Tuesday, July 23, 2024

Author: Omar Rashid Z. Abdullah

SOPA, Foundation Day 2024 gipangandaman na

Posted on by Omar Rashid Z. Abdullah

Gipangandaman na sa Provincial Government sa Bukidnon ang umaabot nga State of Provincial Address ni Provincial Governor Rogelio Neil P. Roque

Sumala sakasayoran sa PGB, lakip sab nga gipangandaman ang ika-110th Founding anniversary sa probinsya.

Ang panagtigum sa Provincial Events Committee natigayon kaniadtong Hulyo 15, 2024 sa PHRMO Conference Room sa Provincial and National Building, Capitol Compound, Malaybalay City, Bukidnon.

Nahisgutan ang mga kinahanglanon alang sa traffic scheme, kahusay ug kalinaw, ug mga imbitado sa SOPA.

Samtang ang mga kalihokan sa foundation day naglakip sa misa, parada, tree planting, air sports show, concert, hot air balloons ug uban pa. (Omar Rashid Z. Abdullah)

711 TUPAD beneficiaries sa 3 munisipyo gihatagan og sweldo

Posted on by Omar Rashid Z. Abdullah

Mikabat sa 711 ka mga benepisaryo sa Tulong Panghanapbuhay sa Ating Disadvantaged (TUPAD) program gikan sa tulo ka munisipyo sa habagatang bahin sa Bukidnon ang nakadawat na sa ilang suweldo

Gikumpirma kini sa Department of Labor and Employment (DOLE-X) Bukidnon Provincial Field Office (BukPFO) pinaagi sa ilang social media post.

Ang Tupad payout gipahigayon kaniadtong May 23, 2024 sa Damulog, Kitaotao ug Don Carlos, Bukidnon.

Ang kalihokan gipangunahan ni Raul L. Valmores, provincial director sa DOLE Bukidnon.

Kauban niya ang Tupad Focal nga si Reyna Tagailo ug TUPAD Coordinators.

Ang DOLE-X BukPFO nagpagawas og ₱1,014,360.00 nga kantidad sa suweldo sa mga benepisyaryo matag munisipyo.

Ang matag benepisyaryo nakadawat og ₱4,280.00 isip suweldo sa ilang 10 ka adlaw nga trabaho.

Nitambong sa kalihokan sila third district provincial board members Minerva C. Casinabe ug Joseph Palmada, Damulog Mayor Melino Buro, Kitaotao Mayor Edwin Abucayan, Kitaotao Vice Mayor Mary Ann Gawilan Angit, Don Carlos Mayor Ma. Victoria O. Pizzaro, ug si Audrey Tan-Zubiri, asawa ni Senator Migz Zubiri.

Ang TUPAD isa ka community-based package of assistance nga naghatag og emerhensya nga trabaho para sa mga bakwit, kulang sa trabaho ug seasonal nga mga trabahante. (Omar Rashid Z. Abdullah)

IP group sa Kitaotao nakadawat og P5.2-M swine production facility

Posted on by Omar Rashid Z. Abdullah

Ang Department of Agriculture – Regional Field Office 10 (DA-RFO 10) mitugyan sa P5.2-million bio-secured ug climate-controlled swine production facility ngadto sa Sinuda Multi-Indigenous Sectoral Farmers and Workers Association (SIMUSOFAWA) niadtong Mayo 23, 2024 sa Kitaotao, Bukidnon

Sumala sa kasyoran gikan sa DA-RFO 10, tumong niini aron ma-moderno ug mapausbaw ang kapasidad sa lokal nga industriya sa baboy.

Si DA-10 Regional Executive Director Jose Apollo Y. Pacamalan ug Farmer-Director Nilda B. Salas, ang nangulo sa pagtunol sa certificate of turnover ngadto kang SIMUSOFAWA chairperson Datu Domino A. Pangcat nga nagpasabot sa pagbalhin sa pagpanag-iya ug operasyon sa pasilidad.

Ang 2,000-square-meter bio-secured swine facility, nagkantidad og P3,827,241.08.

Kini adunay perimeter fence, opisina, climate-controlled animal housing, biogas waste management system, basic farm equipment, ug shower area.

Kabahin usab sa component ang feeds, hog scale, animal stocks, ug mga tambal ug biologics, sa kinatibuk-an nga P1.451-M.

Sumala sa Livestock focal person nga si Jamaica L. Docdoc, ang proyekto kabahin sa Integrated National Swine Production Initiatives for Recovery and Expansion (INSPIRE) Program sa DA. (Omar Rashid Z. Abdullah)

Mga mag-uuma sa sloping area gitudloan sa sustainable land management

Posted on by Omar Rashid Z. Abdullah

Gitudloan sa Provincial Agriculture Office ang mga mag-uuma sa Bukidnon kansang umahan nahimutang sa slope areas o bakilid nga bahin, pinaagi sa Sustainable Land Management (SLM) Training

Sumala sa kasayoran sa PGB, sa maong pagbansay, ang mga mag-uuma gitudloan sa malungtarong pagdumala sa yuta.

Ang training naglangkub sa agriculture and type of food production, integrated pest management, hinungdan og epekto sa soil pollution, soil erosion ug soil conservation and management.

Tinguha niini aron masuportahan ang pagtubo sa ekonomiya, kaayohan sa katilingban, ug pagpadayon sa kalikopan.

Ang kalihukan gitimbayayongan sa PGO- Provincial Disaster Risk Reduction and Management Division (PDRRMD) alang sa mosunod nga mga dapit.

Ang sa Lantapan gipahigayon niadtong Mayo 7-8, Maramag niadtong Mayo 9-10, Quezon- Mayo sa 14-15, Impasugong sa Mayo 16-17, Sumilao niadtong Mayo 21-23, Manolo Fortich- Mayo sa 23-24, San Fernando sa 28-29, Valencia City sa Mayo 30-31, Kalilangan karong Hunyo 4-5 ug Kadingilan sa Hunyo 6-7, 2024. (Omar Rashid Z. Abdullah)

Pagplastar sa Cultural Monuments sa Kaamulan Park, gisugdan na

Posted on by Omar Rashid Z. Abdullah

Gisugdan na sa Provincial Government sa Bukidnon ang pagmontar sa Cultural Monuments sulod sa Kaamulan Park niadtong Miyerkules

Sumala sa kasayoran sa PGB, ang kalihokan gipangunahan sa Provincial Engineer’s Office.

Gipahigayon ang Panandig Ritual sa Intersection Road sa Brgy. 6 sa Malaybalay City, diin itindog ang monuments.

Ang mga monumento gi-disenyo ni Kublai Millan, isa ka artist sa Lawig-Diwa, kinsa nagsiguro nga safety kini sa kalamidad sama sa linog.

Iplastar sa dapit ang tulo ka major designs nga mao ang shield ug spear, eagle, eagle’s nest.

Ipahimutyang sab sa dapit ang uban pang desinyo nga magrepresenta sa pito ka tribu sa Bukidnon. (Omar Rashid Z. Abdullah)

PGB midawat og P50-M cash assistance gikan kang PBBM

Posted on by Omar Rashid Z. Abdullah

Gidawat sa Provincial Government of Bukidnon (PGB), pinaagi ni Provincial Governor Rogelio Neil P. Roque ang cheque balor ₱50-milyones gikan kang President Ferdinand R. Marcos, Jr.

Sumala sa kasayoran sa PAIA, nahatag kini atol sa Presidential Assistance to Farmers, Fisherfolks, and Families sa Pimentel Convention Center, Cagayan de Oro City niadtong Mayo 16, 2024.

Sa maong okasyon, gipadangat ni Presidente Marcos ang ka-mahinungdanon sa pagtimbayayong –ilabi na ning panahon sa kalamidad, nga dala sa taas nga hulaw.

Dinhi gipasabot sa presidente nga gamay’ng kantidad man ang ilang madawat apan malaumon kini nga subling makasugod ug makabangon ang mga apektadong pamilya dala sa ting-init.

Ang nadawat nga kantidad i-ayuda ngadto sa mga mag-uuma ug mangingisda nga labing naapektuhan sa El Niño, subay sa gitakda nga gabayan sa pag-apod-apod sa maong cash assistance.

Ang PGB ug representante sa DA-Regional Field Units (RFUs) mo-determina sa marginalized families alang sa mga mag-uuma ug DSWD alang sa mga mangingisda ug uban pang marginalized sektor nga grabeng naapektuhan sa hulaw, kinsa modawat sa tag-₱10,000.00.

Gawas sa Bukidnon, ang Misamis Orietal nakadawat sab og ₱50 milyones, ₱24.36-M sa Misamis Occidental, ₱13.92-M sa Lanao del Norte, ₱10.54-M sa Iligan City, ug tag-₱10-M sa Cagayan de Oro City ug Camiguin.

Aduna usab gipahigayon nga ceremonial turnover ngadto sa mga beneficiaries sa nagkadaiyang syudad ug probinsya sa Northern Mindanao, nga gisaksihan sa mga mayor, mga kongresista, ug ingon man sa mga department secretaries and officials. (Omar Rashid Z. Abdullah)

Publiko gipahinumdoman sa paglikay sa rabies

Posted on by Omar Rashid Z. Abdullah

Gipahinumdoman sa Provincial Government of Bukidnon (PGB), pinaagi sa Provincial Health Office (PHO) ug Provincial Veterinary Office ang publiko sa mga angayang buhaton aron malikayan ang rabies

Ang rabies isa ka viral nga sakit nga matakboy gikan sa positibo nga mananap sama sa iro, iring, baboy unggoy o kwaknit pinaagi sa paak, kamras, o kontak sa laway o samad.

Sumala sa social media page sa kagamhanang probinsyal, kung ang isa ka tawo napaakan sa iro o sa laing mananap, hugasan ang pinaakan sa gaagas nga tubig sa gripo ug sabonan sulod sa 15 ka minutos, limpyohan sa 70 percent alcohol o tincture sa betadine ang pinaakan human mahugasan.

Giawhag sab ang publiko nga magpa-konsulta dayon sa doktor o mahimong mobisita sa pinakaduol nga health center o sa 11 ka mga Animal Bite Treatment Center sa probinsya nga nahimutang sa Bukidnon Provincial Medical Center (BPMC), City Health Office sa syudad sa Malaybalay ug Valencia, BPH – Maramag, Manolo Fortich, Kibawe, Kalilangan, Malitbog ug Talakag, Quezon Health Center Infirmary ug RHU Talakag.

Samtang padayon nga gipahimangnuan ang pet owners nga mahimong responsableng tag-iya aron dili makapaak ang ilang binuhing hayop. (Omar Rashid Z. Abdullah)

1 patay, 1 angol human nakuryentihan sa Maramag

Posted on by Omar Rashid Z. Abdullah

Gidala sila sa Saint Joseph Southern Bukidnon Hospital. Patay ang isa ka lalaki samtang angol ang kauban niining trabahante human nakuryentihan sa ilang gitrabahoan sa Purok 8, Brgy. San Miguel, Maramag, Bukidnon

Sumala sa report nahitabo kini niadtong Marso 27, 2024 samtang nagtabaho sa Universal Harvester Dairy Farm Inc. sa dapit.

Gidala sila sa Saint Joseph Southern Bukidnon Hospital.

Apan ang 35-anyos gideklarar nga dead on arrival samtang luwas ang kauban niini.

Sa imbestigasyon, nasayran nga ang mga biktima nagpahigayon og
maintenance repair sa supply sa water pump sa motor pool area sa maong
kompanya.

Samtang ang isa kanila naunlod sa water storage pool, nakuryentihan siya
ug nisinggit og tabang.

Niambak sa pool ang kauban nga trabahante apang nakuryentehan sab
siya.

Nakuha sila sa ilang duha ka mga kauban ug gidala sa hospital human
napalong ang breaker switch. (Omar Rashid Z. Abdullah)

Lalaki nahulog sa roof top sa tennis court

Posted on by Omar Rashid Z. Abdullah

Isa ka lalaki ang namatay sa gidalhan nga hospital human nahulog sa roof top sa tennis court sa isa ka tunghaan sa Valencia City, Bukidnon

Sumala sa kasayoran, ang biktima nailang si Cristian Ela, 20, residente sa Mt. Nebo, Valencia City.

Ang biktima nagtrabaho sa Mountain View College (MVC) sa Mt. Nebo.

Nadala pa siya sa Adventist Medical Center-Valencia City apan namatay pipila ka oras ang milabay.

Gikataho nga samtang nagtrabaho ang lalaki sa roof top sa tennis court sa tunghaan, na-slide ang atop nga iyang gitangtang hinungdan sa iyang pagkahulog. (Omar Rashid Z. Abdullah)

Batang babaye patay, 2 angol sa road mishap sa Don Carlos

Posted on by Omar Rashid Z. Abdullah

Patay ang isa ka batang babaye samtang angol ang duha ka mga drayber human sa road mishap nga nahitabo sa Purok Mauswagon, Barangay Pinamaloy, Don Carlos, Bukidnon hapon sa Marso 2, 2024

Si Police Major Cipriano V. Bazar, Jr., OIC sa Don Carlos Municipal Police Station, miingon sa iyang report nga ang bata nadusmogan sa 10-Wheeler Truck samtang anaa sulod sa ilang panimalay nga anaa sa daplin sa dalan.

 

Ang bata uban sa duha ka mga drayber ang gidala sa Don Carlos Doctor’s Hospital.

 

Apan ang bata gideklarar nga patay nasa wala pa mahiabot.

 

Ang drayber sa truck nakaangkog grabeng kadaot sa lawas ug gi-refer sa Bukidnon Provincial Hospital, Maramag, Bukidnon.

 

Samtang ang drayber sa Bao-bao nagpabilin nga naadmit sa Don Carlos Doctor’s Hospital.

 

Nasuta sa imbestigasyon nga ang 10-Wheeler Truck nagdagan gikan sa habagatang bahin.

 

Sa pag-abot sa dapit sa insidente, nag-overtake kini sa high speed sa tuo nga outer lane, nawad-an og control, nabangga sa solar post ug sa Bao-bao ug nadusmo sa isa ka balay diin tua ang batang babaye.

 

Ang duha ka mga sakyanan nakaangkon og kadaot, nagpabilin sa dapit ug nagpaabot sa isa ka tow truck. (Omar Rashid Z. Abdullah)