“Together, our overall goal is to make the application of the Universal Health Care Law as immediate as possible, given our limited resources”, tipik sa mensahe ni Provincial Governor Rogelio Neil P. Roque, sa gipahigayon nga Monthly Convocation Program, Abril 3, 2023, sa Kaamulan Open Theater, Malaybalay City, Bukidnon.

Gibutyag ni Governor Roque nga pinaagi sa UHC, ang tanang katawhan makabenepisyo sa patas, dekalidad ug barato nga serbisyo alang sa maayong panglawas, taliwala sa pinansyal nga kawad-on. Gisiguro usab niini nga pinaagi sa mga Bukidnon Provincial Hospitals (BPHs), mas mapalambo ang serbisyo alang sa katawhan, aron makabaton sila sa himsog nga panglawas ug mapanalipdan gikan sa mga balatian.

Dako usab ang paglaum ni Governor Roque nga pinaagi sa Provincial Economic Enterprises Development and Management Office (PEEDMO) ug Local Economic Development and Investment Promotion Office (LEDIPO), ang lalawigan adunay dakong potensyal nga mamahimong usa ka investment destination ug makahimo sa pagkig-alayon sa mga pribadong negosyo.

Gipahayag ni Atty. Roger L. Ligdo, OIC PEEDMO/OIC PIASO, nga taliwala sa nasinati nga health crisis tungod sa COVID-19 nga nakaapekto sa sektor sa ekonomiya ug maayong panglawas, nagpabilin ang lalawigan nga malig-on ug nagpadayon sa operasyon niini.

Gipakisayod usab sa Provincial Health Office (PHO), pinaagi sa ilang 2022 Accomplishment Report nga ang probinsya sa Bukidnon nagpabilin isip Malaria ug Filariasis Free sulod sa sobra lima na ka tuig.

Sa maong higayon, pormal usab nga gitunol sa Hedcor Group, usa ka subsidiary sa AboitizPower, ang kapin sa 2-milyones ka pesos nga community share ngadto sa PGB, gikan sa 2nd half generation sa tuig 2022 sa Manolo Fortich 1 & 2 hydro power plants. Gipanghinaot nga pinaagi sa maong tabang pinansyal, mahatagan ug kalambuan ang komunidad ilabi na ang mga Indigenous People (IP) community.

Ang Monthly Convocation sa bulan sa Abril gipasiugdahan sa mga mosunod nga sponsoring offices: PEEDMO, PHO, LEDIPO ug ang walo ka mga Bukidnon Provincial Hospitals sa probinsya. (LGU Bukidnon)