Tulo ka miyembro sa Sub-Regional Committee 1 (SRC1) sa North Central Mindanao Regional Committee (NCMRC) sa New People’s Army (NPA) ang boluntaryong mi-surrender sa otoridad, matod sa report sa Police Regional Office 10

Nahitabo kini pinaagi sa panaghiusa nga paningkamot sa personnel gikan sa 1004th Maneuver Company, Regional Mobile Force Battalion 10, ug 1st Special Forces Battalion sa Manolo Fortich, Bukidnon, niadtong Nobyembre 24, 2025.

Ang kolaboratibong operasyon nagresulta sa malampusong pagpasayon sa pagsurrender sa mga mosunod nga personalidad sa Communist Terrorist Group (CTG) nga nailhan sa alias nga “Reboy/Baren,” 40-anyos, 2nd Deputy Secretary sa SRC1, NCMRC, ug residente sa Lagonglong, Misamis Oriental; ug ang iyang asawa nga alias “Angelyn/Banjie,” 30 anyos, Supply Officer sa Sub-Regional Operations Command (SROC), SRC1, NCMRC, ug residente sa Salay, Misamis Oriental; kauban usab si alias “Yonji,” 22 anyos, Medic sa Sub-Regional Operations Command (SROC), SRC1, NCMRC, ug residente sa Gingoog City, Misamis Oriental.

Ang tulo ka indibidwal nakalista sa Periodic Status Report (PSR). Nakahukom sila nga mobalik sa gobyerno tungod kay kapoy na sila sa pagtago, kanunay nga paglalin-lalin, ug kakulang sa pagkaon.

Ang maong mga personalidad dali dayong gidala sa Headquarters sa 1st Special Forces Battalion sa Brgy. Mampayag, Manolo Fortich, Bukidnon, alang sa custodial debriefing, dokumentasyon, ug husto nga disposisyon. (melbmadera)