Duha ka lalaki ang nasamdan human sa insidente sa pagpamusil nga nahitabo sa Barangay Balaoro, Kadingilan, Bukidnon, gabii sa Biyernes Santo, Abril 3, 2026

Ang mga biktima dayong gidala sa Bukidnon Provincial Hospital sa Kibawe alang sa pagpatambal human makaangkon og samad pinusilan sa bukton ug tiyan.

Sumala sa police report, usa sa mga biktima nakaangkon og samad sa wala nga bukton, samtang ang ikaduha naigo sa wala nga bahin sa tiyan.

Nasayran nga ang ikaduhang biktima nakaila sa suspek sa dihang nilili siya sa bintana ug midan-ag gamit ang flashlight, nga nakahatag og mahinungdanong detalye sa imbestigasyon.

Sa dugang pang imbestigasyon, nahibaloan nga ang mga biktima naa sulod sa ilang balay sa dihang gipamusil sa tawo nga naglihok-lihok sa gawas sa balay. Human sa insidente, misibat ang suspek ug nakalingkawas.

Padayon ang imbestigasyon sa Kadingilan Municipal Police Station aron madakpan ang responsable sa maong krimen. (melbmadera)