KALILANGAN, Bukidnon — Nasakmit sa mga otoridad ang shabu nga nibalor og PHP 1,084,396.00 sa usa ka buy-bust operation sa Purok 1, Barangay Central Poblacion, Kalilangan, Bukidnon, pasado alas 3:15 sa buntag niadtong Disyembre 12, 2025

Sumala sa report ni Police Captain Romeo M. Arcilla Jr., OIC sa Kalilangan Municipal Police Station, nasayran nga nasikop sa operasyon si Alyas “Abdul”, 28-anyos, kinsa giilang usa ka High-Value Individual (HVI), ug ang kauban niining usa ka 23-anyos nga lalaki.  

Gawas sa nakuhang shabu, nakuha sab gikan sa posisyon sa duha ang selpon, pitaka, ug uban pa.   Kasong paglapas sa Sections 5 ug 11, Article II sa Republic Act 9165 ang giandam na batok sa mga dinakpan.  

Ang mga dinakpan gidala sa Kalilangan MPS alang sa tukmang kaso ug disposisyon, samtang ang mga nakumpiska nga ebidensiya gipasa ngadto sa Provincial Forensic Unit para sa qualitative ug quantitative nga eksaminasyon.  

Ang arresting police unit gipangunahan sa Kalilangan MPS sa koordinasyon sa Provincial Intelligence Unit (PIU), 1004th RMFB-10, ug PDEA 10. (Diego M. Hidalgo)