Gilantaw nga dakong tabang sa pagpalambo sa Bukidnon Coffee Industry ang 294 ka mag-uuma nga migradwar sa School on the Air (SOA) program alang sa coffee production and establishment. Ang maong programa gipasiugdahan sa Provincial Agriculture’s Office niadtong Enero 13, 2026, sa Kaamulan Open Theater, Kaamulan Park, Malaybalay City, Bukidnon

Gipangunahan ni Governor Rogelio Neil P. Roque ang graduation ceremony, diin iyang gidasig ang mga mag-uuma nga i-apply sa hingpit ang ilang nakat-unan aron mapataas ang ani sa kape ug mapalig-on ang papel niini sa ilang panginabuhi ug sa lokal nga ekonomiya.

Sumala kang Nelda L. Balaba sa San Miguel, Maramag, Bukidnon—usa sa mga migradwar—interesado sila sa pagtanum og kape tungod kay makatabang kini sa pagpasig-uli sa kalasangan, pagpalambo sa biodiversity, ug tungod usab sa taas nga demand sa maong produkto.

Gipasalamatan usab ni Adora Lapi-an ang coffee program sa Provincial Government of Bukidnon (PGB). Sumala kaniya, naghatag kini og kahigayonan alang sa malahutayong panginabuhian pinaagi sa pag-apply sa standard recommendations sa pagpananum og kape, nga mahimong instrumento sa paglambo sa industriya sa lalawigan.

Ang School on the Air program gipondohan sa PGB og kapin ₱800,000.00 alang sa 15 ka sesyon nga gisibya sa napulo (10) ka lokal nga estasyon sa radyo, sugod Nobyembre 10, 2025 hangtod Disyembre 12, 2025. (pr)