Sa usa ka mahinungdanong lakang alang sa agrikultura sa probinsya, gipangunahan ni Provincial Governor Rogelio Neil P. Roque ang testing ug commissioning sa Bukidnon Provincial Grains Center nga nahimutang sa Barangay Sinabuagan, Valencia City, Bukidnon niadtong Abril 8, 2026

Ang maong kalihokan nagtimaan sa pag-abli sa usa ka moderno ug episyenteng pasilidad nga gilauman maghatag og bag-ong kusog sa lokal nga produksyon sa humay.

Sumala sa press release sa Public Affairs, Information and Assistance Division sa Provincial Governor’s Office, personal nga giinspeksyon ni Governor Roque ang pasilidad sa pinakabag-o nga plant visit aron masiguro ang kahingpit sa kahimtang niini ug ang kaandam alang sa hingpit nga operasyon.

Gitukod ang grains center aron maminusan ang pagkausik sa humay, ilabi na sa proseso sa pagpa-uga ug paggaling, samtang ginahatagan usab og mas makiangayon ug kompetitibong presyo ang ani sa mga mag-uuma. Pinaagi niini, gilauman nga mapalambo ang kalidad sa produksyon ug mas mapataas ang kita sa sektor sa agrikultura.

Ang pasilidad gipuno sa state-of-the-art nga teknolohiya, lakip ang rice mill nga adunay 2–3 tons per hour nga input capacity, upat ka mechanical dryers nga may kapasidad nga 6 tons matag batch, mist polisher, length grader, color sorter, ug uban pang modernong kagamitan nga mosuporta sa episyenteng post-harvest processing.

Gilauman nga dako kini’g ikatampo sa pagpalig-on sa rice industry sa Bukidnon, samtang naghatag og dugang nga oportunidad ug kita sa mga mag-uuma sa probinsya.

Natukod ang grains center pinaagi sa lig-on nga pakigtambayayong sa Provincial Government of Bukidnon ug sa Department of Agriculture–PhilMech ubos sa Rice Competitiveness Enhancement Fund Mechanization Program.

Sa pagkakaron, ginapaabot ang pagsugod sa full-scale operation sa pasilidad sa dihang mahuman na ang tanang kinahanglanong dokumento ug pormalidad.

Mahinumduman nga gitambungan ni Governor Roque ang groundbreaking ceremony niini niadtong Pebrero 19, 2024—usa ka sinugdanan nga karon nahimong realidad. Duha ka tuig ang milabay, ang maong proyekto natuman ug naplastar pinaagi sa dedikasyon sa Provincial Agriculture and Biosystems Engineer Office, nga nagdala og bag-ong paglaum sa umaabot sa agrikultura sa Bukidnon. (melbmadera)