Saturday, November 23, 2024

Tag: Rice Achievers Award

Turnover ceremony sa bag-ong Agricultural Training Center, gipahigayon

Posted on by cmn

Gipahigayon ang turnover ceremony sa bag-ong Agricultural training center sa San Victores St. lungsod sa Malaybalay, adlaw nga Martes, Abril 18, 2023

Gipangunahan ang ribbon cutting ni Governor Rogelio Neil P. Roque inubanan nila ATI Regional Director Maria Lydia A. Echavez, Acting Provincial Agriculturist Jaqueline Julia A. Lagamon, POC Bukidnon Chief Dr. Janet D. Lopez, SP Board member committee chair on agriculture Benito U. Baguio, diin mihatag sa iyang mensahe mahitungod sa direksyon ug mga plano sa pangagamhanang probinsyal sa Bukidnon nga tutukan ug hatagan ug dakong pagtagad ang agrikultura tungod kay ang Bukidnon usa ka “agriculture province” ug usa ka “agriculture country” ang Pilipinas.

Gipasigarbo usab ni Gov. Roque ang umaabot nga dakong proyekto sa pangagamhanang probinsyal nga 132 hectares sa lugar sa Kibenton, Impasug-ong nga tukoran sa pasilidad sa agrikultura.

Ang maong proyekto natukod pinaage sa pundong nadawat sa probinsya isip premyo gikan sa Department of Agriculture, 2018 Rice Achievers Award. (LGU Malaybalay)

Bukidnon midawat sa Rice Achievers Award 2019

Posted on by cmn

Nadawat sa probinsya sa Bukidnon ang Rice Achievers Award 2019 ug uban niini ang P4M nga tseke isip ganti.

Sa kasayoran sa Public Affairs, Information and Assistance (PAIA) Division sa buhatan sa Gobernador, ang tseke personal nga gitunol ni Carlene C. Collado, executive director sa Department of Agriculture Region-10 ug Maria Lydia Adviento Echavez, OIC Center Director ngadto sa mga opisyales sa Bukidnon nga gipangunahan ni Engr. Alson G. Quimba, provincial agriculturist didto sa Veranda, Brgy. Casisang, Malaybalay City kaniadtong Agosto 17, 2020.

Nahimo nang Hall of Famer ang Bukidnon human kini midawat sa ika-unom na nga higayon sa susamang award.

Ang Bukidnon nahiapil sa Category A diin mokabat ngadto sa 25,000 ektarya pataas ang luna nga gitamnan sa humay.

Isa sa gibasihan sa maong award ang pagsaka sa tonelada sa ani sa mga mag-uuma sa probinsya nga gikan sa 4.52 tons yield per unit area sa tuig 2018, misaka kini ngadto sa 4.57 tons yield per unit area sa tuig 2019.

Lakip usab nga gibasihan ang mga programa ug inisyatiba sa probinsya aron matabangan ang mga mag-uuma nga mas mapalambo pa ang ani sa ilang mga kaumahan.

Dinhi sa Bukidnon, lakip nga inisyatiba ug programa sa Provincial Agriculture Office ang pagpanghatag ug mga gamit sa pagpanguma sama sa tractor, semilya sa humay ug pagpahigayon ug mga trainings ug seminar ngadto sa mga mag-uuma sa tagsa-tagsa ka mga LGU’s.

Mapasalamaton si Gov. Jose Ma. R. Zubiri, Jr. sa mga nagpasiugda sa maong pasidungog diin naila ang mga paningkamot sa probinsya sa pagtabang sa mga mag-uuma ilabi na nga ang Bukidnon mao ang Food Basket of Mindanao.

Ang Rice Achievers Award tinuig nga gipahigayon sa Department of Agriculture sa koordinasyon sa Agricultural Training Institute nga nag-ila sa mga rice industry achievers diin tumong niini nga madasig ang mga mag-uuma sa humay nga makahatag ug daghang ani aron makahatag ug hustong suplay sa bugas atong nasod. (Omar Rashid Z. Abdullah)