Nagmabungahon ang Business Forum nga hiniusang gipasiugdahan sa lokal nga pangagamhanan sa Dakbayan sa Valencia ug sa Valencia City Chamber of Commerce and Industry Association Inc. (VCCCIAI), nga gihimo sa Robinsons Valencia Atrium niadtong Setyembre 30, 2025

Gitambongan kini sa daghang negosyante gikan sa sektor sa Services, Trading, Professionals, Agriculture ug Industry, diin ilang gipaabot ang suporta, interes ug pakigtambayayong alang sa dugang kalamboan sa lokal nga negosyo ug ekonomiya.

Sa iyang mensahe, gipadayag ni Mayor Amie Galario ang hugot nga suporta sa lokal nga pangagamhanan sa pagpangita ug pagpasiugda og mga programa ug inisyatiba nga makapadasig sa mga lokal nga negosyante.

Gidayeg usab niya ang mahinungdanong papel sa mga negosyante isip sentro sa pagpalig-on sa ekonomiya sa dakbayan.

Nagpadayag usab og suporta ang mga miyembro sa 10th Sangguniang Panlungsod, nga gipangulohan ni Vice Mayor Greizl Galario-Fernandez uban sa mga Department Heads, pinaagi sa ilang plano nga pagpalambo sa mga polisiya ug programa nga makabenepisyo sa negosyo ug makahatag og dugang trabaho alang sa mga residente.

Samtang si Carmen Yap, President sa VCCCIAI, mipadayag nga andam ang asosasyon sa pagpanguna sa mga kalihokan nga makahatag og dugang benepisyo sa mga negosyante, ilabi na sa pag-abli og mas daghang oportunidad alang sa networking, partnership ug business linkages.

Gi-awhag usab sa lokal nga pangagamhanan ang tanan nga residente sa dakbayan nga palanggaon ug suportahan ang lokal nga negosyo isip dakong tabang sa pagpalambo sa ekonomiya aron makahatag kini og mas daghang oportunidad sa trabaho ug mapalig-on ang panginabuhian alang sa mga Valenciano.

Nahimong malamposon ang forum nga naghatag og plataporma alang sa diskusyon sa negosyo ug ekonomiya, pagpalig-on sa kooperasyon tali sa publiko ug pribadong sektor, pagpaambit sa impormasyon bahin sa lokal nga mga programa, polisiya ug suporta sa negosyo, pagpaminaw sa mga panginahanglan ug kabalaka sa mga tigpatigayon, ug paghatag og angay nga kasulbaran niini. (pr)