Thursday, March 28, 2024

Batang babaye patay, 2 angol sa road mishap sa Don Carlos

Patay ang isa ka batang babaye samtang angol ang duha ka mga drayber human sa road mishap nga nahitabo sa Purok Mauswagon, Barangay Pinamaloy, Don Carlos, Bukidnon hapon sa Marso 2, 2024

Si Police Major Cipriano V. Bazar, Jr., OIC sa Don Carlos Municipal Police Station, miingon sa iyang report nga ang bata nadusmogan sa 10-Wheeler Truck samtang anaa sulod sa ilang panimalay nga anaa sa daplin sa dalan.

 

Ang bata uban sa duha ka mga drayber ang gidala sa Don Carlos Doctor’s Hospital.

 

Apan ang bata gideklarar nga patay nasa wala pa mahiabot.

 

Ang drayber sa truck nakaangkog grabeng kadaot sa lawas ug gi-refer sa Bukidnon Provincial Hospital, Maramag, Bukidnon.

 

Samtang ang drayber sa Bao-bao nagpabilin nga naadmit sa Don Carlos Doctor’s Hospital.

 

Nasuta sa imbestigasyon nga ang 10-Wheeler Truck nagdagan gikan sa habagatang bahin.

 

Sa pag-abot sa dapit sa insidente, nag-overtake kini sa high speed sa tuo nga outer lane, nawad-an og control, nabangga sa solar post ug sa Bao-bao ug nadusmo sa isa ka balay diin tua ang batang babaye.

 

Ang duha ka mga sakyanan nakaangkon og kadaot, nagpabilin sa dapit ug nagpaabot sa isa ka tow truck. (Omar Rashid Z. Abdullah)

School-based feeding program gipanghingusgan

Gipanghingusgan sa Department of Education (DepEd)-Division of Bukidnon ang School-Based Feeding Program (SBFP)

Angh lakang subay sa R.A 11037 o ang “Masustansyang Pagkain para sa Batang Pilipino Act”, sa pagpanguna ni Schools Division Superintendent Victoria V. Gazo.

 

Kauban sab niya ang mga partner sa maong programa nga gikan sa Provincial Nutrition Committee nga gipangunahan ni Co-Chairman Dr. Gary Guido Tabios, mga Municipal Nutrition Action Officers, health officers, mga representante gikan sa Division of Malaybalay ug Valencia, DOST ug sa mga pribadong partners niini.

 

Gitinguha nga makadawat sa sustansyadong pagkaon ug gatas ang mga pinili nga bata gikan sa Kinder hangtud sa Grade-6.

 

Tumong aron makalahutay sa pag-skwela ug dili mamahimong babag ang kagutom.

 

Mi-pirma sa Pledge of Commitment Wall ang tanang partners sa maong higayon alang sa School-Based Feeding Program Para sa Batang Bukidnon Malusog (SBFP-PBBM). (Omar Rashid Z. Abdullah)

PVET office padayon sa paghatag og animal health services

Padayon nga naghatag og mga animal health services ang Provincial Veterinary Office (PVet) alang niadtong mga walk-in clients nga interesadong mag-avail sa mga serbisyo alang sa ilang binuhing hayop.

Sumala sa kasayoran, ang mga serbisyo naglangkob sa rabies vaccination, deworming, treatment consultation ug paghatag og vitamins.

 

Ang buhatan bukas sa matag adlaw nga Lunes hangtud Biyernes sa alas 8 sa buntag hangtud alas 5 ang takna sa hapon.

 

Base sa data gikan sa PVET, as of February 23, 2024, mi-ihap sa 33 ka mga iro ug lima (5) ka mga iring ang naka-avail sa rabies vaccination.

 

Adunay 1,533 ang na-deworm ug 1,446 ang nahatagan ug vitamins nga gilangkuban sa iro, iring, kanding, baboy, baka, kabaw, kabayo, manok ug karnero ug dose (12) ang naka-avail sa treatment consultation.

 

Samtang upat ka iring ug upat usab ka iro ang na-kapon gikan sa Enero 18 hangtud Pebrero 14, 2024. (Omar Rashid Z. Abdullah)

Babaye gipusil sa Don Carlos

Isa ka babaye ang biktima sa pagpamusil sa Purok 6, Brgy. Embayao, Don Carlos, Bukidnon hapon sa Pebrero 21, 2024

Si Police Major Cipriano V. Bazar, OIC sa Don Carlos Municipal Police Station, miila sa babayeng biktima nga isa ka 47-anyos nga babaye.

 

Ang biktima naigo sa iyang wala nga bitiis, wala nga abaga ug wala nga likod.

 

Siya daling gidala sa Kibawe Provincial Hospital aron matambalan.

 

Sa inisyal nga imbestigasyon, nasayran nga ang biktima nagpahulay/natulog sulod sa iyang barong-barong dihang gipusil sa wa mailhing tawo gamit ang improvised shotgun.

 

Ang suspek nisibat human sa krimen padulong sa wala masayring direksyon.

 

Sumala pa sa biktima nga dihang naigo siya, nisinggit siya og tabang, nikamang paingon sa barangay mga 50-metros ang kalayoon diin isa ka concerned citizen ang nakakita ug mi-rescue kaniya ug nanawagan og police assistance sa PNP Patrol Base sa Brgy. Embayao.

 

Gibutyag pa sa biktima nga ang ilang yuta giangkon sa isa ka lider sa mga lumad nga grupo.

 

Sa pagkutlo ning balita, padayon pa ang imbestigasyon sa Don Cralos MPS alang sa kasolbaran sa maong kaso. (Omar Rashid Z. Abdullah)

Deep Well project sa PDRC gisugdan na

Gisugdan na ang pagtrabaho sa Deep Well project sa Provincial Government sa Bukidnon alang sa Provincial Detention and Rehabilitation Center (PDRC) sa Sitio Natid-asan, Brgy. Casisang, Malaybalay City, Bukidnon

Sumala sa kasayoran sa provincial government sa Bukidnon, nahigayon kini kaniadtong Pebrero 21, 2024 human sa groundbreaking ceremony.

 

Apan sa wala pa ang seremonya sagroundbreaking, unang gipahigayon ang isa ka pamuhat agig pananghid sa espiritu sa yuta nga si Talabugta.

 

Ang proyekto nga adunay 90 metros nga kalawomon trabahoon sa Provincial Engineering Office Waterworks Division sulod sa 180 calendar days.

 

Ang pondo sa proyekto gikan sa PGO-Provincial Disaster Risk Reduction and Management Division nga mibalor og ₱3,160,000.

 

Ang proyekto tubag sa PGB sa gipasabot ni acting Provincial Warden Nelson A. Balaba niadtong Disyembre kabahin sa kakulangon sa supply sa tubig sa PDRC. (Omar Rashid Z. Abdullah)

2 patay, 1 angol sa road mishap sa Pangantucan

Duha ang patay samtang angol ang isa ka menor de edad human nibangga sa Fuso Truck ang motorsiklong ilang gisakyan sa Munisipyo sa Pangantucan, Bukidnon

Si Police Captain Edgar M. Apog, OIC sa Pangantucan Municipal Police Station, niingon sa iyang report nga nahitabo ang panagbangga sa gabii sa Pebrero 24, 2024 didto sa National Highway sa Sitio Bong-bong, Brgy. Adtuyon,

Ang lalaking drayber sa motorsiklo lakip ang iyang hingkod nga angkas ang naligsan sa trak.

Subo lang, ang duha gideklarar nga dead on arrival sa Pangantucan Medical Hospital sa nag-atiman nga doktor.

Samtang ang laing angkas nga menor de edad ang nakahiagum og less serious head injuries.

Nasayran sa inisyal nga imbestigasyon nga ang duha ka mga sakyanan nagbiyahe sa samang direksyon paingon sa Poblacion sa maong Munisipyo diin nagsunod ang motorsiklo sa trak.

Ang motorsiklo nisuway og overtake sa trak sa hait nga kurbada hinungdan nga nabangga kini sa tuong bahin sa trak.

Kini nga panagbangga misangpot sa drayber ug hingkod nga pasahero sa motorsiklo nga naligsan sa likod nga tuong ligid sa trak.

Ang 55-anyos nga drayber sa trak anaa na sa kustodiya sa Pangantucan MPS uban sa mga nalambigit nga sakyanan. (Omar Rashid Z. Abdullah)

Pipila ka kalohokan sa Kaamulan 2024 gipangandaman sa NCIP Bukidnon

Isa ka ground breaking ceremony ang gipahigayon sa LGU Valencia City alang sa pagtukod og Multi-Purpose Building Phase 1 sa bag-ong City Agriculture Office nga adunay Training Center niadtong Enero 25, 2024

Sumala sa kasayoran sa LGU Valencia, ang proyekto nahimutang sa Purok 1, Brgy. Pinatilan.

Ang groundbreaking ceremony isa ka pagmatuod nga pagasugdan na ang maong proyekto.

Dakong kalamposan alang kang Mayor Azucena P. Huervas ingon man ni City Agriculturist Connie Dalangan nga masugdan ang pagpatukod sa maong bag-ong opisina aron mas mapalig-on ang paghatod og serbisyo alang sa mga mag-uuma.

Pasiuna usab ang pagtukod sa maong pasilidad nga nagkantidad og muabot sa P15 milyon ubos gikan sa 20 percent Local Development Fund.

Mahimutang ang proyekto sa 14 ektaryas nga luna nga puhon pagatukuran usab og Post Harvest Facilities sama sa rice mill ug sa Techno-Demo Farm, uban sa tingoha nga mahimo ang maong dapit nga agritourism destination sa dakbayan.

Gipaabot usab ni Vice Mayor Atty. Teodoro Roteo Pepito ang pagsuporta sa 9th Sangguniang Panlungsod, diin matod niya, dako usab og ikatabang ang bag-ong opisina, sanglit aduna na kiniy Training Center nga makahatag og dugang kahibalo ug kalamboan sa mga mag-uuma.

Dako usab ang pagsalig ni Mayor Huervas sa contractor sa proyekto nga mao ang Arbul Builders and Construction Supply, sa pagpanguna ni Engr. Allen Bula, nga tumanon niini ang pagtukod sa dekalidad nga pasilidad subay sa plano nga pagkumpleto niini sulod sa walo ka bulan.

Nahimong mabungahon ang pagpahigayon sa seremonya pinaagi usab sa pagsuporta ug presensya nila City Councilor Rogelio Hera, Jr., nga mao usab ang Committee Chair on Agriculture, Councilor Cecile Mabao-Caballero, Councilor Sasang Cadigal-Recla, IPMR Bae Irene Pandian, SK Federation President John Legeil Estoquia, mga Department Heads, IP Leaders, City Events Committee, ug mga personahe sa City Agriculture Office. (Omar Rashid Z. Abdullah)

Serbisyong optikal alang sa mga kabus nakalusot sa SP

Giaprobahan sa Sangguniang Panlungsod (SP) ang Resolution No. 2024-0593 nga naghatag og pagtugot kang Mayor Jay Warren R. Pabillaran sa pagsulod sa isa Memorandum of Agreement (MOA) tali sa City Government of Malaybalay ug sa D’ Vintage Vision Inc

Sumala sa kasayoran, ang kasabotan mahitungod sa serbisyong optikal nga itabang sa mga nailang kabus sa syudad sa Malaybalay.

Human sa masusing pagtuon, atol sa ika 76th regular session niadtong Enero 23, 2024, giduso ni Konsehal Cromwell Kiril D. Dinlayan resolusyon nga hiniusang giuyonan sa konseho.

Nasayran nga kaniadtong Enero 2, 2024, ang buhatan sa mayor nag-endorso ngadto sa SP uban sa paghangyo nga pagatugotan si Pabillaran sa pagsulod sa isa ka kasabotan nga dako og ikatabang sa katawhan labi na kadtong mga kabus nga nanginahanglan sa nasangpit nga serbisyo.

Gidawat sa City Government of Malaybalay ang ilang tanyag sa nasangpit nga serbisyo ug ang duha ka partido miuyon sa uban pang mga termino ug kondisyon nga natala sa nasangpit nga MOA.

Nasayran nga ang D’ Vintage Vision Inc., isa ka optical shop corporation with SEC Registration No. CS201535609 nga nagahatag serbisyo ug produktong optikal. (Omar Rashid Z. Abdullah)

2 gipamusil sa Malaybalay

Duha ka managlahing insidente sa pagpamusil ang nahitabo sa dakbayan sa Malaybalay

Sumala sa report sa kapolisan, ang mga lalaking biktima nag-edad sa 45-anyos ug 43-anyos.

Ang unang gipusil patay mao 45-anyos nga minyong lalaki.

Siya gipusil sa Fortich St., National Highway, Purok 4, Brgy. San Jose, Malaybalay City gabii sa Enero 21, 2024.

Nakaangkon siya sa grabing samad pinusilan sa iyang wala nga dunggan diin ang bala migawas sa tuo nga templo gamit ang wala matinong kalibre sa armas.

Napalgan siya nga nagbuy-od sa abaga sa dalan paingon sa norte kilid sa iyang single nga motorsiklo nga nagkadugo ang nawong.

Gidala pa ang biktima sa Bukidnon Provincial Medical Center apan gideklarar sa nag-atiman nga doktor nga dead on arrival.

Sa laing bahin, ang ikaduhang pagpamusil patay nahitabo gabii sa Enero 23, 2024 sa Purok 4, Barangay 7, Malaybalay City, Bukidnon.

Ang 43-anyos nga biktima nakaangkon sa grabing mga samad pinusilan sa lawas.

Gidala pa siya sa mireponding MERU personnel ngadto sa BPMC apan gideklarar sa nag-atiman nga doktor nga dead on arrival.

Sa imbestigasyon nasayran nga niabot ang suspek sa pinuy-anan sa biktima nga nagpakaron-ingnon nga mangabang.

Pipila ka gutlo ang milabay, sa walay igong rason gipusil ang biktima sa makadaghang higayon ug milayas ang suspek padulong sa wala mahibal-i nga direksyon.

Sa pagsuwat ning balita, padayon pa ang imbestigasyon sa kapolisan sa Malaybalay aron pagtino sa motibo ug pag-ila sa mga suspek. (Omar Rashid Z. Abdullah)

Lalaki gipusil sa Kitaotao

Isa ka 23-anyos nga lalaki ang gipusil patay sa Purok 10, Sityo Pamulaan, Sinuda, Kitaotao, Bukidnon gabii sa Enero 12, 2024

Ang biktima nakaangkon og upat ka samad pinusilan – duha sa iyang dughan, ug duha sa wala ug tuo nga bahin sa iyang lawas.

Sumala kini sa report ni Police Captain Christopher P. Tuzara II, OIC sa Kitaotao Municipal Police Station (KMPS).

Sa inisyal nga imbestigasyon, nasayran nga sa samang petsa mga alas 7:40 sa gabii, nagbarog daplin sa dalan ang nahisgutang biktima dihang niabot ang duha ka wa mailhing tawo sakay sa kolor itom nga Kawasaki Bajaj nga motorsiklo, nga walay plaka.

Gipusil sa mga mamumuno ang lalaki sa makadaghang higayon gamit ang Cal .45 nga pistola.

Matod sa magulang sa biktima, ang gunman nagsul-ob og itom nga jacket, itom nga bonnet, ug itom nga short.

Human sa pagpamusil, misibat ang mga suspek paingon sa amihanang direksyon.

Ang biktima gihatod dayon sa iyang igsuon sakay sa motorsiklo paingon sa Buda Medical Center. Ikasubo, ang biktima gideklarar nga dead on arrival sa nag-atiman nga mananambal.

Narekober sa mga mirespondeng pulis nga nadestino sa Border Control Point (BCP) sa Lorega, Kitaotao, Bukidnon ang unom (6) ka kabhang sa bala sa Cal. 45 pistola sa lugar nga nahitaboan sa pagpamusil.

Kini nga mga piraso sa ebidensya lagmit adunay mahinungdanon nga papel sa nagpadayon nga imbestigasyon aron mailhan ang mga sad-an ug mahibal-an ang mga kahimtang nga naglibot sa insidente.

Wala pa matino ang motibo sa pagpamusil.

Ang padayon nga imbestigasyon nakatutok sa pagtigom og dugang impormasyon aron mahibaw-an ang mga rason luyo sa pag-atake sa biktima. (Omar Rashid Z. Abdullah)