Gidakop sa kapulisan ang usa ka ama-ama human siya pasanginli sa sekswal nga pag-abuso sa usa ka menor de edad sa Don Carlos, Bukidnon niadtong Abril 6, 2026

Ang insidente dayong gitubag sa mga awtoridad human sa pagreport sa usa ka sakop sa pamilya nga mikuyog sa biktima ngadto sa Don Carlos Municipal Police Station mga alas 12:30 sa udto.

Sumala sa report sa Police Regional Office 10, gilusad dayon ang hot pursuit operation nga mitultol sa pinuy-anan sa suspek. Sa pag-abot sa kapulisan, misulay pa kini sa pag-ikyas pinaagi sa pagsulod sa balay ug pagsaka sa bungbong sa silingan, apan sa katapusan, na-korner ug malampusong nasikop.

Sa inisyal nga imbestigasyon, nasayran nga makaduha ka higayon nga giabusohan ang biktima, ug sa ikaduhang insidente, nakasukol ug nakaikyas siya. Ang biktima misumbong sa iyang lola nga mipahibalo sa uyoan, hinungdan nga nangayo sila og tabang sa kapulisan.

Ang suspek karon gikustodiya sa Don Carlos MPS samtang giandam ang kasong Qualified Rape ug Attempted Rape in relation to Republic Act 7610 alang sa pagpasaka sa korte.

Samtang, ang menor de edad nga biktima itugyan sa Department of Social Welfare and Development (DSWD) aron mahatagan og hustong proteksyon, pagtambag, ug suporta.

Midayeg si Police Brig. Gen. Christopher N. Abrahano, regional director sa PRO 10, sa paspas ug epektibong aksyon sa mga mirespondeng personnel sa maong operasyon. (melbmadera)