Gipanglarot sa hiniusang puwersa sa kapolisan ang marijuana plantation sa likod sa tourism area sa Purok 9, Brgy. Poblacion, Impasugong, Bukidnon, buntag sa Disyembre 1, 2025

Nakumpiska sa kapolisan ang 122 hills sa fully grown marijuana plants, usa ka bundle sa gidudahang dried marijuana leaves nga nitimbang sa 2,000 gramos, ug 35 ka alleged marijuana seedlings.

Lakip sab nga nakuha sa kapolisan ang usa ka plastic container sa gidudahang marijuana seeds nga nitimbang sa 10 gramos, usa ka improvised air gun, ug usa ka water container.

Sa kinatibuk-an, mikabat sa PhP265,350.00 ang kantidad sa nasakmit nga marijuana.

Sa report ni Police Major Dominador V. Orate Jr., OIC sa Impasug-ong Municipal Police Station, nasayran nga naila na nila ang duha ka mga lalaking suspek nga planters nga nag-edad og 40 ug 32-anyos apan nagpabilin sila nga at-large.

Kasong paglapas sa Section 16 sa RA 9165 (Cultivation or culture of plants classified as dangerous Drugs) ang giandam na nga ipasaka sa buhatan sa Provincial Prosecutor, Malaybalay City, Bukidnon.

Ang tanang na-ibut nga giingong marijuana anaa na sa kustodiya sa Impasugong MPS alang sa tukmang disposasyon, samtang ang mga nakumpiska nga ebidensiya sa drugas gidala sa Provincial Forensic Unit, Malaybalay City, Bukidnon, alang sa qualitative ug quantitative examinations.

Uban sa mga miyembro sa Impasugong MPS sa anti-Illegal drugs operation ang Bukidnon PIU 10, RDEU 10, Buk PDEU 10 ug Bukidnon 1st PMFC 10. (Omar Rashid Z. Abdullah)