Friday, April 04, 2025

Tag: RA

2 centenarians sa Malaybalay nakadawat og incentives

Posted on by Melchor Madera

Duha ka centenarian ang nakadawat og tag P100,000.00 nga cash incentives gikan sa City Government sa Malaybalay niadtong Mayo 17, 2024

Sumala sa kasayoran sa LGU Malaybalay, ang duha mao sila Mrs. Yaga Sarino Molhay ug Mrs. Porfita Sario Libanda nga parehong residente sa Brgy. Manalog.

Si Molhay natawo niadtong Mayo 20, 1920, samtang si Libanda natawo niadtong Nobyembre 4, 1921.

Giila sila pinasubay sa Republic Act 10868, the Centenarian Act of 2016, nga nag-ila sa mga Pilipino nga moabot og 100 anyos.

Si City Mayor Jay Warren R. Pabillaran, inubanan sa Barangay Manalog Council sa pagpangulo ni Barangay Chairman Roney Lagunday, 9th Sanguniang Panglungsod, Office of the Senior Citizens Affairs (OSCA) ug City Social Welfare and Development Office (CSWDO) personnel, ang nitunol sa tseke mismo sa panimalay sa mga benepisaryo sa Brgy. Manalog.

Subay sa City Ordinance No. 988, series of 2021, ang Syudad sa Malaybalay mihatag sa matag centenarian og isa ka higayon nga insentibo nga P100,000.00, uban ang cake ug bouquet sa mga bulak.

Sila ang ikaduha ug ikatulo nga centenarian nga nakadawat sa maong mga insentibo gikan sa City Government sukad naaprobahan ang lokal nga ordinansa. (melbmadera)

6 LGUs misumite og SB resolutions sa pagdeklarar sa State of Calamity

Posted on by Diego M. Hidalgo

Nakasumite ngadto sa PGO-PDRRMD ang unom ka mga LGUs sa Bukidnon sa ilang SB Resolutions nga nagdeklara sa ilang area of responsibility ubos sa state of calamity, gumikan sa nasinati nga taas nga panahon sa ting-init o dry spell

Sumala sa social media page sa provincial government sa Bukidnon, ang unom ka mga munisipyo mao ang Kibawe, Kitaotao, Quezon, Cabanglasan, Pangantucan, ug Impasugong.

Nakasumite usab sa ilang report sa kadaot sa hulaw ang Kadingilan, Damulog ug Valencia City apan wala magdeklara sa state of calamity.

Sa punto sa Valencia, ang City Disaster Risk Reduction Managemernt Council (CDRRMC) nagpalabang og resolution nga nagrekominda sa konseho sa maong dakbayan alang sa deklarasyon sa State of Calamity.

Nasayran ang kasayoran sa report ni Mr. Israel Johan M. Damasco, Jr., head sa PGO-PDRRMD atol sa radio program sa PGB – “ang Kalihukan sa Probinsya” kaniadtong Mayo 17, 2024.

Iyang gibatbat ang Revised Guidelines alang sa Declaration of a State of Calamity sa NDRRMC.

Pipila nini mao nga at least 15 percent sa forecasted affected population basi sa science-based projection nga nanginahanglan sa dinalian nga tabang; at least 30 percent sa nag-unang panginabuhian sa sektor sa agrikultura, negosyo ug industriya ang naapektuhan; lapad nga kadaut sa mga fishpond, pananom, manok ug kahayupan, ug uban pang suplay sa agrikultura; ug uban pa. (Diego M. Hidalgo)

Isa ka tunghaan sa Lantapan nasunog

Posted on by Diego M. Hidalgo

Isa ka sunog ang miigo sa Capitan Juan Integrated School sa Purok 1, Brgy. Capitan Juan, Lantapan, Bukidnon hapon sa Mayo 18, 2024

Upat ka mga lawak ang nasunog ug isa ka lawak ang partially burned.

Sumala kini sa report ni Police Major Jessie James M. Lasdoce, OIC sa Lanatapn Municipal Police Station.

Gipahigayon ang pasiunang imbestigasyon sa sa dapit ang gihimo sa Fire Arson Investigator sa Bureau of Fire Protection (BFP) Lantapan.

Subay niini, ang hinungdan sa sunog mao ang isa ka mibuto nga electric grid.

Ang sunog sa ulahi midako tungod sa gaan nga mga materyales ug pagkauga sa giingon nga mga materyales nga gitaod sa edipisyo.

Walay kaswalti o nasamdan sa hitabo.

Ang gibanabana nga structural damage, lakip na ang mga butang, kapin o kulang PhP1,000,000.00. (Diego M. Hidalgo)

51st broadcaster’s month celebration giabrihan sa KBP Bukidnon

Posted on by Melchor Madera

Pormal nga giabrihan kaniadtong Abril 1, 2024 sa Kapisanan ng mga Brodkaster ng Pilipinas (KBP) Bukidnon Chapter ang mga kalihokan niini alayon sa selebrasyon sa 51st Broadcaster’s Month

Ang kalihokan gisugdan sa isa ka motorkada sa sentro sa Munisipyo s Maramag.

Gisundan kini sa isa ka programa nga gipahigayon sa Covered Court sa
Philippine Countryville College (PCC) sa Brgy. Panadtalan, Maramag, Bukidnon.

Si Rev. Fr. Jonathan Tianero, chairman sa KBP Bukidnon Chapter ug station manager sa DXDB, ang mihatag sa pangbukas nga mga pulong.

Samtang si Maam Nonita Rosales, regional consultant sa KBP, mipasabot sa
KBP Broadcaster’s month rationale.

Dinapit nga mamumulong si Atty. Isha B. Corbeta.

Gipaambit ni Corbeta ang kamahinungdanon sa media o radio broadcasting sa katilingban o komunidad.

Ang kalihokan gitambongan sa mga opisyal ug miyembro sa KBP Bukidnon
Chapter.

Sa laing bahin, alayon sa selebrasyon, gipahigayon usab sa PCC ang
Bloodletting activity nga gidumala sa Philippine Red Cross Bukidnon
Chapter nga nagdala sa temang “Dugo Mo, Kinabuhi Ko.”

Mikabat sa 50 ka criminology students ug faculty sa PCC ang nidonar og dugo. (melbmadera)

Publiko gihimangnoan sa paglikay sa heat stroke

Posted on by cmn

Gipahimangnoan sa Provincial Government of Bukidnon ang publiko nga magmaigmat ug hinumduman ang mga pamaagi o mga angayang buhaton aron malikay sa heat stroke

Ang heat stroke isa ka kondisyon nga magresulta tungod sa pagtaas sa body temperature o sobrang kainit sa lawas, nga kasagarang mabatian tungod sa dugay nga pagbulad sa adlaw.

Kung dili kini malikayan o matambalan, posibleng magresulta sa pagkadaot sa utok, kasingkasing o kaunuran og labing delikado, maghatag ug taas nga risgo, komplikasyon ug kamatayon sa tawo.

Aron malikayan kini, ilabi na niining panahon sa hulaw, limitahi ang taas nga oras nga pagpundo sa gawas; inom ug daghang tubig; pagsuot sa kalo, long sleeved nga bisti og kanunay nga magdala sa payong kung mogawas; ug kung adunay mga heavy-duty activities sama sa pag-jogging, buhaton kini sa buntag o hapon kung aha walay mabatian nga sobrang kainit sa adlaw. (PR/LGU-Bukidnon)

100 gardeners misalmot sa Kaamulan 2024 Garden Show contest

Posted on by cmn

Mikabat sa 100 ka individual gardeners ang musalmot sa Kaamulan 2024 Garden Show Contest sa Provincial Government of Bukidnon

Sumala sa kasayoran, ang contest ipahigayon karong Abril 16, 2024.

Adunay unom (6) ka mga kategoriya ang maong pa-contest.

Kini gilangkuban sa Flowering, Aglaonema, Foliage, Philodindron, Ferns ug Bonsai.

Ubos kini sa pagpasiugda ni Engr. Lota Gamboa, garden show coordinator.

Alang sa mga plantito ug mga plantita, mamahimo nilang bisitahon ang mga booth nga anaa atbang sa RTC Building sa Kaamulan Park (Capitol Grounds) sa Malaybalay City. (PR/PGB)

Mag live-in gipamusil sa Quezon

Posted on by Diego M. Hidalgo

Patay ang isa ka lalaki samtang samdan ang kapuyo niini human sila gipamusil sa Purok 6, Brgy. Magsaysay, Quezon, Bukidnon gabii sa Marso 29, 2024

Sumala sa report ni Police Lt. Col Noel F. Cano, OIC sa Quezon Municipal Police Station, nadala pa sa Quezon Health Center Infirmary ang mga biktima.

Apan ang lalaki kinsa nakaangkon sa grabing mga samad pinusilan sa lawas ang gideklarang patay na sa wala pa mahiabot.

Samtang ang iyang kapuyo kinsa nakaangkon sa samad pinusilan sa tuong tiil ug tiyan ang gibalhin sa Bukidnon Provincial Hospital sa Maramag, Bukidnon.

Nasayran sa imbestigasyon sa kapolisan sa Quezon nga ang mga biktima nag-atiman sa ilang food stall alang sa selebrasyon sa Araw ng Barangay sa dihang gipusil sa suspek gamit ang wala masayring kalibre sa armas.

Ang suspek nisibat padulong sa Arakan, North Cotabato ug padayon pa kining gipangita.

Nakuha sa dapit sa krimen ang unom ka kapsola sa bala sa armas.

Padayon pa sab ang imbestigayon sa kapolisan aron pag-ila sa suspek ug pagsuta sa motibo sa krimen. (Diego M. Hidalgo)

Lalaki nahulog sa roof top sa tennis court

Posted on by Omar Rashid Z. Abdullah

Isa ka lalaki ang namatay sa gidalhan nga hospital human nahulog sa roof top sa tennis court sa isa ka tunghaan sa Valencia City, Bukidnon

Sumala sa kasayoran, ang biktima nailang si Cristian Ela, 20, residente sa Mt. Nebo, Valencia City.

Ang biktima nagtrabaho sa Mountain View College (MVC) sa Mt. Nebo.

Nadala pa siya sa Adventist Medical Center-Valencia City apan namatay pipila ka oras ang milabay.

Gikataho nga samtang nagtrabaho ang lalaki sa roof top sa tennis court sa tunghaan, na-slide ang atop nga iyang gitangtang hinungdan sa iyang pagkahulog. (Omar Rashid Z. Abdullah)

Tawo giduggab sa igsoon sa Kibawe

Posted on by Diego M. Hidalgo

Isa ka lalaki ang gidunggab patay sa iyang manghod didto sa Purok 9, Romagook, Kibawe, Bukidnon

Ang insidente nahitabo gabii sa Marso 26, 2024, sumala kini sa report ni Police
Major Jayvee G. Babaan, OIC sa Kibawe Municipal Police Station.

Ang 31-anyos nga biktima nakaangkon sa grabing samad dinunggaban sa tuong dughan ug tiyan.

Gidala siya sa Bukidnon Provincial Hospital (BPH) sa Kibawe, Bukidnon apan gideklarar siyang patay sa niatiman nga doktor.

Sumala pa, sayong gabii sa maong petsa, samtang tua sa Barangay Pay-as, Kadingilan, Bukidnon, ang duha samtang nagka-inom sa ilimnong makahubog ang nagkalalis nga niresulta sa pagsinumbagay.

Pagkahuman, ang suspek niadto sa panimalay sa ilang ginikanan sa Romagook aron magkuha sa iyang mga sinina.

Ang duha nagkakita didto pag-usab diin gihapak sa biktima ang walang bukton sa suspek gamit ang palwa sa lubi.

Gumikan niini gihublot sa 26-anyos nga suspek ang iyang dalang kutsilyo ug gidunggab ang iyang magulang makaduha ka higayon.

Ang suspek nasikop sa niresponding kapolisan.

Walay pagsinabtanay sa managsoon ang nakitang motibo sa krimen. (Diego M. Hidalgo)

1 patay, 1 angol human nakuryentihan sa Maramag

Posted on by Omar Rashid Z. Abdullah

Gidala sila sa Saint Joseph Southern Bukidnon Hospital. Patay ang isa ka lalaki samtang angol ang kauban niining trabahante human nakuryentihan sa ilang gitrabahoan sa Purok 8, Brgy. San Miguel, Maramag, Bukidnon

Sumala sa report nahitabo kini niadtong Marso 27, 2024 samtang nagtabaho sa Universal Harvester Dairy Farm Inc. sa dapit.

Gidala sila sa Saint Joseph Southern Bukidnon Hospital.

Apan ang 35-anyos gideklarar nga dead on arrival samtang luwas ang kauban niini.

Sa imbestigasyon, nasayran nga ang mga biktima nagpahigayon og
maintenance repair sa supply sa water pump sa motor pool area sa maong
kompanya.

Samtang ang isa kanila naunlod sa water storage pool, nakuryentihan siya
ug nisinggit og tabang.

Niambak sa pool ang kauban nga trabahante apang nakuryentehan sab
siya.

Nakuha sila sa ilang duha ka mga kauban ug gidala sa hospital human
napalong ang breaker switch. (Omar Rashid Z. Abdullah)