MALAYBALAY CITY – Ang Technical Education and Skills Development Authority (TESDA) ug Bukidnon Technical-Vocational Institutions Association (BUKTIA) mipahigayon og forum aron aron mahatagan sa impormasyon ug balita ang mga technical-vocational nga mga institusyon kabahin sa mga programa sa Technical-Vocational Education and Training (TVET), mga scholarship, oportunidad sa trabaho, ug mga panginahanglanon sa industriya
Matud ni TESDA-10 Regional Director Dan M. Navarro, tumong sa forum ang pagpadayon sa paghatag importansya sa TVET ug suporta sa mga eskwelahan aron mapalambo ang kalidad sa technical-vocational education, pagsalmot sa mga koneksyon sa mga kauban sa industriya, mga employers, ug mga stakeholders, ug lig-on nga kooperasyon tali sa mga TVET ug employers.
“Nagkatigom kita dinhi karon aron pagseguro nga mahatag sa TESDA ngadto sa atong mga partner, lakip ang pagpahigayon sa mga programa, paghatag sa training ug edukasyon matag tuig ngadto sa kadaghanan,” matud ni Navarro.
Dugang pa niya, ang BUKTIA nagpahibalo sa TVET sektor ug nagpromote sa importansya niini sa pagpalambo sa mga trabahante ug ekonomikanhong kalamboan sa nasud pinaagi sa paghatag og mga plataporma alang sa ‘sharing of best practices’–gamit ang mga bag-ong paagi–tali sa mga institusyon.
“Sa atong pasalig sa pag-atiman sa mga indibidwal nga nanginahanglan, ilabi na kadtong nag-depende sa gobyerno, karon dunay mga oportunidad nga atong gidawat alang sa dugang mga scholarship programs ug alokasyon,” dugang ni Navarro.
Gipasabot niya nga ang forum maoy makatabang diha sa pagkuha sa mga feedback gikan sa mga Technical-Vocational Institutions (TVIs). Kini nga mga impormasyon, matud pa niya, makatabang sa pagpauswag sa mga patakaran, regulasyon, ug mga katuyo-an sa mga nagdumala sa technical-vocational education.
Tungod niini, giseguro sa TESDA nga ang mga patakaran nga ipatuman maoy makab-ot ug masabtan diha sa panginahanglanon sa industriya ug sa mga ga-training o ga-eskwela, dugang pa niya.
Mikabat sa 80 ka indibidwal ang misalmot sa forum gikan sa mga eskwelahan nga naglangkob sa mga registrar, mga asosasyon sa industriya, mga representante sa tech-vocational institution, mga opisyal sa TESDA sa rehiyon ug probinsya, ug mga stakeholders. (KEEA/PIA-10/Bukidnon)