Mikabat sa 118 sa 130 ka kwalipikadong benepisyaryo nga mga octogenarian ug nonagenarian sa Malaybalay ang nakadawat na sa ilang cash gift nga nagkantidad og P10,000 matag usa

Sa maong ihap, kinatibuk-ang P1,180,000 ang natunol ngadto sa mga benepisyaryo nga gikan sa 46 ka barangay sa dakbayan.

Sumala sa kasayoran, gipahigayon ang payout kaniadtong Marso 17, 2026, sa buhatan sa Office of the Senior Citizens Affairs (OSCA) sa City Hall Compound, Barangay Casisang, Malaybalay City, Bukidnon.

Kini gihimo subay sa Republic Act No. 11982 o ang “Expanded Centenarians Act,” nga naghatag og pinansyal nga insentibo sa mga senior citizens nga nag-edad og 80, 85, 90, ug 95.

Ang maong programa gipasiugdahan sa national government uban sa lig-on nga suporta sa City Government of Malaybalay ubos sa liderato ni City Mayor Jay Warren R. Pabillaran, nga nagtinguha sa pagpasidungog ug paghatag og dugang nga suporta sa atong mga katigulangan. (melbmadera)