Saturday, January 28, 2023

2 patay sa pagpangdunggab sa Kalilangan

Duha ka lalaki ang patay atol sa birthday party celebration nga nahigayon sa Pendon’s Spring Resort sa Kinura, Kalilangan, Bukidnon niadtong Enero 21 sa alas 6:30 sa gabie

Giingon ni Police Maj. Merlin M. Macawili, oic sa Kalilangan Municipal Police Station sa iyang report nga ang mga biktima naila nga si Benjie Gatera Babon, ulitawo, laborer ug residente sa P-5, Kidansalan, Public, Kalilangan, Bukidnon ug Ronnel Monelio Domingo, 21, ulitawo, laborer ug residente sa P-11, Lampanusan, Kalilangan, Bukidnon.

Gikataho nga ang mga biktima uban sa mga suspek nag-inom ug nag videoke atol sa birthday party celebration nga ilang gi-apilan ug didto nahitabo ang pagpangdunggab.

Ang mga suspek giila nga sila Reynato Samiao y Cañedo, 40, minyo, laborer; Pablito Cumahig y Alpeche, 44, minyo, laborer; Christopher Cumahig y Alpeche, 43, adunay kapuyo; Gilbert Acuerdo y Samiao, 19, ulitawo; ug Jerry Samiao y Cañedo (hospital arrest), 32, adunay kapuyo ug tanan residente sa Brgy. Bang-bang, Kalilangan, Bukidnon. Ug isa ka wala mailhi nga suspek nga naka ikyas.

Ang mga biktima gidala sa Bukidnon Provincial Hospital sa Kalilangan apan gideklara nga dead on arrival. (Omar Rashid Z. Abdullah)

RPMES Training-Workshop sa Valencia nagmalampuson

Nagmalampuson nga napahigayon pinaagi sa suporta sa National Economic and Development Authority (NEDA) Region 10 kauban ang City Planning and Development Office ang refresher training ug workshop sa Regional Project Monitoring and Evaluation System (RPMES) sa dakbayan sa Valencia, niadtong Enero 23-24, 2023

Base sa pahibalo sa lokal nga panggamhanan, ang mga nisalmot sa maong training mao ang mga miyembro sa Local Project Monitoring Committee, punong barangay, ahensiya, ug department ug division heads sa syudad.

Tinguha sa maong training nga mapalapad ang mga pamaagi ug kapasidad sa matag buhatan ug implementing units sa pagmonitor ug pag-ebalwar sa mga nahimong proyekto ug programa sa lokalidad aron masiguro ang malamposon nga implementasyon niini. (Omar Rahid Z. Abdullah)

9 ka asosayon sa ‘ex-NPA rebels’ nakadawat og P900K gikan sa Valencia LGU

Siyam ka rehistradong ‘peoples organization sa kanhi mga rebelde sa New Peoples Army 9NPA) ang nakadawat og P900,000 gikan sa lokal nga kagamhanan sa Valencia City, Bukidnon, niadtong Enero 11

Ang Philippine Information Agency nitaho nga alayon kini sa pag-pursige ug kadasig sa mga kanhi rebelde aron mo-asenso ug mo-uswag ang ilang panginabuhi human sila mibiya sa Komunistang grupo.

Ang matag isa sa siyam ka organisasyon gihatagan og tag P100,000.

Ang siyam ka asosasyon mao ang Farmers Revival Association; Domago-ok Farmers Association; Samahan ng mga Balik-Loob Association; Pag-asa Womens Association Pig Dispersal; Barangay Mabuhay Farmers Association; Samahan ng mga Kababaihan ng Laligan; Bulacao Riders Organization; Laligan Curvada Spring Association; ug Laligan Farmers Association.

Si Legal Officer Atty. Marlowe Selecios niingon nga giseguro ni Valencia City Mayor Azucena Huervas nga gahinan sa pundo ang siyam ka asosasyon aron magsilbing ‘start-up capital’ sa ex-rebels nga nibalik sa gobyerno. (Omar Rashid Z. Abdullah)

CHO mipahigayon og IEC sa leptospirosis, medical mission

Nagpasiugda ang Malaybalay City Health Office (CHO) team og isa ka medical mission niadtong Enero 19, 2023 sa covered court, Brgy. Sinanglanan, Malaybalay City

Base sa pahibalo sa lokal nga panggamhanan, gawas sa konsultasyon ug tambal, ang CHO team naghatag usab sa mga katawhan og kahibalo sa peligro nga sakit nga posible makuha panahon sa baha.

Ang CHO team nagpakita sa ilang suporta ug nagpaambit sa ilang mga kahibalo bahin sa epekto sa Leptospirosis atubangan sa mga residente sa maong barangay.

Uban usab ang CHO nurses ug mga kawani, ilang gipasabot nga mag-amping kanunay kung musuong sa bahaon nga lugar. Ang maong kondisyon pwede matambalan pinaagi sa pag inom og antibiotic. (Omar Rashid Z. Abdullah)

Top 1 Kadingilan, Top 7 Don Carlos most wanted person nakorner

Nakorner sa hiniusang pwersa sa kapolisan ang top 1 most wanted person sa Kadingilan ug top 7 most wanted person sa Don Carlos, Bukidnon sa managlahing higayon.

Ang report sa Bukidnon Police Provincial Office (BPPO) nagbutyag nga ang duha nailang si Jovy Lucaberte Abalde ug Esperijun Seco.

Si Abalde, 42, minyo, laborer ug residente sa P-4 Brgy. New Visayas, Don Carlos, Bukidnon. Siya naila nga top 1 most wanted person sa Kadingilan. Siya akusado sa upat ka ihap sa kasong Rape.

Siya nasikop sa P-1 Brgy Poblacion, Kadingilan, Bukidnon niadtong Enero 14, 2023.

Samtang, si Seco, ang nailang top 7 most wanted person sa Don Carlos. Siya 37, minyo, ug residente sa Balangay 1A Poblacion, Quezon, Bukidnon. Siya akusado sa kasong Acts of Lasciviousness ug Rape.

Gisikop siya niadtong Enero 15, 2023 sa ala 1:30 sa hapon.

Si Abalde gidala sa Kadingilan Municipal Police Station samtang si Seco gidala sa Kitaotao MPS para sa hustong disposasyon. (Omar Rashid Z. Abdullah)

 

Mag-uuma sikop sa drug buy-bust sa Kalilangan

Isa ka mag-uuma ang gisikop sa hiniusang pwersa sa kapolisan sa gipahigayon nga drug buy-bust operation sa Sitio Cogo, Macaopao, Kalilangan, Bukidnon niadtong Enero 16, 2023.

Gibutyag sa report ni Police Maj. Merlin M. Macawili, OIC sa Kalilangan Municipal Police Station, nga ang suspek mao si Minsuari Ampatua y Ampatua aka “Minsu”, 30, minyo, ug residente sa Purok-6, Mimbuaya, Lanao del Sur.

Nakuha gikan sa iyang posesyon ang gibana-bana nga 12 gramo sa gidudahang shabu nga adunay standard drug price nga Php 81,600.00.

Kasong paglapas sa RA 9165 ang gi andam batok sa arestado. (Omar Rashid Z. Abdullah)

“Saludo sa Batang Valenciano” Awarding Ceremony nagmalampuson

Gitagaan og pagpasidungog ang mga young achievers sa dakbayan sa Valencia pinaagi sa Valencia City Youth Development Office sa napahigayon nga “Saludo sa Batang Valenciano” Year 8 Awarding Ceremony sa Robinson’s Place Valencia, niadtong Enero 10, 2023.

Base sa pahibalo sa lokal nga panggamhanan, sa maong seremonya, adunay 136 ka mga kabatan-onan sa natad sa sports, 16 sa education, ug 35 sa culture and arts ang gitagaag pasidungog.

Sila gipasidunggan bahin sa ilang mga kalamposan nga nakabot sukad Enero 2022 hangtod Enero 2023 sa internasyonal, nasyonal, ug rehiyonal nga lebel. (Omar Rashid Z. Abdullah)

Akusado sa 23 counts of rape gisikop sa Pangantucan

Isa ka lalaki nga akusado sa 23 counts of rape gisikop sa hiniusang pwersa sa kapolisan niadtong Enero 9, 2023 sa Decolores Village, Poblacion, Pangantucan, Bukidnon sa alas 11:10 sa buntag.

Ang report ni Police Cpt. Michael Angelo C. Roldan, oic sa Pangantucan Municipal Police Station nibutyag nga ang suspek giila nga si Ronald Panuncia Y Sedavia.

Si Panuncia, 32, minyo, carpenter, residente sa maong dapit ug giila usab nga top 2 most wanted person sa Pangantucan.

Gisikop siya pinasubay sa warrant of arrest sa 23 ka ihap sa kasong rape nga adunay criminal case no. nga 20457-09 to 20480-09 pinetsahan Disyembre 28, 2009.

Nasikop siya human sa 13 ka tuig nga pagtago-tago.

Ang arestado anaa na karon ubos sa kustodiya sa Pangantucan MPS alang sa hustong disposasyon. (Omar Rashid Z. Abdullah)

2 nakuhaan og droga sa Malaybalay

Duha ka lalaki ang nakuhaan og gidudahang droga sa kapolisan sa gipahigayon nga drug buy-bust operation niadtong Enero 10, 2023 sa Purok 4, Barangay Sumpong, Malaybalay City, Bukidnon.

Base sa report ni Police Lt. Col. Ritchie A. Salva, oic sa Malaybalay City Police Station, ang duha ka suspek naila nga si Frengel Rayos y Gumbay, 30, adunay kapuyo ug si Alvin Balangyao y Gayonan, 37, ulitawo ug parehong construction workers ug residente sa Purok-1, Barangay Sumpong, Malaybalay City, Bukidnon.

Nakuha gikan sa ilang posesyon ang 2.56 gramo sa gidudahang shabu nga adunay standard drug price nga P17,272.00 ug 0.83 gramo sa gidudahang marijuana nga adunay standard drug price nga P99.6.

Ang mga arestado anaa na ubos sa kustodiya sa Malaybalay CPS ug kasong paglapas sa R.A. 9165 ang gi-andam batok kanila. (Omar Rashid Z. Abdullah)

“GOODBYE, MA”, midaog sa Short Film Festival sa Valencia

Ang short film nga “GOODBYE, MA” nidaog isip grand winner sa gipahigayon nga Short Film Festival niadtong Enero 10, 2023.

Base sa pahibalo sa lokal nga panggamhanan, ang kompetisyon gipahigayon sa City Gymnasium and Cultural Center sa Valencia City, Bukidnon.

Ang Tagisan ng Galing at Talino (Year 13) competitions gidumala sa Rotary Club of Metro Valencia ug gpahigayon kini isip kabahin sa 22nd Charter Day Celebrations sa Siyudad.

Ang mananaog nga entry gipangulohan sa Junior High School Students sa Mountain View College Academy, Mt Nebo, Valencia City, Bukidnon.

Gipahigayon ang kompertisyon inubanan sa Rotary Club of Metro Valencia (RCMV) kansang tema nga “KAPANATAGAN AT KAPAYAPAAN, KAYA MO KABATAAN” nag-atubang sa mga pakigbisog, isyu ug hagit sa mga kabatan-onan, naghatag kanila og paglaom, inspirasyon ug kaisog sa pagbangon ug pag-atubang sa umaabot nga maisugon ug masaligon. (Omar Rashid Z. Abdullah)