MALAYBALAY CITY, Bukidnon – Gisakup sa kahanginan sa Malitbog ang kahinam ug garbo sa Northern Mindanao sa opisyal nga pagbukas sa Asian Paragliding Cross Country (XC) League 2026, usa ka internasyonal nga kalihokan nga nagpasundayag sa katahum ug potensyal sa Bukidnon isip adventure tourism hub

Sumala sa Provincial Government of Bukidnon, ang maong kompetisyon gisugdan niadtong
Mayo 5 ug padayon hangtud Mayo 10, 2026, nga ginahimo sa Sityo San Migara, Barangay San
Luis, Malitbog—usa ka lugar nga nailhan sa nindot nga talan-awon ug angay nga kondisyon sa
hangin alang sa paragliding.
Gipasiugda ni Department of Tourism Regional Director Marie Elaine S. Unchuan, atol sa
opening program niadtong Mayo 6, nga padayon nga nailhan ang Malitbog isip usa sa mga
ginapangita nga sports tourism destinations tungod sa natural landscapes, paborableng hangin, ug
dako nga potensyal nga mahimong world-class adventure site.
Mainiton usab nga giabiabi ni Malitbog Mayor Gary Casiño ang mga partisipante gikan sa
nagkalain-laing nasud, ug nagpahayag og paglaum nga ilang madala ang dili malimtan nga
kasinatian sa pagpalupad ibabaw sa kabukiran sa Bukidnon.
Ang kalihokan gitambongan sa mga world-class pilots gikan sa Thailand, South Korea,
Indonesia, Malaysia, India, Pilipinas, ug US, nga naghatag og internasyonal nga kahayag sa
maong kompetisyon.
Samtang, mapasigarbuhon si Bukidnon Governor Rogelio Neil Oñiel Roque sa pag-host sa laing
world-class nga kalihokan, nga nagpakita sa nagkadakong papel sa probinsya sa global adventure
tourism. Kauban niya sa maong okasyon sila Congressman Jose Manuel Alba ug dinapit nga
bisita nga si Deputy Speaker Maria Rachel Arenas.
Ang maong liga dili lamang kompetisyon sa kahanas sa pagpalupad, kondili usa usab ka
pagpanghimatuod nga ang Bukidnon padayon nga molupad paingon sa mas halapad nga
kahimtang sa turismo ug kalamboan. (melbmadera)