga lalaking biktima nag-edad sa 45-anyos ug 43-anyos.

Ang unang gipusil patay mao 45-anyos nga minyong lalaki.

Siya gipusil sa Fortich St., National Highway, Purok 4, Brgy. San Jose, Malaybalay City gabii sa Enero 21, 2024.

Nakaangkon siya sa grabing samad pinusilan sa iyang wala nga dunggan diin ang bala migawas sa tuo nga templo gamit ang wala matinong kalibre sa armas.

Napalgan siya nga nagbuy-od sa abaga sa dalan paingon sa norte kilid sa iyang single nga motorsiklo nga nagkadugo ang nawong.

Gidala pa ang biktima sa Bukidnon Provincial Medical Center apan gideklarar sa nag-atiman nga doktor nga dead on arrival.

Sa laing bahin, ang ikaduhang pagpamusil patay nahitabo gabii sa Enero 23, 2024 sa Purok 4, Barangay 7, Malaybalay City, Bukidnon.

Ang 43-anyos nga biktima nakaangkon sa grabing mga samad pinusilan sa lawas.

Gidala pa siya sa mireponding MERU personnel ngadto sa BPMC apan gideklarar sa nag-atiman nga doktor nga dead on arrival.

Sa imbestigasyon nasayran nga niabot ang suspek sa pinuy-anan sa biktima nga nagpakaron-ingnon nga mangabang.

Pipila ka gutlo ang milabay, sa walay igong rason gipusil ang biktima sa makadaghang higayon ug milayas ang suspek padulong sa wala mahibal-i nga direksyon.

Sa pagsuwat ning balita, padayon pa ang imbestigasyon sa kapolisan sa Malaybalay aron pagtino sa motibo ug pag-ila sa mga suspek. (Omar Rashid Z. Abdullah)

75-anyos nga babaye nadasmagan og sakyanan sa Valencia

Posted on by Diego M. Hidalgo

Isa ka 75-anyos nga pedestrian ang nadasmagan sa Suzuki utility vehicle sa National Road, Purok 8, Brgy. Bagontaas, Valencia City, Bukidnon gabii sa Disyembre 30, 2023. Sumala sa report sa Valencia City Police Station, ang sakyanan nagdagan gikan sa Valencia City paingon sa Malaybalay

Sa pag-abot sa dapit nga nahitaboan, aksidenteng nabanggaan niini ang nahisgutang pedestrian kinsa milabang sa maong karsada gikan sa subangan paingon sa kasadpang direksyon.

Naangol ang biktima ug gidala sa Adventist Medical Center, Valencia City, Bukidnon apan gideklarar sa nag-atiman nga mananambal nga patay na sa wala pa mahiabot.

Nakita ang mga kadaot sa atubangan nga bahin, windshield ug accessories sa sakyanan.

Dugang pa, temporaryo nga gikustodiya sa Valencia CPS ang sakyanan uban sa 41-anyos nga lalaking drayber alang sa tukmang disposisyon. (Diego M. Hidalgo)

Tawo gipusil patay sa Tulogan sa Talakag

Posted on by Omar Rashid Z. Abdullah

Isa ka 24 anyos nga lalaki ang gipusil patay sa Tulogan sa Tribu sa Purok 1, Brgy. Miarayon, Talakag, Bukidnon

Sumala sa report sa kapolisan sa Talakag, nahitabo ang krimen pasado alas 8:45 ang takna sa gabii niadtong Disyembre 31, 2023.

Ang biktima nakaangkon sa grabing samad pinusilan sa walang dughan.

Gidala pa siya sa Bukidnon Provincial Hospital sa Talakag apan gideklara na siyang patay sa
wala pa mahiabot.

Sumala sa imbestigasyon sa kapolisan, ang biktima nitambong sa ritual sa tribu sa dihang kalit
gipusil sa wala mailang suspek.

Sa pagkutlo ning balita padayon pa ang imbestigasyon sa kapolisan sa Talakag aron pag-ila sa
suspek ug pagsuta sa motibo sa krimen. (Omar Rashid Z. Abdullah)