Napadayon ug naprotektahan sa labing maayo ang Drug-Cleared Retention Status sa 11 ka barangay sa dakbayan

Matod sa Facebook post sa city government sa Malaybalay, kini usa ka lig-on nga pagpamatuod sa walay puas nga paningkamot sa City Government sa pagpalambo og luwas, himsog, ug drug-resilient nga mga komunidad, ubos sa pagdumala ni City Mayor Hon. Jay Warren R. Pabillaran.

Ang 11 ka mga barangay mao ang Brgy. 2, Brgy. 4, Caburacanan, Capitan Angel, Indalasa, Maligaya, Laguitas, Manalog, Kibalabag, Mapayag, ug Sto. Niño.

Kini nga kalampusan nagpakita dili lamang sa lig-on nga lokal nga liderato apan usab sa aktibong partisipasyon sa mga miyembro sa komunidad ug kauban nga ahensya nga kanunay nagasuporta ug nagpalig-on sa mga anti-drug nga inisyatibo.

Ang kalampusan sa maong kalihokan nahimo pinaagi sa teknikal nga giya ug suporta sa Anti-Drug Abuse Council (ADAC) Focal Person nga si Ms. Ma. Grace Jonah C. Ronolo ug CLGOO Ms. Amalia A. Propia, nga nagsiguro sa husto, kredible, ug maayong pagpatuman sa proseso sa evaluasyon.

Gipalig-on pa gyud ang kalihokan pinaagi sa presensya ni City Administrator Atty. Anna Marie R. Bergado, Police Captain Ernie B. Cabrera, ug PMSg Ken P. Hanzel Bughaw, nga ang ilang partisipasyon nagpakita sa nagkahiusang paningkamot sa City Government sa pagmintinar sa kalinaw, kahusay, ug seguridad sa publiko sa tanang barangay.

Gihimo kaniadtong Nobyembre 11, 2025, sa DILG Region X Office, Masterson Avenue, Upper Carmen, Cagayan de Oro City, kini nga kalampusan nagpasabot sa padayon nga kolaborasyon tali sa DILG, Philippine National Police, ug City Government sa Malaybalay sa pagpanalipod ug pagpalambo sa drug-free nga mga komunidad.(melbmadera)