MALAYBALAY CITY, Bukidnon – Isa ka bag-ong paglaum alang sa panginabuhian sa kabaybayonan ug kapatagan sa Valencia City ang miturok human malampusong gipahigayon sa City Agriculture Office (CAgO) ang pag-apod-apod og tilapia fingerlings ngadto sa 184 ka mangingisda niadtong Mayo 6, 2026

Ang mga benepisyaryo naggikan sa pito ka barangay—Kahaponan, Lilingayon, San Carlos,
Lumbo, Vintar, Lurugan, ug Mailag—nga padayon nga nagpaningkamot sa pagpalambo sa ilang
pangisdaan isip haligi sa ilang panginabuhian.
Nahimong lig-on ang maong kalihokan pinaagi sa pakigtambayayong sa Philippine Crop
Insurance Corporation (PCIC), nga nagpadayag sa hiniusang paningkamot sa pagpalig-on sa
sektor sa agrikultura ug pangisdaan sa siyudad.
Sumala sa buhatan sa mayor, ang programa gitumong sa paghatag og dugang oportunidad sa
aquaculture, pinaagi sa pagpasig-uli ug pagpalambo sa produksyon sa isda, samtang ginapalig-on
ang kita sa mga komunidad. Gipasiugda usab ang walay hunong nga suporta nila Mayor Amie
Galario ug Vice Mayor Greizl Galario sa mga inisyatiba nga nagpunting sa kasiguruhan sa
pagkaon ug kalamboan sa lokal nga ekonomiya.
Gidasig sa lokal nga panggamhanan ang mga benepisyaryo nga ampingan ug mapadako ang mga
fingerlings, isip pundasyon sa mas lig-on ug malungtarong panginabuhian sa umaabot.
Ang maong inisyatiba naghulagway sa padayon nga paningkamot sa Valencia City sa paghatag
og kahigayunan ug paglaum, diin ang matag gamayng isda mahimong sinugdanan sa mas dako
nga kauswagan. (melbmadera)