Isip pagsaulog sa Indigenous Peoples (IP) Month, ang 89th Infantry (MAKATAO) Battalion, pinaagi sa Alpha Company nga gipangulohan ni First Lieutenant John Andrew S. Gloriani, nagpahigayon og outreach activity sa Sitio Salumayag, Barangay Halapitan, San Fernando, Bukidnon, kaniadtong Oktubre 9, 2025

Ang kalihukan nagtigum sa militar, lokal nga pangagamhanan sa San Fernando, ug sa IP community sa usa ka panaghiusang kalihokan aron ilhon ang kultural nga panulondon ug kontribusyon sa mga Lumad samtang nagpalig-on sa inklusibong kalamboan sa komunidad.

Matod sa Facebook post sa 89IB, ang kalihukan nakabenepisyo sa kapin 300 ka miyembro sa IP community, lakip ang mga estudyante sa Salumayag Tribal Integrated School.

Naghatag kini og lain-laing serbisyo sama sa Operation Tuli, libre nga medical check-up, pagpanagtag og tambal, school supplies, tsinelas, ug pagkaon — nga nagpakita sa lig-on nga panag-uban ug tinguha sa Army ug LGU sa paghatud sa mga batakang serbisyo ngadto sa hilit nga mga komunidad.

Nahimo nga malampuson ang kalihukan pinaagi sa panaghiusa sa Provincial Government of Bukidnon, nga girepresentahan ni Ms. Stephanie O. Melendez, hepe sa Indigenous Affairs Division, ug sa LGU sa San Fernando ubos sa pangulo ni Mayor Rogelio C. Yeke, uban sa aktibong partisipasyon ni Dr. Ma. Algerlina I. Edma, Municipal Health Officer.

Ubos sa pagpangulo ni Lieutenant Colonel Antonio G. Bulao I, Battalion Commander sa 89th Infantry (MAKATAO) Battalion, ang maong inisyatibo usa ka pamatuod sa nagpadayong panaghiusa tali sa militar ug lokal nga pangagamhanan aron mapalambo ang kalinaw, panaghiusa, ug pag-uswag sa mga komunidad sa Lumad. (melbmadera)