Nikabat sa 7,366 ka kaso sa dog bite incidents ang natala sa Dakbayan sa Malaybalay sa tibuok tuig sa 2025, sumala sa pinakabag-ong datos sa City Veterinary Office

Ang maong ihap nagpakita sa padayon nga hagit sa pagdumala sa rabies ug responsableng pag-atiman sa mga hayop sa komunidad.

Gibutyag kini ni Dr. Jude Ignatius F. Casimero atol sa Kapihan Quarterly Media Forum nga gi-organisar sa City Government of Malaybalay niadtong Marso 31, 2026, sa People’s Hall sa City Hall sa Barangay Casisang.

Matod pa niya, base sa rabies situation report, duha ang kumpirmadong kaso sa animal rabies gikan sa 72 ka sampol nga nasumite, samtang usa usab ang naitalang kaso sa human rabies.

Dugang pa ni Casimero nga ang mga barangay sa Kalasungay, Sumpong, Poblacion, Casisang, San Jose, ug Aglayan ang adunay pinakadaghang ihap sa mga insidente, nga giingong resulta sa ilang kahimtang isip mga lugar nga adunay taas nga densidad sa populasyon.

Bisan pa niini, padayon ang paningkamot sa lokal nga kagamhanan sa pagpalig-on sa rabies prevention programs, lakip ang vaccination drives ug information campaigns, aron mapanalipdan ang kahimsog sa katawhan ug mapakunhod ang maong mga insidente sa umaabot. (melbmadera)