Ang Bureau of Animal Industry (BAI), ubos sa Department of Agriculture – National Livestock Program (DA–NLP), nagpahigayon og documentation ug evaluation visit niadtong Oktubre 9, 2025, aron tas-on ang kalampusan sa pagpatuman sa Cattle Artificial Insemination (AI) Program sa City Veterinary Office – Livestock Program sa Malaybalay City, Bukidnon

Sumala sa Facebook post sa City Government of Malaybalay, ang maong pagbisita gitumong sa pag-ila sa kaepektibo sa mga inisyatiba sa AI sa siyudad pinaagi sa pakighinabi sa mga benepisaryong mag-uuma ug pagdokumento sa mga success stories nga nagpakita sa kontribusyon sa programa sa pagpauswag sa kita sa panimalay ug produktibidad sa baka.

Ang mga representante gikan sa BAI–National Livestock Program Central Office mao sila si Chery Itig ug Laichel Balabag, samtang ang Department of Agriculture – Regional Field Office 10 (DA–RFO 10) girepresentahan ni Johari Tabiliran. Ang City Veterinary Office – Livestock Program team gipangulohan ni Dr. Omar T. Cahanap ug Rene Reyes.

Ang Malaybalay City girekomenda sa DA–RFO 10 isip top-performing local government unit sa Rehiyon 10 tungod sa padayon nga kalampusan niini sa pagpatuman sa AI Program.

Pinaagi sa episyente ug sustinidong serbisyo sa AI, ang City Livestock Program nakapauswag sa produktibidad sa baka ug nakahatag og dakong tabang sa panginabuhian sa mga lokal nga mag-uuma — nga nakahimo niini nga modelo nga angay sundon sa ubang lugar.

(melbmadera)