Dinalian nga gisubay sa 27th Sangguniang Panlalawigan (SP), pinaagi sa Resolution No. 2023-985 (27th SP), ang investigation result nga gipasiugdahan sa National Telecommunication (NTC) Region 10 kabahin sa gisaad nga imbestigasyon sa hinay ug gakawala-wala nga signal sa mga cellular phones sa probinsya, hinungdan nga adunay mga short message service (SMS) nga napadala na apan wala madawatan sa gipadalhan ug wala man lang pahibalo nga “message sent failed”
Sunod-sunod na nga committee meetings ang gitakda sa SP aron mahatagan ug katin-awan ang problema sa cellphone signal, uban ang Telecommunication (Telco) operators sa Bukidnon, sama sa Globe Telecom, Inc., DITO Telecommunity, Converge ug Smart Communications, Inc. Sa deliberasyon, nasuta nga wala masayud ang mga Telco operators nga nagka-problema ang ilang serbisyo dinhi sa probinsya, rason nga mipadayag si NTC 10 Regional Director Teodoro D. Buenavista, Jr. sa SP nga iyang hangyoon ang NTC Manila nga sugdan ang imbestigasyon sa maong hisgutanan.
Alayon niini, mipalabang na usab ug laing resolusyon ang 27th SP, pinaagi ni Board Member Nemesio B. Beltran, Jr., nga nag-awhag sa NTC Central Office sa pagpahigayon dayon sa imbestigasyon aron mapahibalo ang katawhan kung unsa ang nahitabo sa sistema sa nasangpit nga mga Telco providers.
Gawas niana, nagpadala usab ug sulat si RD Buenavista, pinetsahan Nobyembre 9, 2022, ngadto kang NTC Deputy Commissioner, Hon. Ella Blanca B. Lopez nga naghangyo sa pag-imbestiga sa nadawat nga mga reklamo gikan sa mga subscribers. Samtang usa ka Memo usab ang gi-issue ni Engr. Vixter A. Abaday gikan sa NTC-10, sa susamang katuyuan.
Ang kadaot sa signal nakahatag ug kahasol sa mga subscribers, ilabi na kadtong mga trabaho ug transaksyon nga nakadepende sa text messages, busa ang maong resolusyon gikonsidera sa 27th SP nga dinalian. (PR)